ខេត្តសៀមរាប ៖ នាថ្ងៃទី២៨ ខែឧសភា ឆ្នាំ២០១៩នេះគម្រោងបុរីផ្ទះល្វែងមួយចំនួននៅក្នុងស្រុកបន្ទាយស្រី ខេត្តសៀមរាប ត្រូវបានអាជ្ញាធរខេត្តសៀមរាបដឹកនាំដោយលោក ហែន ពុទ្ធី នាយករងរដ្ឋបាលសាលាខេត្ត រួមនឹងក្រុមការងារចម្រុះចុះត្រួតពិនិត្យនៅតាមការដ្ឋានសាងសង់គម្រោងបុរីនានា នៅក្នុងស្រុកបន្ទាយស្រី និងបញ្ជាឱ្យផ្អាកសកម្មភាពនានារបស់ពួកគេជាបណ្តោះអាសន្នសិន ចំពោះគម្រោងបុរីផ្ទះល្វែងណាដែលគ្មានច្បាប់ទំលាប់នោះ ។
ក្រុមការងារបានណែនាំឲ្យបញ្ឈប់សកម្មភាពទាំងឡាយដូចជា សកម្មភាពផ្សព្វផ្សាយពាណិជ្ជកម្មគ្រប់រូបភាព បញ្ឈប់ការសាងសង់សំណង់នានា ក្នុងទីតាំងគម្រោង ហើយជាមួយគ្នានេះ ក្រុមការងារក៏បានតម្រូវឱ្យម្ចាស់គម្រោងបុរីទាំងនោះត្រូវតែសុំការអនុញ្ញាតច្បាប់ពីមន្ត្រីជំនាញឱ្យបានត្រឹមត្រូវ មុននឹងដំណើរការធ្វើអាជីវកម្មរបស់ខ្លួន ។ រដ្ឋបាលខេត្តសូមស្នើដល់បងប្អូន ប្រជាពលរដ្ឋប្រុងប្រយ័ត្នចំពោះបុរី ឬការអភិវឌ្ឍន៍ (ពុះដីឡូតិ៍) ដោយត្រូវបញ្ជាក់ថា ទីតាំងនោះមានច្បាប់អនុញ្ញាតពីអាជ្ញាធរមានសមត្ថកិច្ច និងប័ណ្ណសម្គាល់សិទ្ធិម្ចាស់អចលនវត្ថុជាដើម ។
គួរបញ្ជាក់ថា គម្រោងដែលក្រុមការងារចម្រុះសម្រេចចុះផ្អាកជាបណ្តោះអាសន្ននោះមានគម្រោងបុរីរបស់ក្រុមហ៊ុន អង្គរលែន ម៉ាក្ស បន្ទាយស្រី ក្នុងភូមិខ្នារ គម្រោងបុរីមហាមន្ទីរ ( MAHA MONTY ) នៅក្នុងភូមិប្រិយ៍ ក្នុងឃុំខ្នារសណ្តាយ និងគម្រោងបុរីមួយកន្លែងទៀត នៅក្នុងឃុំឃុនរាម ស្រុកបន្ទាយស្រី ខេត្តសៀមរាបផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ