ខេត្តបាត់ដំបង៖ សេចក្តីរាយការណ៍ឱ្យដឹងថា អគ្គិភ័យបានឆាបឆេះទីតាំងធ្វើអាជីវកម្មត្រីឆ្អើរបស់ជនជាតិខ្មែរអុីស្លាមមួយកន្លែងគ្មានសល់ កាលពីវេលាម៉ោង៨និង១០ព្រឹកថ្ងៃទី០១ មិថុនា ស្ថិតនៅចំណុចភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបង ដោយសារតែការធ្វេសប្រហែស ។
សមត្ថកិច្ចបានឲ្យដឹងថា អគ្គិភ័យនោះបានកើតឡើង ដោយសារម្ចាស់ឆ្អើត្រីទុកចោល ទើបធ្វើឲ្យឆេះរោងឆ្អើរត្រីដែលទំហំ៥ គុណ៨ម៉ែត្រ ធ្វើអំពីឈើប្រក់ស័ង្កសី ឆេះអស់ទាំងស្រុងតែម្ដង។ ម្ចាស់អាជីវកម្មត្រីឆ្អើនេះ ឈ្មោះម៉ាត់ ស្មាន ភេទប្រុស អាយុ៧០ឆ្នាំ ជនជាតិខ្មែរអុីស្លាម រស់នៅចំណុចកើតហេតុខាងលើ។
សមត្ថកិច្ចបានស្រង់សំដីជនរងគ្រោះថា គាត់បានឆ្អើត្រីដោយមិនបានមើល ខណ:មានភ្លើងនៅខាងក្រោមចង្អើរផង ទើបបណ្ដាលឲ្យក្លាយជាអគ្គិភ័យសន្ធោរសន្ធៅផ្អើលអ្នកភូមិទាំងព្រឹកតែម្ដង។ គាត់បានប្រាប់ថា អគ្គិភ័យឆេះរោងឆ្អើត្រីទាំងស្រុង រួមទាំត្រីឆ្អើរាប់រយគីឡូផង ដែលសរុបទឹកប្រាក់អស់ប្រមាណ៤,០០០ ដុល្លារ(បួនពាន់ដុល្លារ) ។
ប៉ុន្តែយ៉ាងណា សមត្ថកិច្ចបានប្រាប់ថា ករណីខាងលើត្រូវបានម្ចាស់ផ្ទះ និងអ្នកជិតខាងជួយពន្លត់ តែរោងឆ្អើត្រី និងត្រីរាប់រយគីឡូដែលកំពុងឆ្អើត្រូវភ្លើងឆេះគ្មានសល់។ ប៉ុន្តែសំណាងល្អ មិនបណ្តាលឲ្យប៉ះពាល់ដល់អាយុជីវិត និងទ្រព្យសម្បត្តិប្រជាពលរដ្ឋផ្សេងៗឡើយ ។ (សម្រួលដោយ៖ ស្រីណា)
ចែករំលែកព័តមាននេះ