ខេត្តបន្ទាយមានជ័យ ៖ អធិការរងនគរបាលក្រុងប៉ោយប៉ែត ទទួលផែនព្រហ្មទណ្ឌ លោក ព្រំ ពិសិដ្ឋ ប្រាប់កោះសន្តិភាពតាមទូរស័ព្ទថា នៅពេលសាកសួរជនសង្ស័យ(អតីតភិក្ខសង្ឃ)បានបដិសេធថា មិនបានរំលោភក្មេងស្រីរូបនេះទេ…
ខេត្តបន្ទាយមានជ័យ ៖ អធិការរងនគរបាលក្រុងប៉ោយប៉ែត ទទួលផែនព្រហ្មទណ្ឌ លោក ព្រំ ពិសិដ្ឋ ប្រាប់កោះសន្តិភាពតាមទូរស័ព្ទថា នៅពេលសាកសួរជនសង្ស័យ(អតីតភិក្ខសង្ឃ)បានបដិសេធថា មិនបានរំលោភក្មេងស្រីរូបនេះទេ ប៉ុន្តែទទួលស្គាល់ថា បានយកដៃលូកលេងប្រដាប់ភេទនាង២ដង ។ ក្រោយពីសាកសួរចប់ ជនសង្ស័យក៏ត្រូវបានកសាងសំណុំរឿងបញ្ជូនបន្តទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធី ។ ចំណែកក្មេងស្រីរងគ្រោះ សមត្ថកិច្ចក៏បានអះអាងដែរថា នឹងនាំទៅឱ្យគ្រូពេទ្យធ្វើកោសល្យវិច័យ ដើម្បីរកការពិតផងដែរ ។
គួររំលឹកថា ភិក្ខុសង្ឃមានវ័យចំណាស់មួយអង្គនេះ បានត្រូវម្តាយក្មេងស្រីដាក់ពាក្យបណ្តឹងពីបទចាប់រំលោភកូនស្រីគាត់អាយុ១២ឆ្នាំចំនួន២ដង កាលពីរសៀលថ្ងៃទី២៨ ឧសភា នៅផ្ទះស្ថិតក្នុងសង្កាត់និមិត្ត ក្រុងប៉ោយប៉ែត ។ សង្ឃជាប់ចោទពីបទបារាជិកនេះ នាម នុត តាំងអឿនព្រះជន្ម៦១ឆ្នាំ គង់នៅវត្តនិមិត្តសុធីរាម ហៅវត្តកូនដំរី ស្ថិតក្នុងសង្កាត់និមិត្ត ក្រុងប៉ោយប៉ែត ។
តាមប្រភពព័ត៌មានឱ្យដឹងថា នៅថ្ងៃទី៣១ ឧសភា ភិក្ខុសង្ឃជាប់ចោទត្រូវបាននគរបាលក្រុងប៉ោយប៉ែត នាំទៅសាកសួរនៅអធិការដ្ឋាននគរបាលក្រុង ហើយនៅពេលនោះគេ ក៏ឃើញគ្រួសារក្មេងស្រីរួមមានជីតា និងម្តាយនាងផងដែរ ។ ជីតាក្មេងស្រីនិយាយថា កាលពីព្រលប់ថ្ងៃទី៣០ ខែឧសភា ភិក្ខុសង្ឃខាងលើបាននិមន្តទៅផ្ទះគាត់ម្តងទៀត ក្រោយពីបែកធ្លាយរឿងអាស្រូវចាប់រំលោភចៅស្រីគាត់ ដោយព្យាយាមអង្វរសុំធ្វើការសម្របសម្រួលជាមួយឪពុកម្តាយដោយសន្យាឲ្យដី១០រ៉ៃនៅស្រុកស្វាយចេក និងប្រាក់៥ម៉ឺនបាតផ្សេងទៀត តែឲ្យនៅពេលដែលរកបាន ។
ជីតាក្មេងស្រីនិយាយទៀតថា ប៉ុន្តែគាត់មិនទុកចិត្តទេ ព្រោះភិក្ខុសង្ឃនេះ ធ្វើខុសវិន័យធ្ងន់ធ្ងរ បារាជិកដោយសារភាពថា បានរំលោភចៅស្រី ទើបប្តឹងទៅអាជ្ញាធរនិងកម្លាំងប្រជាការពារភូមិ ឃាត់ភិក្ខុអង្គនេះប្រគល់ឲ្យនគរបាលប៉ុស្តិ៍សង្កាត់និមិត្ត ។ លុះនៅព្រឹកថ្ងៃទី៣១ ខែឧសភា ក៏នាំភិក្ខុសង្ឃជាប់ចោទទៅអធិ ការដ្ឋាននគរបាលក្រុងប៉ោយប៉ែត ដើម្បីសាកសួរបន្ត ។
ក្មេងស្រីរងគ្រោះបានប្រាប់កោះសន្តិភាពថា ភិក្ខុសង្ឃខាងលើបានរំលោភនាង២ដង នារសៀលថ្ងៃទី២៨ ខែឧសភានោះ ខណៈឪពុកម្តាយនាងមិននៅផ្ទះ ។ អ្នកយកព័ត៌មានបានព្យាយាមសុំការបំភ្លឺពីភិក្ខុសង្ឃអង្គនេះដែរ តែបានបដិសេធមិនធ្វើការបំភ្លឺទេ ហើយក៏ចូលទៅក្នុងបន្ទប់ធ្វើការរបស់នគរបាលបាត់ទៅ ។ នាងបន្តថា ដំបូងនៅម៉ោងប្រហែលជាង១២ថ្ងៃត្រង់ ក្រោយពីនាងមកពីសាលារៀនកំពុងអង្គុយលេងនៅក្រោមផ្ទះជាមួយប្អូនស្រីជីដូនមួយ ស្រាប់តែភិក្ខុសង្ឃខាងលើទៅដល់ហើយឲ្យប្រាក់ទៅប្អូនស្រីជីដូនមួយដើម្បីទិញនំហូប រួចឆ្លៀតឱកាសចាប់នាងរំលោភបានម្តង ។
លុះនៅម៉ោងជាង២រសៀលថ្ងៃដដែល ភិក្ខុសង្ឃខាងលើបានលួងលោមនាងរំលោភនៅក្បែរជញ្ជាំងផ្ទះម្តងទៀត ។ នាងនិយាយថា លោកតានេះតែងតែទៅលេងផ្ទះនាងញឹកញាប់រយៈពេល២ខែហើយ និងឲ្យលុយនាងចាយស្ទើររាល់ថ្ងៃ ដែលពេលខ្លះ៣ម៉ឺនរៀល ពេលខ្លះ៤ម៉ឺនរៀល មិនតែប៉ុណ្ណោះទិញទូរស័ព្ទឲ្យនាង២គ្រឿងទៀតផង ។
ទីបំផុត ព្រះអនុគណក្រុងប៉ោយប៉ែតនាម ប៉ុក ចំរើន និងមន្ត្រីសង្ឃជាច្រើនអង្គទៀត ក៏បាននិមន្តទៅកាន់អធិការដ្ឋាននគរបាលក្រុងប៉ោយប៉ែតដែរ ។ លុះប្រមាណជិតកន្លះម៉ោងក្រោយមក ក៏ឃើញនាំភិក្ខុសង្ឃជាប់ចោទទៅកាន់វត្តរតនារាមផ្សារកណ្តាល ស្ថិតក្នុងសង្កាត់ផ្សារកណ្តាល ក្រុងប៉ោយប៉ែត ដែលអមដោយសមត្ថកិច្ចការពារ ដើម្បីផ្សឹកនិងប្រគល់ឲ្យសមត្ថកិច្ចចាត់ការតាមផ្លូវច្បាប់ ។ (សម្រួលដោយ៖ ស្រីណា)
ចែករំលែកព័តមាននេះ