តាមប្រភពព័ត៌មាន Goal បានឱ្យដឹងថា កីឡាករជើងខ្លាំងរបស់ក្លិបអ្នកមានបុណ្យ Lionel Messi បានប្រាប់ថា ជីវិតគ្រួសាររបស់គេជាកត្តាជួយលុបលាងភាពសៅហ្មងក្រោយពេលចាញ់ការប្រកួត ហើយក៏ជាអ្វីដែលសំខាន់ខ្លាំងនៅក្នុងជីវិតផងដែរ ។
Lionel Messi បាននិយាយថា កូនៗរបស់គេបានជួយបង្រៀនឱ្យចេះបំភ្លេចចោលភាពឈឺចាប់ដែលមិនបានឈ្នះនៅលើតារាងបាល់ទាត់ ព្រោះតែពួកគេគឺជាអ្វីដែលសំខាន់ជាងបាល់ទាត់ទៅទៀត ។
កីឡាកររូបនេះខូចចិត្តយ៉ាងខ្លាំង ដែលមិនបានទទួលពាន Champions League នៅរដូវកាលនេះ ដោយសារតែចាញ់ Liverpool យ៉ាងចាស់ដៃ មុនពេលចាញ់ការប្រកួតផ្តាច់ព្រ័ត្រជាមួយនឹង Valencia ក្នុងការដណ្តើមពាន Copa del Rey ។
Messi មានកូនបីនាក់ជាមួយនឹងប្រពន្ធឈ្មោះ Antonella ។ គេបានប្រាប់ថា ដោយសារតែកូនៗហ្នឹងហើយ បានធ្វើឱ្យរូបគេក្លាយជាមនុស្សចាស់ទុំក្នុងជីវិត ។
កីឡាករអាហ្សង់ទីនបានប្រាប់ទៅសារព័ត៌មាន FOX Sport ថា ៖«ការចាញ់ពិតជាឈឺចាប់ តែខ្ញុំអាចគ្រប់គ្រងវាតាមរបៀបផ្សេង។ នៅពេល Thiago (កូន) កើតនៅឆ្នាំ២០១២ ខ្ញុំយល់ថា អ្វីដែលសំខាន់ក្នុងជីវិតមិនមែនគ្រាន់តែជាលទ្ធផលការប្រកួតនោះទេ ។ វាពិតជាពិបាកទទួលយកចំពោះការចាញ់ តែពេលខ្ញុំមកផ្ទះជួបប្រពន្ធកូន ការឈឺចាប់នោះក៏បាត់ទៅ»។ នេះគឺជាសម្តីពិតរបស់កីឡាករជើងខ្លាំង ដែលស្រឡាញ់កូន និងគ្រួសារជាងការប្រកួតបាល់ ៕
កែសម្រួលដោយ ៖ សំណាង
ចែករំលែកព័តមាននេះ