ខេត្តកណ្តាល ៖ ត្រាក់ទ័រ១គ្រឿង ខណៈកំពុងបើកភ្ជួរដីស្រែមួយកន្លែងបានកិនមីនតោន១គ្រាប់ បណ្ដាលឲ្យផ្ទុះលាន់កក្រើកមេឃ ចំណែកត្រាក់ទ័របានប៉ើងខ្ទាតចេញពីស្រែ និងដាច់ជាបំណែកហោះហើរឡើងលើរប៉ាត់រប៉ាយចម្ងាយប្រមាណជាង១០០ម៉ែត្រជុំវិញកន្លែងកើតហេតុ ។ រីឯបុរសអ្នកបើកបរបានរងរបួសយ៉ាងធ្ងន់ និងត្រូវបាននគរបាលបញ្ជូនទៅកាន់គ្លីនិកដើម្បីសង្គ្រោះភ្លាមៗ ប៉ុន្តែដោយសារស្ថានភាពរបួសធ្ងន់ពេក ទើបបញ្ជូនបន្តទៅកាន់មន្ទីរពេទ្យព្រះកុសុមៈទៀត ។ អ្នកភូមិបានប្រាប់ថា តំបន់នោះគឺជាអតីតសមរភូមិក្ដៅក្នុងសម័យសង្គ្រាមដើមទសវត្សរ៍ឆ្នាំ១៩៧០ ហើយក៏ស្ថិតនៅជិតអតីតបន្ទាយលោកសេនាប្រមុខ លន់ នល់ ដែរ ។
ហេតុការណ៍នេះ កើតឡើងកាលពីវេលាម៉ោងប្រមាណ៨និង១០នាទីព្រឹកថ្ងៃទី៣០ ខែឧសភា នៅវាល
ស្រែខាងជើងវត្តសិម្ពលី ស្ថិតក្នុងភូមិចំការជោរ ឃុំពើក ស្រុកអង្គស្នួល ។ បុរសរងគ្រោះឈ្មោះ ធី ទី អាយុ៣៣ឆ្នាំ មុខរបរបើកត្រាក់ទ័រស៊ីឈ្នួលភ្ជួរដីស្រែ មានទីលំនៅក្នុងភូមិត្រពាំងខ្ទឹម ឃុំព្រាល ស្រុកកញ្ជ្រាចខេត្តព្រៃវែង ។ នេះជាលើកដំបូងហើយ ដែលវត្តមានមីនតោនបានកម្ទេចត្រាក់ទ័រនៅតំបន់ខាងលើ និងបង្កការរងរបួសដល់អ្នកបើកបរ ។ កន្លងមក ព័ត៌មានពីការកិនមីនតោនឬដើរជាន់មីននោះ មានតែនៅខេត្តភាគខាងលិចប៉ុណ្ណោះ ។
ប្រភពព័ត៌មានឲ្យដឹងថា បុរសរងគ្រោះត្រូវបានអ្នកភូមិជាច្រើននាក់ជួលឲ្យភ្ជួរដីត្រៀមធ្វើស្រែ ហើយនៅមុនកើតហេតុគាត់បានចាប់ផ្ដើមភ្ជួរដីស្រែឲ្យលោកយាយម្នាក់ឈ្មោះ ទេព សំអុល អាយុ៧១ឆ្នាំ ។ នៅពេលភ្ជួរហើយស្រែ១ទំហំជាង២០អា ក៏ចុះទៅភ្ជួរស្រែ១ទៀតដែលមានទំហំជាង៣អា និងបានភ្ជួរជិតរួចទៅហើយនៅសល់តែបន្តិចប៉ុណ្ណោះ ជាអកុសលស្រាប់តែកង់ក្រោយត្រាក់ទ័របានកិនចំមីនតោន១គ្រាប់ដែលកប់ក្នុងដីស្រែនោះ បណ្ដាលឲ្យផ្ទុះលាន់កក្រើកមេឃតែម្ដង ។
ប្រភពដដែលបន្តទៀតថា បន្ទាប់ពីឃើញទិដ្ឋភាពបែបនេះ អ្នកភូមិបាននាំគ្នារត់ទៅមើល ឃើញបុរសអ្នកបើកបរស្ថិតនៅចម្ងាយប្រហែល៥ម៉ែត្រពីត្រាក់ទ័រ រងរបួសធ្ងន់ធ្ងរដោយដាច់សាច់ភ្លៅខាងស្ដាំនិងម្រាមជើងស្ដាំ ព្រមទាំងរយះដៃស្ដាំ ។ ចំណែកត្រាក់ទ័ររងការខូចខាតយ៉ាងដំណំ ដោយដាច់កង់ក្រោយខាងស្ដាំ និងតួខាងស្ដាំជាបំណែកៗតែម្ដង ។
បន្ទាប់មក កម្លាំងនគរបាលស្រុកអង្គស្នួលបានហៅរថយន្តពេទ្យទៅដឹកបុរសរងគ្រោះទៅកាន់គ្លីនិកមួយដើម្បីសង្គ្រោះបន្ទាន់ ប៉ុន្តែដោយសារតែរបួសធ្ងន់ពេក ទើបបញ្ជូនបន្តទៅកាន់មន្ទីរពេទ្យព្រះកុសុមៈវិញ ។ ជាមួយនេះ បានទាក់ទងទៅក្រុមគ្រសារជនរងគ្រោះនៅឯខេត្ត ព្រៃវែងដើម្បីបានដឹង និងទៅមើលថែជនរងគ្រោះនៅឯមន្ទីរពេទ្យ ។ នៅពេលផ្ទុះមីនតោននោះ បុរស២នាក់ដែលស្ថិតនៅជិតនោះដែរមានសំណាងខ្លាំងណាស់ ដែលបំណែកត្រាក់ទ័រនិងគ្រាប់ហោះពេញមេឃតែមិនត្រូវបណ្ដាលឲ្យមានគ្រោះថ្នាក់ ។
អ្នកភូមិនិយាយថា តំបន់នោះសម្បូរគ្រាប់ណាស់ ព្រោះកាលពីអំឡុងទសវត្សរ៍ឆ្នាំ១៩៧០ដល់ឆ្នាំ១៩៧៥ ទីនោះគឺជាអតីតសមរភូមិក្ដៅជាទីលានប្រយុទ្ធគ្នាសុីសាច់ហុតឈាមរវាងកង ទ័ពលោកសេនាប្រមុខ
លន់ នល់ និងកងទ័ពខ្មែរក្រហម ។ នៅពេលនោះក៏មានប្រើកាំភ្លើងគ្រប់ប្រភេទ តាំងពីកាំភ្លើងដៃរហូត
ដក់កាំភ្លើងផ្លោង ជាពិសេសមានទាំងរថក្រោះរាប់សិបគ្រឿងថែមទៀតផង ។ សូម្បីតែវត្តសិម្ពលីដែលស្ថិត
នៅជិតនោះក៏រងការខ្ទេចខ្ទាំដែរ មិនតែប៉ុណ្ណោះ ទីនោះស្ថិតនៅជិតអតីតបន្ទាយទ័ព លន់ នល់ មួយឈ្មោះថាបន្ទាយព្រាបនាជំនាន់នោះផងដែរ ។
ដូច្នេះ ក្រៅពីការប្រយុទ្ធក៏មានការដាក់មីនតោនដើម្បីប្រឆាំងនឹងរថក្រោះដែរ ហើយការផ្ទុះបង្កគ្រោះថ្នាក់នាពេលនេះ សង្ស័យថាជាគ្រាប់មីនតោនដែលបន្សល់កាលពីអំឡុងសង្គ្រាមកាលពីជាង៤០ឆ្នាំមុននោះ។ ប៉ុន្តែអ្វីដែលពួកគាត់ងឿងឆ្ងល់នោះ គឺកាលពីមុនដីស្រែនោះមានស្ថាន ភាពខ្ពស់ដូចដីទួល ទើបតែកាលពីប៉ុន្មានឆ្នាំមុនម្ចាស់បានជួលគ្រឿងចក្រកាយដីជម្រៅប្រហែលកន្លះម៉ែត្រដើម្បីឲ្យទឹកដក់ធ្វើស្របានែល្អ ហើយពេលនោះមិនមានកិនមីនផ្ទុះសោះ ។
ក្រោយពេលកើតហេតុ នគរបាលស្រុកអង្គ ស្នួល និងនគរបាលប៉ុស្តិ៍ពើក បានទៅកាន់ទីនោះរួចរាយការណ៍ជូនថ្នាក់លើនិងអង្គភាពកម្ចាត់មីនសុីម៉ាក់ ដើម្បីទៅពិនិត្យជាក់ស្ដែង ព្រមទាំងរុករកក្រែងមានគ្រាប់មិនទាន់ផ្ទុះនៅជិតនោះទៀត ៕ (សម្រួលដោយ៖ ស្រីណា)
ចែករំលែកព័តមាននេះ