រាជធានីភ្នំពេញ៖ ប្រភពព័ត៌មានជាក់លាក់មួយបានធ្លាយចេញពីសមត្ថកិច្ចឲ្យដឹងថា ប៉ុន្មានថ្ងៃនេះ មានបុរសជនជាតិចិនម្នាក់(ជាប្តី) របស់ស្ត្រីជាប់សង្ស័យឈ្មោះ WU YUEQIN អាយុ៣៧ឆ្នាំ បាននិងកំពុងសហការ ជាមួយមេធាវីរត់ការដោះលែងប្រពន្ធ ដែលកំពុងជាប់ឃុំក្នុងពន្ធនាគារ ក្រោយនាងជាប់ពាក់ព័ន្ធការផលិតគ្រឿងញៀនជាង២០០គីឡូក្រាម ដែលត្រូវសមត្ថកិច្ចមន្ទីរប្រឆាំងគ្រឿងញៀនបង្ក្រាបនៅកណ្តាលរាជធានីភ្នំពេញ ។
សូមរំលឹកថា ជនសង្ស័យខាងលើ ឈ្មោះ WU YUEQIN ភេទស្រី ត្រូវបានកម្លាំងសមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃ ស្រាវជ្រាវនិងឃាត់ខ្លួន ក្រោយប្រតិបត្តការបង្ក្រាបទីតាំងផលិតគ្រឿងញៀនដ៏ធំមួយ ស្ថិតនៅផ្ទះជួលលេខ២៨៥ AE០ ផ្លូវ ៣៧១ សង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីថ្ងៃទី២ ខែមេសា ឆ្នាំ២០១៩ ។
ខណៈពេលសមត្ថកិច្ចចូលទៅឆែកឆេរក្នុងទីតាំងនោះ មិនបានរកឃើញជនសង្ស័យណាម្នាក់ទេ ដែលអាចចាត់ទុកថា ប្រហែលជាពួកគេបានដឹងមុន ហើយនាំគេចខ្លួនបាត់អស់ ។ ទោះបីម្ចាស់ទីតាំងឬក៏អ្នកផលិតគេចខ្លួនបាត់ក្តី នីតិវិធីរបស់សមត្តកិច្ចនៅតែបន្តអនុវត្តទៅមុខជានិច្ច រហូតបានរកឃើញថ្នាំញៀនដែលផលិតរួច ប្រភេទពីរ៉ូវ៉ាឡេរ៉ូន ទម្ងន់២០០,២គីឡូក្រាម (ពីររយពីឡូក្រាម) និងម្សៅជាសារធាតុផ្សំសម្រាប់ផលិតទៅជាថ្នាំញៀនទម្ងន់ប្រមាណ៥៨៧,៥គីឡូក្រាម រួមទាំងឧបករណ៍ផលិតមួយឈុតធំទៀតផង ។ វត្ថុតាងត្រូវបានសមត្តកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ។
បន្ទាប់មកសមត្តកិច្ចក៏បានទទួលដីកា បង្គាប់ឲ្យចាប់ខ្លួនឈ្មោះ WU YUEQIN ភេទស្រី អាយុ៣៧ឆ្នាំ ពីបទផលិតដោយខុសច្បាប់នូវសារធាតុញៀន តាមមាត្រា៤៧ នៃច្បាប់ស្តីពីការត្រួតពិនិត្យគ្រឿងញៀន ប្រព្រឹត្តនៅចំណុចផ្ទះជួលលេខ២៨៥ ផ្លូវ៣៧១ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
រយៈពេលប្រមាណ១ខែក្រោយមក ជនសង្ស័យក៏ត្រូវបានចាប់ខ្លួន ហើយចៅក្រមស៊ើបសួរលោក ពេជ្រ វិជ្ជាធរ ក៏បានសម្រេចចេញដីការឃុំខ្លួនជនសង្ស័យ នៅថ្ងៃទី៣ ខែឧសភា ដាក់ពន្ធនាគារជាបណ្តោះអា
សន្ន ។
លុះមកដល់ពេលនេះសំណុំរឿងផលិតគ្រឿងញៀនដ៏ធំនៅក្នុងរាជធានីភ្នំពេញនេះ សមត្តកិច្ចតុលាការមិនទាន់បើកការស៊ើបអង្កេត ឲ្យបានគ្រប់ជ្រុងជ្រោយផង ស្រាប់តែធ្លាយព័ត៌មានប្តីស្ត្រីជនជាតិចិន ដឹកដៃមេធាវីចុះឡើង សង្ស័យរត់ការដោះលែងស្ត្រីកំពុងជាប់ឃុំរឿងផលិតគ្រឿងញៀននោះ ។ (សម្រួលដោយ៖ ស្រីណា)
ចែករំលែកព័តមាននេះ