ខេត្តសៀមរាប ៖ នេះបើយោងទៅតាមដីការបស់លោកជូ លឹម ហ៊ាង ចៅក្រមស៊ើបសួរនៃសាលាដំបូងខេត្តសៀមរាបបានឃុំខ្លួនមន្ត្រីនគរបាលម្នាក់ ដែលពាក់ព័ន្ធនឹងបទល្មើសរក្សាទុក និងជួញដូរដោយខុសច្បាប់នូវសារធាតុញៀនដែលប្រព្រឹត្តនៅភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប ។
លោកជូ លឹម ហ៊ាង ចៅក្រមស៊ើបសួរនៃសាលាដំបូងខេត្តសៀមរាបបានបញ្ជាក់ប្រាប់ឱ្យដឹងថា មន្ត្រីនគរបាលម្នាក់នេះមានឈ្មោះថា ឈ្មោះ ប៊ុន លីវង្ស អាយុ៣០ឆ្នាំ ពាក់ព័ន្ធនឹងបទល្មើសរក្សាទុក និងជួញដូរដោយខុសច្បាប់នូវសារធាតុញៀន នៅភូមិទ្រាំង សង្កាត់ស្លក្រាម ខេត្តសៀមរាប ។
កាលពី៧យប់ ថ្ងៃទី១៦ និងថ្ងៃទី១៧ ខែឧសភា ឆ្នាំ២០១៩ បទល្មើសព្រហ្មទណ្ឌដែលមានចែងឱ្យដាក់ទោសតាមបញ្ញត្តិមាត្រា៤០ កថាខណ្ឌ១.៣ និងកថាខណ្ឌ៧ ចំណុច៤ នៃច្បាប់ស្តីពីការត្រួតពិនិត្យគ្រឿងញៀន ចុះថ្ងៃទី២៥ ខែឧសភា ឆ្នាំ២០១៩ នៃសាលាដំបូងខេត្តសៀមរាប បានចេញដីកាឃុំខ្លួនលោកវរសេនីយ៍ទោ ប៊ុន លីវង្ស ជាមន្ត្រីនគរបាលជាន់ខ្ពស់ពាក់សក្ដិ៤កន្លះ ក្រោយសង្ស័យជាប់ពាក់ព័ន្ធករណីជួញដូរគ្រឿងញៀនយ៉ាងសកម្ម នៅក្នុងក្រុង-ខេត្តសៀមរាប ។
បើតាមលោកឧត្តមសេនីយ៍ត្រី អ៊ុំ អមរ៉ា ស្នងការរងទទួលផែនប្រឆាំងបទល្មើសគ្រឿងញៀន នៃស្នងការនគរបាលខេត្តសៀមរាប បានប្រាប់តាមទូរស័ព្ទនៅវេលាម៉ោង៩និង០២នាទីព្រឹក ថ្ងៃទី២៩ ខែឧសភា ឆ្នាំ២០១៩នេះ ថាចំពោះករណីគ្រឿងញៀនដែលសមត្ថកិច្ចខាងប៉ូលិសឃាត់ខ្លួនបាននោះ គឺលោកវរសេនីយ៍ទោ ប៊ុន លីវង្ស ពិតជាមានមែន ប៉ុន្តែដោយសារលោកជាថ្នាក់ដឹកនាំ លោកមិនអាចបកស្រាយឱ្យបានអស់នោះទេ ចាំសួរទៅខាងការិយាល័យ ជំនាញគ្រឿងញៀនវិញទៅ ព្រោះគេជាអ្នកចុះឃាត់ខ្លួនតាមដីកាបង្គាប់ឱ្យឃុំខ្លួនរបស់តុលាការជាក់ស្តែង ។
ជុំវិញករណីខាងលើកោះសន្តិភាពមិនអាចសុំការបកស្រាយពីលោកវរសេនីយ៍ទោ ណាម ណម នាយរងការិយាល័យប្រឆាំងបទល្មើសគ្រឿងញៀននៃស្នងការនគរបាលបានទេ នៅវេលាម៉ោង៩និង៣០នាទីព្រឹកថ្ងៃទី២៩ ខែឧសភានេះ បានទេ ដោយទូរស័ព្ទខលចូលជាច្រើនដងគ្មានអ្នកទទួល ។ បច្ចុប្បន្នជនសង្ស័យដែលប៉ូលិសឃាត់ខ្លួនតាមដីការបស់លោកជូ លឹម ហ៊ាង ចៅក្រមស៊ើបសួរ នៃសាលាដំបូងខេត្តសៀមរាបឱ្យយកទៅដាក់គុកបណ្តោះអសន្ន រួចរាល់ហើយ ៕ កែសម្រួលដោយ ៖ សុឃាក់
ចែករំលែកព័តមាននេះ