ប្រទេសម៉ាឡេស៊ី ៖ បន្ទាប់ពីហ្វ៊ីលីពីន ម៉ាឡេស៊ីបានស្នើដល់កាណាដា ឲ្យប្រមូលកាកសំណល់ដែលខ្លួនបញ្ជូនមកតាមកុងតឺន័រយកទៅវិញ។ មុននេះបញ្ហាកាកសំណល់កាណាដានៅហ្វ៊ីលីពីន នាំឲ្យផ្ទុះសង្គ្រាមការទូតរវាងក្រុងម៉ានីលនិងក្រុងអូតាវ៉ា។ មុខមាត់កាណាដាជាអ្នកបញ្ចេញកាកសំណល់ធំបំផុតមួយ បានស្រអាប់នៅអាស៊ីអាគ្នេយ៍។ ខណៈជិតដល់យុទ្ធនាការឃោសនាបោះឆ្នោតនាពេលខាងមុខនេះ…
ប្រទេសម៉ាឡេស៊ី ៖ បន្ទាប់ពីហ្វ៊ីលីពីន ម៉ាឡេស៊ីបានស្នើដល់កាណាដា ឲ្យប្រមូលកាកសំណល់ដែលខ្លួនបញ្ជូនមកតាមកុងតឺន័រយកទៅវិញ។ មុននេះបញ្ហាកាកសំណល់កាណាដានៅហ្វ៊ីលីពីន នាំឲ្យផ្ទុះសង្គ្រាមការទូតរវាងក្រុងម៉ានីលនិងក្រុងអូតាវ៉ា។ មុខមាត់កាណាដាជាអ្នកបញ្ចេញកាកសំណល់ធំបំផុតមួយ បានស្រអាប់នៅអាស៊ីអាគ្នេយ៍។
ខណៈជិតដល់យុទ្ធនាការឃោសនាបោះឆ្នោតនាពេលខាងមុខនេះ នាយករដ្ឋមន្ត្រីកាណាដាលោកJUSTIN TRUDEAU ពុំចង់ឲ្យមានប្រវត្តិនៃកាកសំណល់ ប៉ះពាល់ដល់មុខមាត់របស់លោក ជាមេដឹកនាំបៃតងនិងចម្រើនជឿនលឿនឡើយ។ ប៉ុន្តែនោះវាជាប្រវត្តិមួយដែលតាមពិត កើតមានតាំងពីមុនពេលលោកឡើងកាន់អំណាចកាលពីឆ្នាំ២០១៥ទៅទៀត។ រវាងពីឆ្នាំ២០១៣មក២០១៤កាកសំណល់តាមផ្ទះ យ៉ាងតិច១០៣កុងតឹន័រត្រូវបានបញ្ជូនពីកាណាដាមកកាន់ហ្វ៊ីលីពីន។ កាកសំណល់ទាំងនេះមានជាពិសេសសំបកដប និងថង់ប្លាស្ទិកដែលអាចយកមកកែច្នៃបាន ក្រដាសកាសែតនិងរបស់របរចាស់ៗ។
ចាប់តាំងពីពេលនោះមកកុងតឺន័រកាកសំណល់ភាគច្រើន ស្ថិតក្នុងកំពង់ផែនានានៃក្រុងម៉ានីលនិងក្រុងស៊ូប៊ិក ដែលនាំឲ្យផ្ទុះបាតុកម្មនានា។ ដោយមិនសប្បាយចិត្ត បណ្ដាក្រុមការពារបរិស្ថានទាមទារឲ្យបញ្ជូនកាកសំណល់ទាំងនេះ ទៅកាន់ប្រទេសដើមវិញដោយរុះរាន់។ ប្រឈមមុខនឹងសភាពការណ៍នោះ ប្រធានាធិបតីហ្វ៊ីលីពីន លោកRODRIGO DUTERTE បានគំរាមកាណាដា បញ្ជូនកាកសំណល់ទៅប្រទេសដើមវិញ ហើយលោករហូតដល់និយាយថាគិតដឹកកុងតឺន័រកាកសំណល់ ទៅគរចោលនៅមុខស្ថានទូតកាណាដាប្រចាំក្រុងម៉ានីលផង។
លើសពីនេះទៅទៀតលោកគំរាមធ្វើសង្គ្រាមជាមួយកាណាដាទៀតផង។ លោកអះអាងកាលពីខែមេសាមុនថា ខ្ញុំនឹងប្រកាសសង្គ្រាម។ ខ្ញុំនឹងបញ្ជូនកាកសំណល់ទាំងនោះទៅវិញ។ ចូលដាក់លើនាវាមួយ ហើយខ្ញុំបាននិយាយប្រាប់កាណាដាថា សម្រាមរបស់គេកំពុងតែបញ្ជូនទៅវិញហើយ។ យកវាទៅសីុវិញទៅបើចង់បាន។
បន្ទាប់ពីនេះក្រុងម៉ានីលបានហៅបុគ្គលិកការទូតរបស់ខ្លួន ឲ្យចាកចេញពីកាណាដាមកកាន់ប្រទេសវិញ។ រដ្ឋាភិបាលហ្វ៊ីលីពីនយល់ថា ក្រុងអូតាវ៉ាពុំគោរពកាលបរិច្ឆេទនៃការប្រមូលកាកសំណល់យកទៅវិញ ដែលមួយចំនួនបញ្ជូនមកដោយខុសច្បាប់។
រួចនាពេលថ្មីៗនេះដល់វេនម៉ាឡេស៊ីម្ដង ដែលស្នើដល់កាណាដា ឲ្យប្រមូលកាកសំណល់របស់ខ្លួនត្រឡប់ទៅវិញ។ ក្រុងគូឡាឡាំពួរមានបំណងបញ្ជូនកាកសំណល់ប្លាស្ទិក៣០០០តោនទៅកាណាដា សហរដ្ឋអាមេរិក អង់គ្លេស អូស្ត្រាលីនិងបារាំងវិញ។ រដ្ឋមន្ត្រីបរិស្ថានម៉ាឡេស៊ី លោកស្រីYEO BEE YINអះអាងថា លោកស្រីចង់ចៀសវាង កុំឲ្យប្រទេសលោកស្រីក្លាយជាកន្លែងស្តុកសម្រាមសម្រាប់បណ្ដាប្រទេសអ្នកមាន។
លោកស្រីបន្តថាយើងស្នើដល់បណ្ដាប្រទេសអភិវឌ្ឍន៍ ឲ្យឈប់បញ្ជូនកាកសំណល់មកកាន់ប្រទេសយើង។ យើងនឹងបញ្ជូនដោយពុំប្រណីទៅប្រទេសដើមវិញ។ ម៉ាឡេស៊ីពុំមែនជាធុងសម្រាមពិភពលោកទេ។ យើងនឹងមិនលុះទៅតាមការសំឡុតរបស់បណ្ដាប្រទេសរីកចម្រើនឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ