ភាពទន់ភ្លន់ ឬដំណើរមានចិត្តរីករាយទៅរកសេចក្តីសុខរបស់អ្នកដទៃពុំរើសមុខ នៅពេលដឹងថា គេមានទ្រព្យធន បានឡើងបុណ្យស័ក្តិ បានប្រកបដោយសេចក្តីសុខ-ចម្រើន ក៏មានចិត្តជួយអរ នេះហើយជាតួមុទិតា ។ មុទិតានេះជាធម៌សំខាន់មួយបែបសម្រាប់ពពួកមនុស្សទូទៅ…
ភាពទន់ភ្លន់ ឬដំណើរមានចិត្តរីករាយទៅរកសេចក្តីសុខរបស់អ្នកដទៃពុំរើសមុខ នៅពេលដឹងថា គេមានទ្រព្យធន បានឡើងបុណ្យស័ក្តិ បានប្រកបដោយសេចក្តីសុខ-ចម្រើន ក៏មានចិត្តជួយអរ នេះហើយជាតួមុទិតា ។
មុទិតានេះជាធម៌សំខាន់មួយបែបសម្រាប់ពពួកមនុស្សទូទៅ តែសេចក្តីបរិសុទ្ធទាំងនេះកាលបើឮដល់អ្នកដែលមានចិត្តឥស្សាហើយក៏ដល់នូវសេចក្តីស្លុតចិត្តគឺការច្រណែនកើតឡើងភ្លាម ខណៈនេះបើមិនមានវិធានការទប់ស្កាត់ទេ វានឹងបណ្តាលឱ្យមានរឿងមិនល្អផ្សេងៗកើតឡើង ដែលជារឿងគួរឱ្យខ្លាចបំផុត ។
មធ្យោបាយដែលគួរយកមកកម្ចាត់ចិត្តឥស្សាច្រណែនឈ្នានីស គឺត្រូវអប់រំចម្រើននូវមុទិតាឱ្យបានចាំជាប់ក្នុងចិត្តជានិច្ច មានបញ្ញាយល់ដឹងរឿងពិតក្នុងលោក ត្រូវយល់ថា សម្បត្តិក្នុងលោកនេះវាមិនអស្ចារ្យណាស់ទេ តាមពិត វាគ្រាន់តែសម្រាប់ដោះស្រាយនូវសេចក្តីទុក្ខលំបាកប្រចាំរូបកាយបានតែមួយគ្រាប៉ុណ្ណោះ ។
តែបើរូបកាយមិនមានគឺស្លាប់ទៅហើយ ក៏មិនចាំបាច់ត្រូវការទ្រព្យសម្បត្តិបន្តិចបន្តួចឡើយ ប្រៀបដូចជាថ្នាំសម្រាប់ព្យាបាលរោគ ថ្នាំមិនសំខាន់ជាងអ្វីដែលយើងមិនមានរោគព្យាបាលនោះទេ ដូច្នេះខ្លឹមសារសំខាន់ក្នុងជីវិត គឺការប្រព្រឹត្តធម៌ដើម្បីរំលត់ទុក្ខតែម្យ៉ាងប៉ុណ្ណោះ ។
សូមសាធុជនគ្រប់រូបហាត់ពត់កាយចិត្ត អប់រំចម្រើននូវមុទិតា ដោយចាប់ផ្តើមពីខ្លួនយើង ឬក្រុមគ្រួសារយើងទៅមុន រួចហើយផ្សាយមុទិតានេះពង្រីកទៅដល់អ្នកដទៃជាខាងក្រៅបន្តទៀត ។
ធ្វើបានបែបនេះឥស្សាការច្រណែនឈ្នានីសក៏នឹងសាបសូន្យទៅ ព្រោះហេតុនោះហើយបានជាលោកពោលថា បុគ្គលដែលមានតែមុទិតាចំពោះអ្នកដទៃ សិរីសួស្តី និងសេចក្តីសុខចម្រើនក៏ចូលមករកជីវិតព្រមគ្នានឹងគុណធម៌ផ្សេងៗទៀតដ៏ច្រើន ។
ចែករំលែកព័តមាននេះ