ខេត្តកំពង់ស្ពឺ ៖ នារីម្នាក់ត្រូវរន្ទះបាញ់បណ្តាលឱ្យធ្លាក់ពីលើដើមព្រីងស្លាប់គួរឱ្យអាណោចអាធ័ម ចំណែកក្មេងប្រុសស្រីចំនួន៣នាក់ផ្សេងទៀតបានរងរបួសស្រាល ខណៈជនរងគ្រោះទាំង៤នាក់នាំគ្នាទៅបេះផ្លែព្រីង ស្របពេលមេឃកំពុងភ្លៀង ។
ហេតុការណ៍គួរឱ្យរន្ធត់ខាងលើបានកើតឡើងកាលពីវេលាម៉ោង១និង៣០នាទីរសៀលថ្ងៃទី២៨ ឧសភា ២០១៩ នៅចំណុចភូមិស្លាបលែង ឃុំស្វាយរំពា ស្រុកបសេដ្ឋ ខេត្តកំពង់ស្ពឺ។
ជនរងគ្រោះទាំង៤នាក់ខាងលើរួមមាន ១-ឈ្មោះអៀង ស្រីណាវ ភេទស្រី អាយុ១៩ឆ្នាំ បានស្លាប់នៅនឹងកន្លែងកើតហេតុ ២-ឈ្មោះអឹម ស្រីណា ភេទស្រី អាយុ១៣ឆ្នាំ បានរងរបួសស្រាល ៣-ឈ្មោះ ឡឹម ទី ភេទប្រុស អាយុ៦ឆ្នាំ បានរងរបួសស្រាល និង៤-ឈ្មោះឡឹម ស្វិត ភេទប្រុស អាយុ៦ឆ្នាំ បានរងរបួសស្រាល។ ជនរងគ្រោះទាំង៤នាក់រស់នៅភូមិឃុំកើតហេតុខាងលើ ។
តាមការបំភ្លឺក្មេងៗដែលរួចផុតពីគ្រោះថ្នាក់ដល់ជីវិតបានរៀបរាប់អោយដឹងថា មុនពេលកើតហេតុ ពួកគេទាំង៤នាក់បាននាំគ្នាទៅរកបេះផ្លែព្រីងនៅចំណុចខាងជើងផ្ទះ ដែលមានចំងាយពីភូមិ៧០០ម៉ែត្រ លុះពេលកំពុងតែបេះផ្លែព្រីង ស្រាប់តែមានភ្លៀងធ្លាក់មក ពេលនោះពួកគេទាំង៣នាក់បានចុះពីលើដើមព្រីងមកក្រោម នៅសល់តែជនរងគ្រោះម្នាក់នៅបេះផ្លែព្រីងលើដើម ក៏ត្រូវរន្ទះបាញ់បណ្តាលអោយធ្លាក់មកដីស្លាប់តែម្តង។
តាមប្រភពដដែលបានបន្តថា ក្រោយពេលកើតហេតុ ពួកគេទាំង៣នាក់បានរត់ទៅប្រាប់ចាស់ៗក្នុងភូមិអោយមកជួយមើល និងរាយការណ៍ទៅសមត្ថកិច្ចចុះមកពិនិត្យផងដែរ។
តាមប្រភពពីសមត្ថកិច្ចបានបញ្ជាក់ថា បន្ទាប់ពីទទួលបានសេចក្តីរាយការណ៍ខាងលើភ្លាម កម្លាំងជំនាញបានចុះទៅពិនិត្យនៅកន្លែងកើតហេតុ ដោយមានការចូលរួមពីអាជ្ញាធរ និងក្រុមគ្រួសារសាច់ញាតិរបស់នារីរងគ្រោះផងដែរ។
ក្រោយពិនិត្យនិងបំពេញឯកសាររួច សមត្ថកិច្ចបានប្រគល់សពនារីរងគ្រោះអោយទៅក្រុមគ្រួសារដើម្បីទទួលយកទៅរៀបចំធ្វើបុណ្យតាមប្រពៃណី៕
ចែករំលែកព័តមាននេះ