ខេត្តបន្ទាយមានជ័យ ៖ ពិធីប្រសិទ្ធពរជ័យសិរីសួស្ដីជ័យមង្គលជូនដល់គូស្វាមីភរិយា ត្រូវបានរៀបចំឡើងដោយសហព័ន្ធសន្តិភាពសាកលប្រចាំតំបន់ឥណ្ឌូចិន (UPF) និងអង្គការសហព័ន្ធសន្តិភាពសកលកម្ពុជា សហការជាមួយរដ្ឋបាលខេត្ត ។ ពិធីនេះពិតជាកម្រមានធ្វើនៅតាមខេត្តផ្សេងទៀតណាស់ ក្រៅពីខេត្តបន្ទាយមានជ័យ ។
នៅក្នុងការប្រារព្ធធ្វើលើកនេះ មានការចូលរួមពីសំណាក់អស់លោក លោកស្រីជាគូស្វាមីភរិយាជាង៥០០គូ ដោយមានការចូលរួមពីសំណាក់ភ្ញៀវជាតិ-អន្តរជាតិ បណ្តាតំណាងសាសនា មួយចំនួន ដែលបានប្រព្រឹត្តទៅនៅថ្ងៃទី២៨ ខែឧសភា នៅក្នុងបុរីចិនខ្មៅ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
លោក ហាជីមិ សៃតុ នាយក UPF ប្រចាំតំបន់ឥណ្ឌូចិន មានប្រសាសន៍ថា ក្នុងនាមលោកជានាយក UPF ពិតជាមានក្តីរីករាយនៅពេលឃើញបងប្អូនកម្ពុជាស្រឡាញ់គ្នា និងមានភាពរួសរាយរាក់ទាក់ ។ លោកបន្តថា លោកពិតជាកោតសរសើរដល់គូស្វាមីភរិយា ដែលបានចាប់ដៃគ្នាកសាងសុភមង្គលគ្រួសារ បានពុះពារគ្រប់បែបយ៉ាង ឆ្លងកាត់រាល់ឧបសគ្គ ដោយខ្លះស្ទើរតែមួយជីវិតបានចាប់ដៃគ្នាកសាងគ្រួសារស្មោះមួយនឹងមួយ ។ នេះពិតជាប្រពៃណីដ៏ផូរផង់របស់កម្ពុជា ។
លោកបន្តទៀតថា កម្ពុជាជាប្រទេសគំរូដែលគូស្វាមីភរិយាស្រឡាញ់ស្មោះស្ម័គ្រគ្នាមួយនឹងមួយ ។ លោកក៏បានជូនពរដល់គូស្វាមីភរិយា ដែលបានចូលរួមឲ្យទទួលបានសុភមង្គល ទទួលបានសុខភាពល្អ និងធ្វើជាគ្រួសារគំរូសម្រាប់ខេត្ត ក៏ដូចជាប្រទេសកម្ពុជា ។
ថ្លែងក្នុងឱកាសនោះ លោក អ៊ុំ រាត្រី អភិបាលខេត្ត បានថ្លែងការគាំទ្រនិងលើកទឹកចិត្តយ៉ាងសប្បាយរីករាយចំពោះសហព័ន្ធសន្តិភាពសាកលកម្ពុជា រួមជាមួយដៃគូដែលបានរៀបចំកម្មវិធីនេះឡើង ព្រោះមិនត្រឹមតែផ្ដល់សារប្រយោជន៍ដល់ការអភិវឌ្ឍ សីលធម៌នៅក្នុងគ្រួសារ និងសង្គមប៉ុណ្ណោះទេ ថែមទាំងបានរួមចំណែកក្នុងការផ្សារភ្ជាប់បណ្ដាញទំនាក់ទំនងកាន់តែជិតស្និទ្ធរវាងបងប្អូន ឪពុកម្ដាយ ជីដូនជីតា ញាតិសន្តានដើម្បីពង្រឹងសាមគ្គីភាពក្នុងសង្គម លើកកម្ពស់គុណធម៌ ការដឹងគុណ ពង្រឹងសេចក្តីស្រឡាញ់ស្មោះត្រង់ ព្រមទាំងបង្ហាត់បង្រៀនមនុស្សឲ្យរស់នៅប្រកបដោយក្រមសីលធម៌ខ្ពស់ និងចេះជួយអ្នកដទៃ ។
ជាមួយនេះ បានបញ្ជាក់ពីការចូលរួមលើកស្ទួយមនសិការស្នេហា ការពារសន្តិភាព សីលធម៌ កាយសម្បទា សុខភាព ស្មារតីទទួលខុសត្រូវ ដោយគ្មានការរើសអើងខាងយេនឌ័រ ស្របតាមយុទ្ធសាស្ត្រចតុកោណ និងផែនការយុទ្ធសាស្ត្រ នារីរតនៈរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្សប្រកបដោយគុណភាពសមត្ថភាព និងគុណធម៌ ដែលជាកត្តាពង្រីកសម្រាប់ទ្រទ្រង់កំណើនសេដ្ឋកិច្ច និងការប្រជែងរបស់ប្រទេសនៅក្នុងតំបន់ ទាំងសម្រាប់អនាគតស្របតាមចក្ខុវិស័យដ៏វែងឆ្ងាយរបស់រាជរដ្ឋាភិបាល ។
លោកអភិបាលខេត្តបន្តថា នេះជាការចូលរួមក្នុងការអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ តាមរយៈការអនុវត្តវិធានការចម្រុះប្រទាក់ក្រឡាគ្នាជាមួយរដ្ឋាភិបាលកម្ពុជា គួបផ្សំជាមួយសមិទ្ធផលសម្រេចកន្លងទៅរបស់រាជរដ្ឋាភិបាល ផ្អែកលើសក្តានុពលដ៏ធំធេងរបស់កម្ពុជា ព្រមជាមួយឆន្ទៈដ៏មោះមុត និងទេពកោសល្យរបស់ពលរដ្ឋកម្ពុជា និងការដាក់ចេញនូវយុទ្ធសាស្ត្រដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី ។
ជាមួយគ្នានេះ លោកអភិបាលខេត្តបានលើកឡេីងថា ថ្ងៃនេះមានបងប្អូនគូស្វាមីភរិយា ជាច្រេីនគូ រួមនឹងតំណាងសាសនានានានៅក្នុងខេត្ត ដោយបើកទូលាយក្នុងការជួបជុំគ្នានាពេលនេះ ដោយមិនប្រកាន់និន្នាការនយោបាយ សាសនា ពូជសាសន៍ ពណ៌សម្បុរឡើយ គឺដើម្បីទទួលយកភាពសុខដុមរមនាក្នុងសង្គមគ្រួសារខ្មែរ ៕ (សម្រួលដោយ៖ ស្រីណា)
ចែករំលែកព័តមាននេះ