រាជធានីភ្នំពេញ៖ លោកដាញ់ ហុង បាននិងកំពុងព្យាយាមបង្កើតកូដកុំព្យូទ័រកែអក្ខរាវិរុទ្ធខ្មែរឲ្យកាន់តែមានភាពសុក្រឹតឡើង បន្ទាប់ពីកម្មវិធីនេះបានទទួលការចាប់អារម្មណ៍ជាបន្តបន្ទាប់សម្រាប់អ្នកប្រើប្រាស់នៅក្នុងស្រុក ។
កាលពីពេល ថ្មីៗកន្លងមកលោកដាញ់ ហុង បញ្ជាក់ថា កម្មវិធីនេះនឹងកាន់តែមានភាពសុក្រឹត និងប្រសើរឡើង បន្ទាប់ពីលោកសហការជាមួយក្រុមអ្នកនិពន្ធខ្មែរ និងការកើនឡើងនៃអ្នកប្រើប្រាស់កម្មវិធីមួយនេះ។
មានដើមកំណើតជាខ្មែរកម្ពុជាក្រោមលោកដាញ់ ហុង បានលើកឡើងថា «ខ្ញុំបានធ្វើឲ្យកម្មវិធីកែអក្ខរាវារុទ្ធនៅលើប្រព័ន្ធកុំព្យូទ័រនេះបើវានិយាយពីភាពសុក្រឹត គឺខ្ញុំបានកូដដាក់ជាសញ្ញាសិប្បនិមិត្ត(AI) ដែលវារៀនពីអត្ថបទជាភាសាខ្មែរ ដោយអ្នកប្រើកូពីដាក់អត្ថបទចូលដើម្បីស្វែងរកពាក្យខុសនោះ ។ ដំបូងវាមិនសូវជាសុក្រឹតទេ ប៉ុន្តែវាអាចសុក្រឹតនៅពេលអ្នកប្រើកាន់តែច្រើន ។ មានពាក្យខ្លះមើលមិនដឹងខុស ហើយពាក្យខ្លះមិនខុស តែវាលោតសញ្ញាក្រហមដែរ នេះគឺដោយសារយើងខ្វះទិន្នន័យ ខណៈពេលដែលពាក្យដែលបានប្រើប្រាស់ច្រើននៅលើបណ្តាញអ៊ីនធើរណេតនេះយើងមិនអាចសន្និដ្ឋានថាខុសនោះឡើយ »។
បើតាមលោកដាញ់ ហុង គោលបំណងដែលលោកចង់ឲ្យអ្នកប្រើប្រាស់កម្មវិធីនេះ គឺដំបូងអ្នកប្រើត្រូវកូពីអត្ថបទរបស់ខ្លួនចូលទៅក្នុងកម្មវិធី ។ ប្រសិនបើពាក្យណាមួយដែលវាខុសពីវចនានុក្រម នោះវានឹងលោតសញ្ញាក្រហម ចំណែកពាក្យណាដែលត្រឹមត្រូវហើយនោះវាមិនលោតសញ្ញាពណ៌ក្រហមឡើយ ខណៈពេលដែលកម្មវិធីនេះវាបានជួយច្រើនដល់អ្នកដែលសរសេរភាសាខ្មែរ ។
សម្រាប់កម្មវិធីដែលលោកដាញ់ ហុង បានបង្កើតនេះគឺទទួលបានការសរសើរច្រើនពីអ្នកប្រើប្រាស់ ជាពិសេសអ្នកសារព័ត៌មាន ផ្សេងៗ ដោយសារតែកម្មវិធីនេះបានជួយដល់ពួកគេច្រើនសម្រាប់ការពិនិត្យអក្ខរាវិរុទ្ធ ។
កម្មវិធីនេះវាអាចនឹងសុក្រឹតកាន់តែខ្លាំងនៅក្នុងរយៈពេលប៉ុន្មានឆ្នាំទៅមុខទៀត ដោយសារតែរាល់ពាក្យខ្មែរដែលបានប្រើប្រាស់នៅក្នុងសង្គមញឹកញាប់គឺវានឹងស្គាល់ខុស ឬក៏ត្រូវ។
កម្មវិធីដ៏ល្អនេះក្នុងមួយថ្ងៃមានអ្នកប្រើចាប់ពី១០០ទៅ២០០នាក់ ហើយភាគច្រើនជាអ្នកកាសែត ដែលកម្មវិធីនេះបានធ្វើឲ្យមានភាពចំណេញពេលច្រើនជាងមុននៅក្នុងការកែអក្សរ។ ទោះជាយ៉ាងណាក្តីបើតាមលោកដាញ់ ហុង កម្មវិធីនេះលោកនៅមិនទាន់បានបញ្ចប់នៅឡើយទេ ពោលនៅពេលដែលកម្មវិធីកែនេះទទួលបានជោគជ័យហើយនោះលោកនឹងបន្តកម្មវិធីសំណេរពាក្យត្រូវឡើងវិញ ៕
ចែករំលែកព័តមាននេះ