សហរដ្ឋអាមេរិក-ម៉ិកស៊ិក ៖ ប្រធានាធិបតីអាមេរិក លោកដូណាល់ត្រាំកាលពីថ្ងៃទី៣០ឧសភា បានសម្រេចប្រើមធ្យោបាយធំៗ ប្រឆាំងម៉ិកស៊ិក ដោយចោទប្រកាន់ប្រទេសនោះថាទន់ជ្រាយ លើសំណុំរឿងអន្ដោប្រវេសន៍លួចលាក់ ដោយចាប់ពីថ្ងៃទី១០មិថុនាទៅលោកនឹងយកពន្ធគយលើបណ្ដាផលិតផលមកពីម៉ិកស៊ិកជិតខាង។ លោកត្រាំប្រកាសថា…
សហរដ្ឋអាមេរិក-ម៉ិកស៊ិក ៖ ប្រធានាធិបតីអាមេរិក លោកដូណាល់ត្រាំកាលពីថ្ងៃទី៣០ឧសភា បានសម្រេចប្រើមធ្យោបាយធំៗ ប្រឆាំងម៉ិកស៊ិក ដោយចោទប្រកាន់ប្រទេសនោះថាទន់ជ្រាយ លើសំណុំរឿងអន្ដោប្រវេសន៍លួចលាក់ ដោយចាប់ពីថ្ងៃទី១០មិថុនាទៅលោកនឹងយកពន្ធគយលើបណ្ដាផលិតផលមកពីម៉ិកស៊ិកជិតខាង។
លោកត្រាំប្រកាសថា សហរដ្ឋអាមេរិកនឹងបង្កើតពន្ធគយ៥%លើគ្រប់ផលិតផលមកពីម៉ិកស៊ិក និងថាពន្ធគយនោះនឹងដំឡើងជាបន្តបន្ទាប់ បើដរាបណាបញ្ហាអន្ដោប្រវេសន៍លួចលាក់ពុំត្រូវបានដោះស្រាយទេនោះ។ ក្នុងសេចក្ដីប្រកាសមួយចេញផ្សាយដោយសេតវិមានលោកត្រាំបញ្ជាក់ថា ពន្ធគយអាចដំឡើងដល់១០%ចាប់ពីថ្ងៃទី១កក្កដាទៅ និងរហូតដល់២៥%ក្នុងខែតុលាប្រសិនបើម៉ិកស៊ិក ពុំបញ្ឈប់ឲ្យបានច្រើនបំផុតការហូរចូលនៃជនបរទេសមិនស្របច្បាប់ កាត់តាមព្រំដែនខ្លួនទេនោះ។ សហរដ្ឋអាមេរិករក្សាសិទ្ធិដកយកពន្ធទាំងនេះ។
ប្រធានាធិបតីម៉ិកស៊ិកលោកANDRES MANUEL LOPEZ OBRADOR ក្នុងសារលិខិតមួយច្បាប់ផ្ញើជូនលោកត្រាំ បានស្នើចរចាដោយលោកថា ខ្ញុំចង់ជំរាបលោកថាខ្ញុំពុំចង់បានការប្រឈមមុខដាក់គ្នាឡើយ ខ្ញុំស្នើធ្វើការចរចាដោយស៊ីជម្រៅស្វែងរកច្រកចេញនានា ចំពោះបញ្ហាអន្តោប្រវេសន៍។
ការប្រកាសនោះរបស់អាមេរិក នាពេលមុននេះត្រូវបានម៉ិកស៊ិកចាត់ទុកថាជាគ្រោះមហន្តរាយ។ លោកJESUS SEADE អ្នកទទួលខុសត្រូវម្នាក់នៃក្រសួងការបរទេសម៉ិកស៊ិកទទួលបន្ទុកអាមេរិកខាងជើង និងជាអ្នកចរចាពាណិជ្ជកម្ម៉ិកស៊ិកថ្លែងថា ប្រសិនបើបែបនេះយើងត្រូវមានប្រតិកម្មម៉ឺងម៉ាត់បំផុត។
លោកត្រាំមុននេះនាថ្ងៃទី៣០ឧសភាដែរថ្លែងថា លោកចង់ធ្វើការប្រកាសចម្បងមួយស្ដីពីព្រំដែនរវាងអាមេរិកនិងម៉ិកស៊ិក ដោយលោកបញ្ជាក់ថានឹងមិនបញ្ជាឲ្យបិទព្រំដែន ដូចលោកធ្លាប់គំរាមជាច្រើនលើករយៈពេលប៉ុន្មានខែចុងក្រោយនេះឡើយ។
នៅមុខក្រុមអ្នកកាសែតលោកត្រាំពោលថា យើងនឹងធ្វើអ្វីដែលពិតជាគួរឲ្យភ្ញាក់ផ្អើលស្ដីពីព្រំដែន។ សមាជិកមួយចំនួននៃរដ្ឋាភិបាលរបស់លោកត្រាំ បានប្រឆាំងនឹងការយកពន្ធគយជាអាវុធមួយរបស់លោក លើបណ្ដាផលិតផលម៉ិកស៊ិក ដោយខ្លាចការសម្រេចនេះរាំងស្ទះដល់ដំណើរការ នៃការផ្ដល់សច្ចាប័នលើកិច្ចព្រមព្រៀងផ្លាស់ប្ដូរសេរី រវាងអាមេរិក ម៉ិកស៊ិកនិងកាណាដា៕ (កែសម្រួលដោយ ៖ បុប្ផា)
ចែករំលែកព័តមាននេះ