រាជធានីភ្នំពេញ ៖ ក្រោយពេលកើតហេតុ កូនៗលោកតាបានទៅដល់ហើយអះអាងថា មិនធ្វើការប្ដឹងប្ដល់អ្វីទេ ព្រោះពួកគាត់បានដឹងយ៉ាងច្បាស់ពីអារម្មណ៍របស់ឪពុក ។ កន្លងមក គឺគាត់ចូលចិត្តដើរបែបនេះ គ្មាននរណាបង្ខំគាត់ឡើយ…
រាជធានីភ្នំពេញ ៖ ក្រោយពេលកើតហេតុ កូនៗលោកតាបានទៅដល់ហើយអះអាងថា មិនធ្វើការប្ដឹងប្ដល់អ្វីទេ ព្រោះពួកគាត់បានដឹងយ៉ាងច្បាស់ពីអារម្មណ៍របស់ឪពុក ។ កន្លងមក គឺគាត់ចូលចិត្តដើរបែបនេះ គ្មាននរណាបង្ខំគាត់ឡើយ ហើយបន្ទាប់ពីសមត្ថកិច្ចពិនិត្យនិងធ្វើកោសល្យវិច័យសពបង្ហាញថា ជាការគាំងបេះដូងស្លាប់ កូនៗក៏បានយកសពទៅធ្វើបុណ្យតាមប្រពៃណី ។
គួររំលឹកថា លោកតារងគ្រោះខាងលើ មានអាយុ៧១ឆ្នាំទៅហើយ តែនៅមានទំនាក់ទំនងស្នេហាជាមួយស្ត្រីម្នាក់អាយុជិត៤០ឆ្នាំ និងបានរួមមេត្រីជាមួយគ្នា១យប់ លុះព្រឹកឡើងស្រាប់តែលោកតាគាំងបេះដូងស្លាប់ ។ បើតាមស្រីស្នេហ៍លោកតា បានប្រាប់នគរបាលទាំងការអៀនខ្មាសថា នៅពេលគេងជាមួយគ្នានោះ មកពីលោកតាមានអារម្មណ៍រំភើបញាប់ញ័រនិងពុះកញ្ជ្រោលខ្លាំងពេក ទើបគាំងបេះដូងស្លាប់បែបនេះ ។ ហេតុការណ៍នេះបង្កឲ្យមានការភ្ញាក់ផ្អើលឡើង កាលពីវេលាម៉ោងប្រមាណ៧ព្រឹកថ្ងៃទី៣១ ឧសភា នៅក្នុងបន្ទប់លេខ៦A ផ្ទះជួលជាន់ទី១ ស្ថិតនៅតាមផ្លូវលំ ក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។
លោកតាខាងលើឈ្មោះ ស៊ុំ លន់ ស្នាក់នៅជាមួយកូន មានស្រុកកំណើតនៅស្រុកឧដុង្គ ខេត្តកំពង់ស្ពឺ ។ ចំណែកស្រីស្នេហ៍អាយុ៣៨ឆ្នាំ ជាស្រី្តមេម៉ាយកូន១ និងជាកម្មការិនីរោងចក្រ ស្នាក់នៅបន្ទប់ជួលកន្លែងកើតហេតុ និងមានស្រុកកំណើតនៅឃុំអញ្ចាញរូង ស្រុកបរិបូណ៌ ខេត្តកំពង់ឆ្នាំង ។ តាមប្អូនស្រីបង្កើតរបស់ស្រីស្នេហ៍លោកតាខាងលើ បានឲ្យដឹងថា លោកតានិងបងស្រីរបស់នាងបានបង្កាត់ភ្លើងស្នេហ៍ជាមួយគ្នារយៈពេល៤ខែកន្លងមកហើយ គឺតាំងពីអំឡុងខែកុម្ភៈ ឆ្នាំ២០១៩មកម្លេ៉ះ ដោយអ្នកទាំង២តែងតែបានជួប
គ្នានៅក្នុងបន្ទប់ជួលខាងលើជាបន្តបន្ទាប់ ។ ប៉ុន្តែកន្លងមក លោកតាគ្រាន់តែមកមួយភ្លែតៗបែបឆក់កណ្ដៀតប៉ុណ្ណោះ រួចក៏ទៅវិញបាត់ ។
លុះនៅព្រឹកថ្ងៃទី៣០ ខែឧសភា បន្ទាប់ពីទទួលបានដំណឹងថា បងស្រីរបស់នាងមិនស្រួលខ្លួន លោកតាក៏បានមកមើលនិងផ្ដល់កម្លាំងចិត្តដល់បងស្រីនាង ហើយរហូតដល់ល្ងាចថ្ងៃដដែល លោកតាមិនបានចេញទៅវិញឡើយនិងប្រាប់ថា នៅដេកកំដរបងស្រីនាង ។ ប្រភពដដែលបន្តថា ខណៈនោះនៅក្នុងបន្ទប់ដេកគ្នា៣នាក់ គឺបងស្រីនាង លោកតាដែលជាគូស្នេហ៍ និងរូបនាង ហើយពេលនោះអ្នកទាំង២មិនបានរួមភេទជា មួយគ្នាឡើយ ។ លុះរហូតដល់វេលាម៉ោង៥និង៣០នាទីព្រឹកថ្ងៃទី៣១ ខែឧសភា បងស្រីបានប្រាប់នាងថាមិនបានទៅធ្វើការទេ ព្រោះមិនស្រួលខ្លួន ។ ក្រោយពេលបងស្រីប្រាប់បែបនេះ នាងក៏ទៅធ្វើការនៅរោងចក្រម្នាក់ឯង ដោយមិនបាននឹកគិតថា មានរឿងអកុសលបែបនេះកើតឡើងឡើយ ហើយនៅក្នុងបន្ទប់នោះមានតែបងស្រីនាង និងលោកតាប៉ុណ្ណោះ ។
ក្រោយមក នាងមិនបានដឹងថា អ្នកទាំង២នាក់ធ្វើរឿងអ្វីដែរ រហូតដល់ម៉ោងប្រហែល៧ព្រឹក ស្រាប់តែបងស្រីប្រាប់ថា លោកតាមានអាការមិនស្រួលខ្លួននិងសន្លប់បាត់ទៅហើយ ទើបនាងត្រឡប់ទៅផ្ទះជួលវិញ និងហៅម៉ូតូកង់បីដឹកលោកតាទៅកាន់មន្ទីរពេទ្យ តែអកុសលលោកតាបានស្លាប់បាត់ទៅហើយ ។ (សម្រួលដោយ៖ ស្រីណា)
ចែករំលែកព័តមាននេះ