ប្រទេសថៃ ៖ ភ្នាក់ងារសារព័ត៌មាន Bangkok Post បានរាយការណ៍មកកាលពីថ្ងៃទី ២៧ខែឧសភាកន្លងមកថា ការនាំចេញយានយន្ត និងគ្រឿងយានយន្តរបស់ប្រទេសថៃមិនអាចជួបនឹងពន្ធពីសហរដ្ឋអាមេរិកទេព្រោះតម្លៃនៃការនាំចេញមិនមានច្រើនទេ។
លោកស្រី Auramon Supthaweethum ដែលជាប្រធានគ្រប់គ្រងនាយកដ្ឋានចរចាពាណិជ្ជកម្មបាននិយាយថា ការនាំចេញយានយន្តរបស់ប្រទេសថៃស្មើតែ០.១នៃទីផ្សារសរុបទេ ឬស្មើ ២៣១លានដុល្លារ ក្នុងចំណោមយានយន្ត ២០៨ប៊ីលានដុល្លារដែលសហរដ្ឋអាមេរិកនាំចូលក្នុងឆ្នាំ ២០១៨។
ការនាំចេញគ្រឿងយានយន្តថៃដែលមិនគិតផលិតផលជ័រវិញស្មើតែ០.៩% ឬ១.៣ប៊ីលានដុល្លារនៃការនាំចូលសរុបរបស់អាមេរិកដែលស្មើ ១៣៩ប៊ីលានដុល្លារប៉ុណ្ណោះ។
កាលពីថ្ងៃទី ២៣ខែឧសភាឆ្នំឫ ២០១៨ កន្លងមកនេះ ក្រសួងពាណិជ្ជកម្មអាមេរិកបានចាប់ផ្តើមការស៊ើបអង្កេតការនាំចូលយានយន្តនិងគ្រឿងយានយន្ត។ ការស៊ើបអង្កេតនេះមានលក្ខណៈស្រដៀងគ្នានឹងការស៊ើបអង្កេតលើការនាំចូលដែកថែបនិងអាលុយមីញ៉ូមដែលបង្កឲ្យមានការបង្កើនពន្ធដែកថែបដល់ ២៥%និងអាលុយមីញ៉ូមដល់ ១០%កាលពីឆ្នាំមុន។ ការស៊ើបអង្កេតថ្មីនេះនឹងវាយតម្លៃថាតើការនាំចូលយានយន្តនិងគ្រឿងយានយន្តផ្តល់ការគម្រាមកំហែងដល់សន្តិសុខជាតិឬទេ។
សហរដ្ឋអាមេរិកបានបញ្ចប់ការស៊ើបអង្កេតនិងផ្តល់ហោបល់ដល់លោកប្រធានាធិបតីដូណាល់ត្រាំ (Donald Trump) ហើយ។ លោកស្រី Auramon បានបន្ថែមថាលោកប្រធានាធិបតីត្រាំបានបញ្ជាដល់អ្នកតំណាងពាណិជ្ជកម្មអាមេរិកឲ្យចរចាជាមួយនឹងសហភាពអ៊ឺរ៉ុប ជប៉ុន និងប្រទេសដទៃដើម្បីកាត់បន្ថយ ឬដាក់កម្រិតលើការនាំចេញយានយន្តនិងគ្រឿងយានយន្ត រួចរាយការណ៍ប្រាប់លោកវិញក្នុងរយៈពេល១៨០ថ្ងៃមុនពេលពន្ធត្រូវបានបង្កើនពី១០%ទៅ២៥%។
អ្នកស្រីបានបន្ថែមថា “ខណៈដែលអ្នកតំណាងពាណិជ្ជកម្មអាមេរិកកំពុងតែចរចាជាមួយនឹងប្រទេសដែលជាគោលដៅ ប្រទេសថៃត្រូវតែតាមដានស្ថានការយ៉ាងដិតដល់។ ពួកយើងគិតថាប្រទេសថៃមិនអាចធ្លាក់ក្នុងបញ្ជីពន្ធទេ” ៕ (កែសម្រួលដោយ ៖ បុប្ផា)
ចែករំលែកព័តមាននេះ