ខេត្តសៀមរាប ៖ រាជរដ្ឋាភិបាលកម្ពុជាបានលាតត្រដាងនូវមហិច្ឆតាប្រែក្លាយកម្ពុជាឲ្យក្លាយជាប្រទេសមានចំណូលមធ្យម-កម្រិតខ្ពស់នៅឆ្នាំ ២០៣០ និងជាប្រទេសដែលមានកម្រិតចំណូលខ្ពស់នៅឆ្នាំ២០៥០ ។ មហិច្ឆតាដ៏ធំធេងរបស់រាជរដ្ឋាភិបាលមួយនេះគឺពិតជាអស្ចារ្យខ្លាំងណាស់ ក៏ប៉ុន្តែមានសំណួរជាច្រើនបានលើកឡើងថាដើម្បីឈានទៅសម្រេចបាននូវគោលដៅសំខាន់ទាំងនេះ តើកម្ពុជាត្រូវផ្តោតការយកចិត្តទុកដាក់ ឬធ្វើការអភិវឌ្ឍលើផ្នែកអាទិភាពសំខាន់ៗអ្វីខ្លះ ឱ្យស្របទៅបរិបទបច្ចុប្បន្នដែលកម្ពុជាមានទាំងបញ្ហាប្រឈមនិងឱកាសនេះ?
ឆ្លើយតបនឹងការលើកឡើងខាងលើ បើតាមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកបណ្ឌិត អុិត សំហេង បានថ្លែងទទួលស្គាល់នៅក្នុងពិធីបើកកិច្ចសន្ទនាជាន់ខ្ពស់ថ្នាក់ជាតិស្តីពី «អនាគតនៃការងារសម្រាប់កម្ពុជា» នៅសណ្ឋាគារទ្បឺរ៉ូយ៉ាល់កាលពីថ្ងៃទី២៧ ខែឧសភា ម្សិលមិញថា កម្ពុជាពិតជាកំពុងជួបប្រទះនូវបញ្ហាភាពមិនស៊ីគ្នានៃជំនាញ និងការផ្គត់ផ្គង់ជំនាញមិនគ្រប់គ្រាន់ ដោយសារតែប្រព័ន្ធអប់រំបណ្តុះបណ្តាលនៅមានកម្រិត និងមិនទាន់អាចឆ្លើយតបទៅនឹងតម្រូវការកម្លាំងពលកម្មដែលកំពុងផ្លាស់ប្តូរយ៉ាងឆាប់រហ័ស។ ជាងនេះការវិវត្តបច្ចេកវិទ្យាក្នុងដំណាក់កាលនៃបដិវត្តន៍ឧស្សាហកម្មទី៤ នឹងបណ្តាលឱ្យមានការបាត់បង់ការងារ ហើយក៏បង្កើតឱ្យមានប្រភេទការងារថ្មីៗ។ ប៉ុន្តែ អ្នកដែលបាត់បង់ការងារក្នុងដំណាក់កាលវិវត្តនេះ នឹងមិនអាចស្វែងរកការងារបាននោះទេ ប្រសិនបើពួកគេមិនទទួលបានការបណ្តុះបណ្តាលជំនាញទ្បើងវិញ និងបង្កើនសមត្ថភាពជំនាញ។
លោកបណ្ឌិតបានមានប្រសាសន៍បន្តថា « យើងមិនមានជម្រើសអ្វីក្រៅពីបង្កើនសមត្ថភាពជំនាញដល់កម្លាំងពលកម្ម, បង្កើនផលិតភាព, បង្រួមគម្លាតភាពមិនស៊ីគ្នានៃជំនាញ, ពង្រឹងសេវាព័ត៌មានទីផ្សារការងារ និងសេវារកការងារឱ្យធ្វើ, បង្កើនគុណភាពអប់រំនិងបណ្តុះបណ្តាលវិជ្ជាជីវៈ ក្នុងទិសដៅដើម្បីចាប់យកអត្ថប្រយោជន៍ជាអតិបរមា និងកាត់បន្ថយផលប៉ះពាល់អវិជ្ជមាននៃការប្រែប្រួលពិភពការងារ និងដើម្បីឆ្លើយតបទៅនឹងតម្រូវការជំនាញនាពេលអនាគត»។
តាមលោករដ្ឋមន្ត្រី ដោយយល់ឃើញអំពីបញ្ហាប្រឈមខាងលើ និងសក្តានុពលផ្នែកប្រជាសាស្ត្ររបស់កម្ពុជា រាជរដ្ឋាភិបាលនីតិកាលទី៦ បានដាក់ចេញនូវយុទ្ធសាស្ត្រចតុកោណដំណាក់កាលទី៤ សំដៅធានាកំណើនសេដ្ឋកិច្ចខ្ពស់និងប្រកបដោយចីរភាព តាមរយៈការទាញយកប្រយោជន៍ពីកាលានុវត្តភាពនៅក្នុងតំបន់ ចាប់យកបច្ចេកវិទ្យាថ្មីៗ និងចាប់យកឱកាស ក៏ដូចជាជម្នះរាល់ផលអវិជ្ជមាននៃបដិវត្តន៍ឧស្សាហកម្មទី៤ ព្រមទាំងលើកកម្ពស់ភាពប្រកួតប្រជែងរបស់កម្ពុជា។
លោកបណ្ឌិត អុិត សំហេង បានបញ្ជាក់បន្ថែមថា «ដើម្បីឈានទៅសម្រេចបានឋានៈជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០ ដោយផ្តោតជាពិសេសលើអាទិភាពដូចខាងក្រោម ៖ ១) – ការអភិវឌ្ឍធនធានមនុស្ស រួមមាន ការពង្រឹងគុណភាពវិស័យអប់រំវិទ្យាសាស្ត្រ និងបច្ចេកវិទ្យា ការបណ្តុះបណ្តាលជំនាញបច្ចេកទេស ការលើកកម្ពស់សេវាសុខភាពសាធារណៈនិងអាហារូបត្ថម្ភ និងការពង្រឹងសមភាពយេនឌ័រនិងការគាំពារសង្គម។ ២)- ការធ្វើពិពិធកម្មសេដ្ឋកិច្ច រួមមាន ការកែលម្អប្រព័ន្ធទ្បូជីស្ទីក ការលើកកម្ពស់ការតភ្ជាប់ផ្នែកដឹកជញ្ជូន ថាមពលនិងឌីជីថល ការអភិវឌ្ឍប្រភពកំណើនសេដ្ឋកិច្ចគន្លឹះនិងថ្មីៗ ការរៀបចំខ្លួនសម្រាប់សេដ្ឋកិច្ចឌីជីថលនិងការឆ្លើយតបនឹងបដិវត្តន៍ឧស្សាហកម្មទី៤ និងការជំរុញការអភិវឌ្ឍវិស័យហិរញ្ញវត្ថុនិងធនាគារ។ ៣) – ការអភិឌ្ឍវិស័យឯកជននិងការងារ រួមមាន ការអភិវឌ្ឍទីផ្សារការងារ ការលើកស្ទួយសហគ្រាសធុនតូចនិងមធ្យម និងសហគ្រិនភាព ការរៀបចំនិងអនុវត្តភាពជាដៃគូវិស័យសាធារណៈនិងឯកជន និងការពង្រឹងការប្រកួតប្រជែង»។
បើតាមលោករដ្ឋមន្ត្រី ក្រៅពីផ្តោតការយកចិត្តទុកដាក់ទៅលើចំណុចអាទិភាពសំខាន់ទាំង៣ខាងលើនេះ និងឱ្យស្របតាម គោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥ រាជរដ្ឋាភិបាលកម្ពុជាក៏បានដាក់ចេញជាគោលនយោបាយសំខាន់ៗ ក្នុងវិស័យការងារ និងបណ្តុះបណ្តាលវិជ្ជាជីវៈ។ លោកបណ្ឌិតបានបន្តថា គោលនយោបាយជាតិស្តីពីមុខរបរនិងការងារ ឆ្នាំ២០១៥-២០២៥ សំដៅបង្កើនឱកាសការងារសមរម្យ និងលើកកម្ពស់ផលិតភាពការងារ ជំរុញការអភិវឌ្ឍជំនាញនិងធនធានមនុស្ស ព្រមទាំងពង្រឹងអភិបាលកិច្ចទីផ្សារការងារ ដើម្បីឆ្លើយតបទៅនឹងតម្រូវការនៃការអភិវឌ្ឍសេដ្ឋកិច្ច-សង្គម និងការផ្លាស់ប្តូរនៃនិម្មាបនកម្មសេដ្ឋកិច្ច ទាំងក្នុងប្រទេស តំបន់ និងសកលលោក សំដៅសម្រេចបាននូវគោលបំណង៖ ១) – បង្កើនឱកាសការងារសមរម្យ និងមានផលិតភាពការងារខ្ពស់, ២) – លើកកម្ពស់ការអភិវឌ្ឍជំនាញនិងធនធានមនុស្ស និង៣) – ពង្រឹងអភិបាលកិច្ចទីផ្សារការងារ។
លោកបានបន្ថែមទៀតថា គោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥ មានចក្ខុវិស័យលើកកម្ពស់ជីវភាពរស់នៅ សេចក្តីថ្លៃថ្នូររបស់ប្រជាពលរដ្ឋ បង្កើនបាននូវកម្លាំងពលកម្មឬធនធានមនុស្សកម្ពុជាប្រកបដោយចំណេះដឹង សមត្ថភាព ជំនាញ ឥរិយាបថការងារ សីលធម៌វិជ្ជាជីវៈផលិតភាពខ្ពស់ និងមានលក្ខណៈប្រកួតប្រជែងសម្រាប់ការងារពេញមួយជីវិត និងមានគោលបំណងចំនួន៤ គឺ ១) – ពង្រឹងគុណភាពអប់រំបណ្តុះបណ្តាលបច្ចេកទេស និងវិជ្ជាជីវៈ, ២) – បង្កើនលទ្ធភាពទទួលបានការអប់រំបណ្តុះបណ្តាលបច្ចេកទេស និងវិជ្ជាជីវៈ, ៣) – លើកទឹក ចិត្តភា ពជាដៃគូរវាងរដ្ឋ និងឯកជន និង ៤-)អភិបាលកិច្ចនៃប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ។
បន្ថែមលើសពីនេះ នៅដើមឆ្នាំ២០១៩ នេះ ក្រសួងការងារ និងបណ្តុះបណ្តាលវិជ្ជាជីវៈ បានបន្តដាក់ចេញនូវ ផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ឆ្នាំ២០១៩-២០២៣ ដែលបានកំណត់នូវយុទ្ធសាស្ត្រគន្លឹះចំនួន៥ ដែលក្នុងនោះយុទ្ធសាស្ត្រទី២គឺ «ការធ្វើទំនើបកម្មប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ» ដើម្បីកសាងបានកម្លាំងពលកម្មដែលមានជំនាញវិជ្ជាជីវៈច្បាស់លាស់, គំនិតច្នៃប្រឌិត និងភាពប្រកួតប្រជែងខ្ពស់ដែលគាំទ្រដល់ការធ្វើពិពិធកម្មឧស្សាហកម្ម៕ កែសម្រួលដោយ ៖ សុឃាក់
ចែករំលែកព័តមាននេះ