រាជធានីភ្នំពេញ ៖ នៅឆ្នាំ២០៣០ខាងមុខនេះ ប្រជាពលរដ្ឋប្រមាណ៣០% នៅលើកពិភពលោកនឹងប្រឈមហានិភ័យនៃការផ្លាស់ប្តូរ ឬបាត់បង់ការងារ ដោយសារបដិវត្តន៍ផ្នែកឧស្សាហកម្ម ។ នេះបើតាមមន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ ។
លោក ពេជ សោភ័ន រដ្ឋលេខាធិការក្រសួងបណ្តុះបណ្តាល វិជ្ជាជីវៈបានលើកឡើងក្នុងសន្និសីទសារព័ត៌ស្តីពីទិវាទការអប់រំបណ្តុះបណ្តាលបច្ចេកទេស និងវិជ្ជាជីវៈលើកទី២ ក្រោមប្រធានបទ «TVET អាចធ្វើបាន» នាព្រឹកថ្ងៃទី៣១ ឧសភា នៅទីស្តីការក្រសួងថា តាមការស្រាជ្រាវរបស់វិទ្យាស្ថានអន្តរជាតិបានរកឃើញថា នៅឆ្នាំ២០៣០ខាងមុខនេះ ប្រពលរដ្ឋប្រមាណ៣០% នៅលើកពិភពលោកនឹងប្រឈមហានិភ័យនៃការផ្លាស់ប្តូរ ឬបាត់បង់ ការងារ ហើយអ្នកដែលប្រឈមខ្លាំងនោះ គឺអ្នកដែលទទួលបានការអប់រំទាបជាងគេ ។
ជាមួយគ្នានោះដែរលោក ពេជ សោភ័ន ក៏បានលើកឡើងថា បដិវត្តន៍ឧស្សាហកម្ម៤.០នឹងធ្វើឲ្យមានការប្រែប្រួលការងារនៅលើពិភពលោក ។ ជាក់ស្តែងនៅពេលកន្លងមកនេះអង្គការ ILO បានបង្ហាញរបាយការណ៍ដោយបានប៉ាន់ប្រមាណថា នៅរយៈពេល២០ឆ្នាំខាងមុខនេះ ពាក់កណ្តាលពលករ៥ប្រទេស (កម្ពុជា ,វៀតណាម ,ថៃ ឥណ្ឌូនេស៊ី ភីលីពីន) ក្នុងនោះក៏មានកម្ពុជាដែរ ដែលមានប្រមាណ១៣០លាននាក់នឹងប្រឈមហានិយភ័យនៃការបាត់បង់ការងារ ដោយសារបដិវត្តន៍ឧស្សាហកម្ម៤.០ ។
បដិវត្តន៍ឧស្សាហកម្មនេះនឹងនឹងធ្វើឲ្យដំណើរការនៃផលិកម្មនៅតាមបណ្តារោងចក្រទាំងអស់ប្រែក្លាយពីការប្រើប្រាស់កម្លាំងពលកម្មដោយមនុស្សទៅជាប្រើយន្តការស្វ័យប្រវត្តិកម្ម ឬកម្លាំងគ្រឿងយន្ត ។ លោកបន្ថែមថា ILO ក៏បានប៉ាន់ស្មានថា ប្រសិនបើគ្មានប្រែប្រួលផលប៉ះពាល់កម្ពុជាក៏អាចនឹងប៉ះពាល់៥៧ភាគរយនៃរយៈពេល២០ ឆ្នាំខាងមុខនេះផងដែរ ។ ដូច្នេះនេះជាកត្តាមួយដែលរយើងត្រូវដោះស្រាយបញ្ហាទាំងនេះដែលចាំបាច់នោះយើងត្រូវពង្រឹងវិស័យអប់រំបណ្តុះបណ្តាលបច្ចេកទេសវិជ្ជាជីវៈនេះ ។ ជាក់ស្តែងនៅប្រទេសគេកំពុងធ្វើកំណែទម្រង់វិស័យនេះ ដើម្បីដើរឲ្យទាន់បដិវត្តន៍៤.០នេះ ។
លោកក៏បានលើកពីប្រទេសថៃថា រាជរដ្ឋាភិបាលថៃមានគោលដៅ គឺធ្វើឲ្យរោងចក្រពាក់កណ្តាលនៃរោងចក្រផលិតកម្ម ឬក៏កម្មន្តសាលឲ្យក្លាយជារោងចក្រប្រើប្រាស់ ដោយគ្រឿងចក្រស្វ័យប្រវត្តិ នៅរយៈពេល៥ឆ្នាំខាងមុខនេះ ។ ការប្រែប្រួលនេះដែរ បានធ្វើឲ្យទីផ្សារនៅពលកម្មនៅប្រទេសថៃក៏បានជួបបញ្ហាប្រឈមដែរ ជាក់ស្តែងនោះត្រូវបានសារព័ត៌មានបាំងកកប៉ុស្តិ៍បានផ្សាយថា នៅឆ្នាំ២០១៩នេះ មានពលករថៃប្រហែលជា៤០ម៉ឺនទៅ៥០ម៉ឺននាក់ ក្នុងចំណោមពលករ៣៨លាននាក់នឹងប្រឈមនឹងហានិភ័យក្នុងការផ្លាស់ប្តូរមុខរបការងារ ។ លោកបញ្ជាក់ថា ៖«អាឡូវរោងចក្រមួយចំនួនគេផ្លាស់ប្តូរពីការប្រែប្រួលតាមគ្រឿងចក្រ ដែលប្រើមនុស្សទៅជាប្រើស្វ័យប្រវត្តិកម្ម (គ្រឿងយន្ត) ។ ហើយគេបានទស្សទាយឆ្នាំនេះ អត្រាគ្មានការងារធ្វើនៅថៃ១.៣% ដែលឆ្នាំ២០១៨មាន១% ។ ក្នុងនោះសិស្សដែលកំពុងរៀនផ្នែកបច្ចេកទេសបណ្តុះបណ្តាលវិជ្ជាជីវៈក៏ប៉ះពាល់ផងដែរប្រសិនបើគ្មានការកែទម្រង់ផ្នែក TVET នេះ ។ ហើយសិស្សប្រមាណ៣០%ប៉ុណ្ណោះនឹងមានការងារធ្វើ » ។
លោកបន្តការបញ្ហាដែលនឹងប៉ះពាល់នៅពេលខាងមុខនេះកម្ពុជាក៏បានយកទុកដាក់ផងដែរ ដោយបានជំរុញមានការបណ្តុះបណ្តាលបច្ចេកវិជ្ជាជីវៈរហូតដល់មានទិវាជាតិប្រចាំឆ្នាំស្តីពីទិវាជាតិការអប់រំបណ្តុះបណ្តាលបច្ចេកទេស និងវិជ្ជាជីវៈក្រោមប្រធានបទ«TVETអាចធ្វើបាន»ផងដែរ ។ ទិវាបណ្តុះបណ្តាលបច្ចេកទេសវិជ្ជាជីវៈនេះ គឺជាឱកាសមួយក្នុងការផ្សព្វផ្សាយព័ត៌មានពាក់ព័ន្ធនឹងការអប់រំបណ្តុះបណ្តាលបច្ចេកទេសវិជ្ជាជីវៈនេះផងដែរ ។ លោកបន្ថែមទិវាស្តីពីការងារ និងបណ្តុះបណ្តាល និងធ្វើជាលើកទី២នៅថ្ងៃទី១៥ ,១៦ខែមិថុនា ឆ្នាំ២០១៩នៅមជ្ឈមណ្ឌលពិរណ៌ពាណិជ្ជកម្មកោះពេជ្រ៕ កែសម្រួលដោយ ៖ សុឃាក់
ចែករំលែកព័តមាននេះ