ADផ្ទាំងផ្សព្វផ្សាយពាណិជ្ជកម្ម

ត្រាក់ទ័រភ្ជួរដីប៉ះចំមីនតោនផ្ទុះយ៉ាងកក្រើកផ្អើលស្រុកអង្គស្នួល (មានវីដេអូ)

4 ឆ្នាំ មុន

កណ្តាល
៣០ ខែ ឧសភា ឆ្នាំ ២០១៩ ម៉ោង ១៦:០៧

ខេត្តកណ្ដាល ៖ ត្រាក់ទ័រមួយគ្រឿងខណៈកំពុងបើកភ្ជួរដីស្រែមួយកន្លែងបានប៉ះចំមីនតោន១គ្រាប់ បណ្ដាលឲ្យផ្ទុះលាន់កក្រើកមេឃតែម្ដង ពេលនោះត្រាក់ទ័រខាងលើបានប៉ើងខ្ទាតចេញពីស្រែ និងដាច់បំណែកហោះហើរឡើងលើរប៉ាត់រប៉ាយមានចម្ងាយប្រមាណជាង១០០ម៉ែត្រជុំវិញកន្លែងកើតហេតុ ចំណែកឯអ្នកបើកបរបានរងរបួសយ៉ាងធ្ងន់ធ្ងរ និងត្រូវបាននគរបាលបញ្ជូនទៅកាន់គ្លីនិកឯកដើម្បីសង្គ្រោះបន្ទាន់ភ្លាមៗដែរ ប៉ុន្តែដោយសារតែស្ថានភាពរបួសធ្ងន់ពេកទើបបញ្ជូនបន្តទៅកាន់មន្ទីរពេទ្យព្រះកុសុមៈ ។…

ចំណុចកើតហេតុខាងលើនេះត្រូវបានអ្នកភូមិបានប្រាប់ថា តំបន់នោះគឺជាអតីតសមរភូមិក្ដៅនៃការប្រយុទ្ធគ្នារវាងកងទ័ពលន់នល់និងកងទ័ពខ្មែរក្រហមនាអំឡុងទសវត្សឆ្នាំ១៩៧០ដល់ឆ្នាំ១៩៧៥ ហើយក៏ស្ថិតនៅជិតអតីតបន្ទាយកងទ័ពលោកសេនាប្រមុខលន់នល់ទៀតផង។

ហេតុការណ៍ខាងលើបានបង្កការឱ្យមានការភ្ញាក់ផ្អើលបានកើតឡើងកាលពីវេលាម៉ោង៨និង១០នាទីព្រឹកថ្ងៃទី៣០ ខែឧសភា ឆ្នាំ២០១៩ នៅចំណុចវាលស្រែខាងជើងវត្តសម្ពលី ស្ថិតនៅក្នុងភូមិចំការជោ ឃុំពើក ស្រុកអង្គស្នួល ខេត្តកណ្ដាល។

ជនរងគ្រោះឈ្មោះធី ទី ភេទប្រុស អាយុ៣៣ឆ្នាំ មុខរបរបើកត្រាក់ទ័រស៊ីឈ្នួលភ្ជួរដីស្រែ មានទីលំនៅក្នុងភូមិត្រពាំងខ្ទឹម ឃុំព្រាល ស្រុកកញ្ជ្រាច ខេត្តព្រៃវែង។

តាមប្រភពព័ត៌មានបានឲ្យដឹងថា បុរសរងគ្រោះត្រូវបានអ្នកភូមិជាច្រើននាក់ជួលឲ្យភ្ជួរដីដើម្បីធ្វើស្រែ ហើយនៅមុនកើតហេតុ ជនរងគ្រោះបានចាប់ផ្ដើមភ្ជួរដីស្រែឲ្យលោកយាយម្នាក់ឈ្មោះទេព សំអុល អាយុ៧១ឆ្នាំ ដោយភ្ជួរស្រែមួយកន្លែងមានទំហំជាង២០អា បន្ទាប់មកបុរសនោះក៏បានចុះទៅភ្ជួរស្រែ១ទៀតដែលមានទំហំជាង៣អាប៉ុណ្ណោះ។

តាមប្រភពព័ត៌មានបានបន្តថា ពេលនោះបុរសរងគ្រោះបានភ្ជួរដីជិតរួចទៅហើយនៅសល់បន្តិចប៉ុណ្ណោះជាអកុសលស្រាប់តែកង់ក្រោយត្រាក់ទ័របានកិនចំមីនតោន១គ្រាប់កប់ក្នុងដីស្រែនោះ បណ្ដាលឲ្យផ្ទុះលាន់កក្រើកមេឃតែម្ដង ហើយត្រាក់ទ័រនោះបានប៉ើងខ្ទាតចេញពីក្នុងស្រែ ព្រមទាំងដាច់បំណែកតូចធំហោះហើររប៉ាត់រប៉ាយធ្លាក់ចម្ងាយប្រមាណជា១០០ម៉ែត្រជុំវិញកន្លែងកើតហេតុថែមទៀតផង។

តាមប្រភពព័ត៌មានបានបន្តទៀតថា បន្ទាប់ពីឃើញហេតុការណ៍បែបនេះ អ្នកភូមិបាននាំគ្នារត់ទៅមើលឃើញជនរងគ្រោះស្ថិតនៅចម្ងាយប្រហែល៥ម៉ែត្រពីត្រាក់ទ័រ និងរងរបួសយ៉ាងធ្ងន់ធ្ងរដោយដាច់សាច់ភ្លៅខាងស្ដាំ និងម្រាមជើងស្ដាំ ព្រមទាំងរយះដៃស្ដាំ ចំណែកត្រាក់ទ័រវិញរងការខូចខាតយ៉ាងដំណំ ដោយដាច់កង់ក្រោយខាងស្ដាំ និងតួខាងស្ដាំជាបំណែកៗតែម្ដង។

ក្រោយកើតហេតុ កម្លាំងនគរបាលនៃអធិការដ្ឋានស្រុកអង្គស្នួលបានហៅរថយន្តពេទ្យទៅដឹកយកបុរសរងគ្រោះទៅកាន់គ្លីនិកឯកជនមួយដើម្បីសង្គ្រោះបន្ទាន់ ប៉ុន្តែដោយសារតែរបួសធ្ងន់ពេកទើបបញ្ជូនបន្តទៅកាន់មន្ទីរពេទ្យព្រះកុសុមៈវិញ ព្រមទាំងទំនាក់ទំនងទៅកាន់ក្រុមគ្រសារជនរងគ្រោះនៅឯខេត្តព្រៃវែងដើម្បីឱ្យដឹង និងទៅមើលថែជនរងគ្រោះនៅឯមន្ទីរពេទ្យ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)