ធ្មេចបើកៗបន្ទាប់ពីតម្រាប្រកាសបោះពុម្ពផ្សាយសៀវភៅ «ពេលវេលា» ចេញលក់លើទីផ្សារកាលពីដើមខែរាប់មកដល់ថ្ងៃទី២៩ ខែឧសភា សប្ដាហ៍នេះដល់ថ្ងៃកំណត់ត្រូវចរាចរបំពេញបំណងបងប្អូនអ្នកអានដែលតែងតែទាក់ទង និងសួរនាំតាម Facebook Page តម្រា និងការផ្សាយនានា។…
ធ្មេចបើកៗបន្ទាប់ពីតម្រាប្រកាសបោះពុម្ពផ្សាយសៀវភៅ «ពេលវេលា» ចេញលក់លើទីផ្សារកាលពីដើមខែរាប់មកដល់ថ្ងៃទី២៩ ខែឧសភា សប្ដាហ៍នេះដល់ថ្ងៃកំណត់ត្រូវចរាចរបំពេញបំណងបងប្អូនអ្នកអានដែលតែងតែទាក់ទង និងសួរនាំតាម Facebook Page តម្រា និងការផ្សាយនានា។
ម្ចាស់ស្នាដៃសៀវភៅមួយក្បាលនេះ និងជាម្ចាស់រឿងដែលមានឈ្មោះបោះសំឡេងជាច្រើនលើទីផ្សារអ្នកស្រី ម៉ីសន សុធារី បានអះអាងថា ការចំណាយពេលវេលាពិតជារឿងសំខាន់សម្រាប់បងប្អូនគ្រប់រូប។ បើចំណាយពេលវេលាបានត្រឹមត្រូវនោះជោគជ័យ ក៏បានទៅតាមនោះដែរ។ អ្នកស្រីបន្ត «សៀវភៅម៉ាក្បាលនេះ ខ្ញុំសម្រិតសម្រាំង និងច្របាច់បញ្ចូលទាំងចំណេះដឹង ហើយបទពិសោធន៍ជីវិតពិតបទពិសោធន៍ការងារជាង២០ឆ្នាំ ដើម្បីចែករំលែកបងប្អូនយើងក្នុងការប្រើពេលវេលាដោយវៃឆ្លាត»។
កវីជើងចាស់លើកជាសំណួរថា «គ្នាយើងដឹងអត់ថា អ្វីដែលយើងចំណាយទៅ ហើយមិនអាចរកមកវិញ បានជារៀងរហូត?…ហាហា ប្រហែលអត់ពិបាកទាយទេ មើលទៅ ព្រោះចំណងជើងសៀវភៅដាក់ចឹង… ត្រូវហើយ គឺពេលវេលា។ ដូច្នេះគួរប្រើពេលវេលាឲ្យបានល្អបំផុត»។
ជុំវិញទទួលបានសិទ្ធិបោះពុម្ពផ្សាយសៀវភៅ ពេលវេលានេះដែរ គណៈគ្រប់គ្រង «តម្រា» កញ្ញា ទូច បុប្ផា លើកឡើងថា «ខ្លឹមសារសៀវភៅនេះ ល្អបណ្ដុះគំនិតច្នៃប្រឌិតមានឧទាហរណ៍ ល្អៗក្នុងការប្រើពេលវេលាបែងចែកពេលវេលារបស់បុគ្គលល្បីៗច្រើនទៀត មិនមែនតែបទពិសោធន៍របស់បងធារី តែមួយទេ។ ការចងក្រងបទពិសោធន៍ជីវិតរបស់ជនគំរូជាច្រើនក្នុងសៀវភៅនេះ សុទ្ធតែជាអ្វីដែលយុវវ័យគួរអាន គួររៀន គួរដឹង»។
សៀវភៅ «ពេលវេលា» មានតម្លៃ៦ដុល្លារ ឬ២៥ ០០០៛ នឹងចេញពីរោងពុម្ព ហើយដល់ដៃមិត្តអ្នកអានថ្ងៃទី២៩ ឧសភានេះហើយ។ នេះជាសៀវភៅទីពីរ របស់ «តម្រា» ដែលបានបោះពុម្ពផ្សាយលើទីផ្សារ បន្ទាប់ពីសៀវភៅអាគម អូមអាម និងអប្បិយជំនឿដំបូង «អាគមបរព្រៃ» ហើយសៀវភៅចេញ បន្ទាប់ក្នុងឆ្នាំនេះ គឺ «បឹងអតីត»។
«តម្រា» ទទួលបានសិទ្ធិ និងបោះពុម្ពផ្សាយប្រលោមលោកធំៗជាច្រើនប្រភេទរបស់អ្នកនិពន្ធល្បីៗនៅកម្ពុជា មិនថាអ្នកនិពន្ធវ័យក្មេង ឬអ្នកនិពន្ធជើងចាស់ឡើយ។ យើងខ្ញុំមានឆន្ទៈលើកកម្ពស់ផ្ដល់តម្លៃកម្មសិទ្ធិបញ្ញាអ្នកនិពន្ធ ពង្រីកទីផ្សារតែងនិពន្ធ និងជំរុញទម្លាប់អានរបស់យុវវ័យកម្ពុជាយើង។ ក្រៅពីប្រលោមលោកបែបមនោសញ្ចេតនា អប្បិយជំនឿ បុរាណ ដូនតាខ្មែរយើង ទាក់ទងនឹងអាគមអូមអាម «តម្រា» ក៏បោះពុម្ពផ្សាយ សៀវភៅ បែបអប់រំ បណ្ដុះ និងជំរុញការគិតជាគតិល្អបំភ្លឺផ្លូវសម្រាប់យុវវ័យខ្មែរទាំងអស់ផងដែរ។ សម្រាប់ព័ត៌មានបន្ថែម ឬជាវដុំយកលក់បន្ត សូមទាក់ទងតាមរយៈ 012 472 003៕ (កែសម្រួលដោយ ៖ បុប្ផា)
ចែករំលែកព័តមាននេះ