រាជធានីភ្នំពេញ ៖ បុរសជនជាតិចិនតៃវ៉ាន់ម្នាក់ដែលបានលាក់ទុកគ្រឿងញៀនប្រភេទហេរ៉ូអីុនទម្ងន់ជាង៩០ក្រាម បំណងនាំចេញពីប្រទេសកម្ពុជាឆ្លងដែនទៅកោះតៃវ៉ាន់នោះ បានត្រូវសាលាដំបូងរាជធានីភ្នំពេញលើកយកមកប្រកាសសាលក្រមនៅព្រឹកថ្ងៃទី២១ ខែមីនា ឆ្នាំ២០១១ ដោយសម្រេចផ្តន្ទាទោសដាក់ពន្ធនាគាររយៈពេល៧ឆ្នាំ និងពិន័យជាប្រាក់១៥លានរៀល ពីបទជួញដូរគ្រឿងញៀនឆ្លងដែន។ បុរសជនជាតិចិនតៃវ៉ាន់រូបនេះឈ្មោះKUO DAYU (ឃូ ដាយូ) ហៅ YEFFEREY អាយុ៤៣ឆ្នាំ បានត្រូវសមត្ថកិច្ចគយប្រចាំច្រកទ្វារព្រលានយន្តហោះអន្តរជាតិភ្នំពេញឃាត់ខ្លួនកាលពីថ្ងៃទី២៩ ខែសីហា ឆ្នាំ២០១០។ បន្ទាប់ពីការឃាត់ខ្លួនរួចមក ខាងគយប្រចាំការនៅច្រកទ្វារព្រលានយន្តហោះសហការជាមួយប៉ូលិសប្រឆាំងគ្រឿងញៀន បានដកហូតវត្ថុតាងគ្រឿងញៀនប្រភេទហេរ៉ូអីុន៣កញ្ចប់តូចមានទម្ងន់សរុប៩៩,៥ក្រាម និងសំភារមួយចំនួនទៀតនៅក្នុងវ៉ាលីស។
ក្រោយពីការឃាត់ខ្លួន និងដកហូតវត្ថុតាងរួចមក ប៉ូលិសប្រឆាំងគ្រឿងញៀនក៏បាននាំខ្លួនបុរសជនជាតិតៃវ៉ាន់រូបនេះទៅកាន់មន្ទីរប្រឆាំងគ្រឿងញៀនដើម្បីសាកសួរពីករណីលាក់ទុកគ្រឿងញៀននៅក្នុងវ៉ាលីស។ លុះមកដល់ថ្ងៃទី៣ ខែកញ្ញា ឆ្នាំ២០១០ ប៉ូលិសបានរៀបចំកសាងសំណុំរឿង និងបញ្ជូនជនជាប់ចោទ ព្រមទាំងវត្ថុតាងទៅសាលាដំបូងដើម្បីចាត់ការតាមច្បាប់។ រយៈពេលជិត៦ខែក្រោយមក ពោលគឺនៅថ្ងៃទី១០ ខែមីនា ឆ្នាំ២០១១ សាលាដំបូងរាជធានីភ្នំពេញបានលើកយករឿងក្តីនេះមកបើកសវនាការជំនុំជម្រះដោយមានការចូលរួមពីលោកឌុច គឹមសន ប្រធានក្រុមប្រឹក្សាជំនុំជម្រះ លោកសេង នាង លោកតែ សំអាង ជាសមាជិក និងលោកជេត ខេមរា ជាតំណាងអយ្យការ។
ដោយឆ្លើយតាមរយៈអ្នកបកប្រែ បុរសឈ្មោះ KUO DAYU បានបដិសេធថា ខ្លួនមិនបានប្រព្រឹត្តដូចការចោទប្រកាន់ទេ ពោលគឺក្នុងអំឡុងពេលដែលខ្លួនស្នាក់នៅក្នុងសណ្ឋាគារមានមនុស្សបានចេញចូលក្នុងបន្ទប់នោះ ដោយពេលនោះខ្លួនមានជម្លោះជាមួយឈ្មោះថាន់ ហើយប្រហែលជាឈ្មោះនេះបានប្រើល្បិចយកគ្រឿងញៀនទុកក្នុងវ៉ាលីស ៕
ចែករំលែកព័តមាននេះ