រាជធានីភ្នំពេញ ៖ លោកស្រី ស៊ លីនណា ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី២៨ ខែឧសភា ឆ្នាំ២០១៩ បានចេញដីកាឃុំខ្លួនស្ត្រីពីរនាក់ម្តាយកូនពាក់ព័ន្ធរួមគំនិតគ្នាកាប់សម្លាប់កូនប្រសា…
រាជធានីភ្នំពេញ ៖ លោកស្រី ស៊ លីនណា ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី២៨ ខែឧសភា ឆ្នាំ២០១៩ បានចេញដីកាឃុំខ្លួនស្ត្រីពីរនាក់ម្តាយកូនពាក់ព័ន្ធរួមគំនិតគ្នាកាប់សម្លាប់កូនប្រសា ឬប្តី ទើបនឹងរៀបការថ្មីថ្មោង ដោយសារជម្លោះពាក្យសម្ដីរឿងប្រាក់ ១ម៉ឺនរៀលប៉ុណ្ណោះ ដាក់ពន្ធនាគារបណ្តោះអាសន្ន ។ ករណីនេះបានកើតឡើងកាលពីវេលាម៉ោងប្រមាណ៩ព្រឹក នៅចំណុចក្នុងបន្ទប់ជួលផ្ទះសង់ថ្មី តាមផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រួចហើយប្តីជាឪពុកកូនស្រីនាំទៅសារភាព ។
ជនសង្ស័យដែលជាឃាតករទី១-ឈ្មោះគង់ ធីតា អាយុ៤៩ឆ្នាំ(ជាម្តាយ) ស្នាក់នៅ សង្កាត់ទន្លេរបាសក់ ខណ្ឌចំការមន និងទី២-ឈ្មោះ ង៉ូយ សុម៉ារី អាយុ២០ឆ្នាំ ជា(ប្រពន្ធ) ស្នាក់នៅបន្ទប់ជួលកន្លែងកើតហេតុខាងលើ ។ ចំណែកជនរងគ្រោះឈ្មោះ គឹម យ៉ត អាយុ២៩ឆ្នាំ ជាខ្មែរកម្ពុជាក្រោម មានមុខរបរបុគ្គលិកក្រុមហ៊ុនលក់អចលនះទ្រព្យ ស្នាក់នៅក្នុងបន្ទប់ជួលខាងលើ និងមានស្រុកកំណើតកម្ពុជាក្រោម ។
តាមព័ត៌មានអោយដឹងថា ការប្រើហិង្សាឈានទៅចាក់សម្លាប់ប្តីរបស់ខ្លួន គីផ្តើមចេញពីទំនាស់ក្នុងគ្រួសាររឿងសុំប្រាក់១ម៉ឺនរៀល ប្តីមិនអោយ និងម្យ៉ាងទៀតអាចផ្តើមចេញពីរឿងគំនុំភ្លើងប្រចណ្ឌជាយូរមកហើយនោះ ។ នគរបាលអោយដឹងថា ជនសង្ស័យ និងជនរងគ្រោះបានរៀបការនឹងគ្នានៅថ្ងៃទី២៦ ខែមករា ឆ្នាំ២០១៩ នៅស្រុកកំណើតខាងប្រុសកម្ពុជាក្រោម ហើយក៏បាននាំគ្នាមកស្នាក់នោះផ្ទះកើតហេតុខាងលើ ។ ដោយឡែកនៅវេលាម៉ោងប្រមាណ៩ព្រឹក ថ្ងៃទី២៤ ខែឧសភា ជនសង្ស័យឈ្មោះ ង៉ូយ សុម៉ារី បានសុំលុយប្តីចំនួនមួយម៉ឺនរៀល ដើម្បីទិញអីញាំ ហើយប្តីមិនព្រមឲ្យ ក៏មានទំនាស់គ្នាបែកផ្សែង ។
ខណៈនោះបុរសជាប្តីក៏បានស្ទុះក្រោកឈរច្របាច់.កប្រពន្ធរបស់ខ្លួន ហើយប្រពន្ធក៏បានស្រែកហៅម្តាយឲ្យជួយ ។ ព័ត៌មានបានអោយដឹងទៀតថា ភ្លាមនោះជនសង្ស័យជាម្តាយឈ្មោះគឹម ធីតា ក៏បានស្ទុះទៅទាញកាន់កាំបិតបុ័ងតោ មកកាប់ជនរងគ្រោះជាកូនប្រសាចំកញ្ចឹង.ក មួយកាំបិត បណ្តាលឲ្យទន់ជង្គង់ដួល ។ ដោយសារតែខ្លាចតដៃស្ត្រីជាប្រពន្ធឈ្មោះង៉ូយ សុម៉ារី បានយកខ្សែភ្លើងចងដៃជើង និងទាញកូនកាំបិតចាក់ចំនួន២កូនកាំបិតចំ.ក សម្លាប់ហើយបាននាំគ្នាចាក់សោផ្ទះទៅទិញខ្សែជ័រនីឡុង ថង់ព្រមទាំងយកស្កុត រុំ និងចងច្រកសពដោយរុំភួង ប្រុងដឹកចេញតែពុំមានឱកាស ។ តាមព័ត៌មានអោយដឹងទៀតថា លុះនៅវេលាម៉ោងប្រមាណ៩យប់ ស្ត្រីជាម្តាយបានឲ្យកូនស្រីទៅផ្ទះសង្កាត់ទន្លេបាសាក់ ប្រាប់ប្តីរបស់ខ្លួនដែលជាមន្ត្រីនគរបាលពីរឿងហេតុ ហើយត្រូវប្តីនាំយកសារភាពត្រូវបាននគរបាលខណ្ឌសែនសុខឃាត់ខ្លួន និងបានបែករឿងឃាតកម្មនេះឡើង ។
តាមនគរបាលបានអោយដឹងថា កន្លងមកបន្ទាប់ពីរៀបការរួចនាង២នាក់ប្តីប្រពន្ធតែមានទំនាស់គ្នា ក្នុងគ្រួសារពីរឿងប្រចណ្ឌ ព្រោះប្តីតែងគេចវេស ពេលដែលនាងជាប្រពន្ធសុំប្តីទៅចុះសំបុត្រអាពាហ៍ពិពាហ៍ ប្តីមិនព្រមទៅហើយចេះពន្យាពេលម្តងថា ចាំ២ឆ្នាំ ម្តងថា ចាំ៣ឆ្នាំសិន ។ នាងជាប្រពន្ធបានរៀបរាប់អោយនគរបាលដឹងថា តាំងពីចាប់ដៃគ្នា នាងរស់នៅមិនដែលមានសេចក្តីសុខទេ ដោយប្តីមិនដែលអោយកាន់លុយទេ ពេលត្រូវការទិញអីសុំប្តី ពេលខ្លះអោយ ពេលខ្លះមិនត្រូវចិត្តអត់អោយនោះទេ ។
ដោយសារតែបែបនេះ នៅថ្ងៃទី២៣ ខែឧសភានេះ ស្ត្រីជាប្រពន្ធបានហៅម្តាយមកជួយមើលមិននឹកស្មានថា មានទំនាស់គ្នា ឈានទៅកាប់សម្លាប់ប្តី ក្លាយជាឃាតករបែបនេះ ។ នេះ គឺជាការរៀបរាប់ប្រាប់នគរបាលអោយដឹងតែម្ខាងប៉ុណ្ណោះ ៕ កែសម្រួលដោយ ៖ សុឃាក់
ចែករំលែកព័តមាននេះ