រាជធានីភ្នំពេញ ៖ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានឯកភាពជាគោលការណ៍ ក្នុងការអនុញ្ញាតឱ្យប្រព័ន្ធផ្សព្វផ្សាយរបស់សហរដ្ឋអាមេរិក បើកការិយាល័យតំណាងវិទ្យុសំឡេងសហរដ្ឋអាមេរិក(VOA)ស្របច្បាប់មួយនៅក្នុងប្រទេសកម្ពុជា។ នេះបើតាមអ្នកនាំពាក្យក្រសួងព័ត៌មាន…
រាជធានីភ្នំពេញ ៖ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានឯកភាពជាគោលការណ៍ ក្នុងការអនុញ្ញាតឱ្យប្រព័ន្ធផ្សព្វផ្សាយរបស់សហរដ្ឋអាមេរិក បើកការិយាល័យតំណាងវិទ្យុសំឡេងសហរដ្ឋអាមេរិក(VOA)ស្របច្បាប់មួយនៅក្នុងប្រទេសកម្ពុជា។ នេះបើតាមអ្នកនាំពាក្យក្រសួងព័ត៌មាន លោក មាស សោភ័ណ្ឌ ។
អ្នកនាំពាក្យក្រសួងព័ត៌មានបានប្រាប់អ្នកសារព័ត៌មានថា ក្នុងជំនួបជាមួយលោក Michael Newbill ភារៈធារីស្ថានទូតសហរដ្ឋអាមេរិកប្រចាំនៅកម្ពុជា និងលោក Matthew Walsh អនុប្រធានទទួលបន្ទុកប្រតិបត្តិការនៃទីភ្នាក់ងារអាមេរិកសម្រាប់ប្រពន្ធ័ផ្សព្វផ្សាយសកល (US Agency for Global Media) ដើម្បីស្វែងយល់ពីស្ថានការណ៍សារព័ត៌មានក្នុងប្រទេសកម្ពុជា និងពិភាក្សាការងារអំពីការបើកការិយាល័យ VOA ជាខេមរភាសាប្រចាំនៅកម្ពុជា នាព្រឹកថ្ងៃទី៣០ ខែឧសភា នៅទីស្តីការក្រសួង លោករដ្ឋមន្ត្រី ខៀវ កាញារីទ្ធ បានឯកភាពជាគោលការណ៍ឲ្យបើកការិយាល័យស្របតាមច្បាប់នៅកម្ពុជាហើយ ។
លោក មាស សោភ័ណ្ឌ បានប្រាប់អ្នកសារព័ត៌មានថា ក្នុងជំនួបនេះលោករដ្ឋមន្ត្រីឯកភាពជាគោលការណ៍ឱ្យបើកការិយាល័យតំណាង VOA នៅកម្ពុជា ហើយជាការឆ្លើយតប លោក Mathew Walsh បានអរគុណក្រសួងព័ត៌មាន និងលោករដ្ឋមន្ត្រី ដែលបានសម្របសម្រួលឱ្យមានការឯកភាពគ្នាជាគោលការណ៍ដើម្បីបើកការិយាល័យតំណាងនេះ ។ លោកបន្តថា តំណាង Global Mediaរបស់សហរដ្ឋអាមេរិក ក៏បានស្នើសុំលោករដ្ឋមន្ត្រីក្រសួងព័ត៌មាន បញ្ជាក់អំពីនីតិវិធីបែបបទ ក្នុងការបើកការិយាល័យនៅកម្ពុជាឡើងវិញនេះ ។ លោក មាស សោភ័ណ្ឌ គូសបញ្ជាក់ថា «លោករដ្ឋមន្ត្រី បានបញ្ជាក់អំពីនីតិវិធីនៅក្នុងការសុំបែបបទក្នុងការបើកការិយាល័យតំណាង ហើយខាង ក្រសួងក៏បានផ្តល់ពាក្យស្នើសុំក្នុងការបើកការិ
យាល័យតំណាងនេះជូនដល់ Global Media ។
ជាការឆ្លើយតបខាងGlobal Media បានអះអាងថា នឹងដាក់លិខិតស្នើសុំមកកាន់ក្រសួងវិញនៅពេលឆាប់ៗនេះ» ។សូមជម្រាបថា កាលពីថ្ងៃទី៣ ខែធ្នូ ឆ្នាំ២០១៨ រាជរដ្ឋាភិបាលកម្ពុជាបានចេញសេចក្តីថ្លែងការណ៍មួយ បង្ហាញនូវការប្តេជ្ញាចិត្តយ៉ាងមោះមុតក្នុងការលើកតម្កើងនូវសិទ្ធិសេរីភាពសារព័ត៌មាន សេរីភាពនៃការបញ្ចេញមតិស្របតាមរដ្ឋធម្មនុញ្ញ និងច្បាប់ដែលមានជាធរមាន ហើយបានបញ្ជាក់យ៉ាងច្បាស់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានផ្តួចផ្តើមគំនិតបិទការិយាល័យតំណាងរបស់ខ្លួនដោយខ្លួនឯង។
ដូច្នេះ វិទ្យុទាំងពីរនេះ ក៏មានសេរីភាពបើកការិយាល័យតំណាងរបស់ខ្លួននៅកម្ពុជាឡើងវិញនដែរ ។ ទោះ ជាយ៉ាងនេះក្តី បើតាមអ្នកនាំពាក្យក្រសួងព័ត៌មានបានអះអាងថា នៅក្នុងជំនួបខាងលើនេះ ភាគីទាំងពីរពុំបាននិយាយអំពីវិទ្យុអាស៊ីសេរីនោះទេ ។ លោកក៏ឲ្យដឹងថាតំណាង Global Media របស់សហរដ្ឋអាមេរិកនឹងសុំបែបបទឯកសារផ្លូវការក្នុងការស្នើសុំបើកការិយាល័យតំណាងនេះ ដែលនឹងដាក់ទៅទៅក្រសួងព័ត៌មាន ក្នុងពេលដ៏ខ្លីខាងមុខ ៕ (សម្រួលដោយ៖ ស្រីណា)
ចែករំលែកព័តមាននេះ