គ.ជ.ប ផ្ទៀងផ្ទាត់លទ្ធផលបោះឆ្នោតឡើងវិញ
- ភ្នំពេញ
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានធ្វើការផ្ទៀងផ្ទាត់លទ្ធផលបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ឡើងវិញ…
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានធ្វើការផ្ទៀងផ្ទាត់លទ្ធផលបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ឡើងវិញ…
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានធ្វើការផ្ទៀងផ្ទាត់លទ្ធផលបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ឡើងវិញ មុនចេញផ្សាយលទ្ធផល បណ្តោះអាសន្ន នៅថ្ងៃទី៣១ ខែឧសភា និងឈានទៅប្រកាសលទ្ធផលផ្លូវការនៅថ្ងៃទី៨ ខែមិថុនា ។
លោក នុត សុខុម អនុប្រធាន គ.ជ.ប បានថ្លែងប្រាប់អ្នកសារព័ត៌មានបែបនេះ កាលពីថ្ងៃទី៣០ ខែឧសភា ពេលគណៈកម្មការជំនាញរបស់ គ.ជ.ប កំពុងធ្វើការត្រួតពិនិត្យផ្ទៀងផ្ទាត់លទ្ធផលនៃការបោះឆ្នោតជ្រើស រើសក្រុមប្រឹក្សាអាណត្តិទី៣ ដោយមានការចូលរួមពីតំណាងគណបក្សនយោបាយ អ្នកសង្កេតការណ៍ជាតិ និងប្រព័ន្ធផ្សព្វផ្សាយ ។
លោកបន្តថា នៅព្រឹកថ្ងៃទី៣០ ខែឧសភា ត្រួតពិនិត្យផ្ទៀងផ្ទាត់ឡើងវិញនេះដើម្បីបញ្ជាក់ពីភាពត្រឹមត្រូវនូវលទ្ធផលបណ្តោះអាសន្ននៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ដែលគណៈកម្មការរាជធានី ខេត្ត រៀបចំការបោះឆ្នោតបានបញ្ជូនមកដល់ គ.ជ.ប ។ លោក នុត សុខុម ថ្លែងទៀតថា រយៈពេល២ថ្ងៃបន្ទាប់ពីថ្ងៃបោះឆ្នោត និងរាប់សន្លឹកឆ្នោត និងថ្ងៃបិទផ្សាយលទ្ធផលបណ្តោះ អាសន្ននៃការបោះឆ្នោតនៅការិយាល័យបោះឆ្នោតពាក់ព័ន្ធ គឺគណៈកម្មការរាជធានី ខេត្ត រៀបចំការបោះឆ្នោតទាំង២៥ ក៏ដូចជា គ.ជ.ប ពុំបានទទួលពាក្យបណ្តឹងណាមួយឡើយ ខណៈដំណើរការបោះឆ្នោតជ្រើសរើសក្រុមប្រឹក្សាអាណត្តិទី៣ ដែលបានប្រព្រឹត្តទៅកាលពីថ្ងៃទី២៦ ខែឧសភា បានប្រព្រឹត្តទៅដោយរលូន គ្មានការរាំងស្ទះ គ្មានអំពើហិង្សា គ្មានការគំរាមកំហែង ស្ថិតក្នុងបរិយាកាសសន្តិសុខ និងសណ្តាប់ធ្នាប់ល្អ ។
លោក ឆុំ ចាន់ថន តំណាងគណបក្សយុវជនកម្ពុជា បានគាំទ្រចំពោះការត្រួតពិនិត្យ ផ្ទៀងផ្ទាត់លទ្ធផលនៃការបោះឆ្នោតជ្រើសរើសក្រុមប្រឹក្សាអាណត្តិទី៣នេះ ដោយលោកថ្លែងថា ជា ការបង្ហាញពីភាពត្រឹមត្រូវ តម្លាភាព និងអព្យាក្រឹតភាពរបស់ គ.ជ.ប បើទោះបីជាគណបក្សខ្លួនពុំបានទទួលបានសំឡេងក្នុងការទទួលបានអាសនៈជាសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ សម្រាប់អាណត្តិទី៣នេះក៏ដោយ ។ លោក ជា អៀង តំណាងអង្គការសង្គមសុី វិល ដែលចូលរួមឃ្លាំមើលដំណើរការត្រួតពិនិត្យផ្ទៀងផ្ទាត់ លទ្ធផលឡើងវិញនេះ កត់សម្គាល់ថា សំឡេងឆ្នោតនៅតាមមណ្ឌលបោះឆ្នោតដែលធ្វើការផ្ទៀងផ្ទាត់ឡើងវិញនេះ មិនមានការប្រែប្រួលផ្ទុយពីលទ្ធផលដែលត្រូវបានប្រកាសបឋមនោះឡើយ ។
យោងតាមលទ្ធផលបឋមរបស់ គ.ជ.ប ដែលចេញផ្សាយកាលពីយប់ថ្ងៃទី២៦ ខែឧសភា បានបង្ហាញថា គណបក្សប្រជាជនកម្ពុជាអាចគ្រប់គ្រងអាសនៈសមាជិកក្រុមប្រឹក្សារាជធានី ខេត្ត ទាំង៥៥៩អាសនៈ និងសមាជិកក្រុមប្រឹក្សាក្រុង ស្រុក ខណ្ឌ ទាំង៣.៥៥៥អាសនៈ ខណៈគណបក្សនយោបាយ៦ទៀត ដែលចូលរួមប្រកួតនៅតាមមណ្ឌលទាំង២៥រាជធានី ខេត្ត និងក្រុង ស្រុក ខណ្ឌ សរុប២០៣ ទទួលបានសំឡេងឆ្នោតមិនគ្រប់ចំនួនដើម្បីទទួលបានអាសនៈទេ ។
គួររំឭកថា គណបក្សនយោបាយដែលចូល រួមការបោះឆ្នោតអសកលនេះ កាលពីថ្ងៃទី២៦ ខែឧសភា ឆ្នាំ២០១៩ មាន គណបក្សប្រជាជនកម្ពុជា គណបក្សសញ្ជាតិកម្ពុជា គណបក្សហ្វុ៊នស៊ិនប៉ិច គណបក្សខ្មែររួបរួមជាតិ គណបក្សយុវជនកម្ពុជា គណបក្សឆន្ទៈខ្មែរ និងគណបក្សខ្មែរសាធារណរដ្ឋ ។ ទោះបីជាយ៉ាងណាគេដឹងថា បើតាមលទ្ធផលសំឡេឆ្នោតងបណ្តោះអាសន្ន គឺមានតែគណបក្សប្រជាជនកម្ពុជាប៉ុណ្ណោះ ដែលអាចគ្រប់គ្រងអាសនៈទាំងអស់ ៕ (សម្រួលដោយ៖ ស្រីណា)
ចែករំលែកព័តមាននេះ