ខេត្តប៉ៃលិន ៖ ក្រោយពីជនសង្ស័យម្នាក់បានលួចចូលទៅក្នុងតំបន់អភិរក្ស កាលពីជាង១ខែកន្លងទៅនេះ ដើម្បីកាប់រំលំដើមគគីរធំៗចំនួន២ដើម ដែលជាដើមឈើដ៏ចំណាស់ មានអាយុប្រហែលជាង១០០ឆ្នាំ ហើយត្រូវបានគេលាក់រឿងយ៉ាងជិតឈឹង ។ តែរហូតមកដល់វេលាម៉ោង៥ និង៣០នាទីល្ងាចថ្ងៃទី២៧ ឧសភា មានការបង្ហើបឱ្យដឹងពីមន្ត្រីបរិស្ថានថា «ឈើគគីរធំៗដែលគេលួចកាប់» ស្ថិតនៅក្នុងដែនអភិរក្សត្រង់ចំណុចស្លេវ ក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ។
បើតាមប្រភពពីមន្ត្រីបរិស្ថានម្នាក់បានបញ្ជាក់ថា កាលពីថ្ងៃទី២២ មេសា កន្លងមក ខណៈមន្ត្រីអភិរក្ស
បានចេញល្បាតចុះទៅត្រួតពិនត្យមើលដើមគគីរចំនួន២ដើមធំៗ ដែលមានកម្ពស់ជាង៥០ម៉ែត្រ នៅចំណុចភូមិសាស្ត្រជើងភ្នំរមៀត ។ ប្រភពបន្តទៀតថា ដើមគគីរទាំង២ដើម ដែលគេលួចកាប់រំលំនេះ ត្រូវបានរាយការណ៍ជូនទៅខាងមន្ទីរបរិស្ថានខេត្តប៉ៃលិនម្តងរួចទៅហើយ ដើម្បីរក្សាទុកកាត់ធ្វើទូក ។ ប៉ុន្តែ ពេលកំលាំងអភិរក្សចូលទៅដល់មាត់ផ្លូវ ស្រាប់តែឃើញមានដានត្រាក់ទ័រឈូសសំដៅទៅកន្លែងដើមគគីរ
នោះ ។
ពេលនោះសង្ស័យថា មានគេលួចកាត់ ហើយខណៈពេលមន្ត្រីចូលទៅដល់ស្រាប់តែដើមគគីរទាំងពីរដើមនោះ ត្រូវបានជនសង្ស័យលួចយកម៉ាស៑ីនទៅអាររំលំអស់បាត់ទៅហើយ ដោយនៅជាប់នឹងដើមគគីរនោះមានសរសេរអក្សរអង់គ្លេស lai ។ តាមការត្រួតពិនិត្យប្រហែលអំឡុងពេលបុណ្យចូលឆ្នាំខ្មែរចំងាយផ្លូវឈូសទៅជិតនឹងដើមគគីរនោះ ប្រហែល៥០០ម៉ែត្រ ។ បើតាមប្រភពពីមន្ត្រីអភិរក្សបានបង្ហើបឱ្យដឹងថា គគីរទាំងពីរដើមនេះប្រវែងប្រហែល៥០ម៉ែត្រពីគល់ដល់ចុង ដែលមានមុខកាត់ប្រហែលជាង១ម៉ែត្រ ។
ពាក់ព័ន្ធនឹងបញ្ហានេះ លោក គឹម សុខា ប្រធានមន្ទីរបរិស្ថានខេត្តបានឱ្យដឹង នៅព្រឹកថ្ងៃទី២៨ ឧសភា នេះថា ជនសង្ស័យដែលលួចកាប់រំលំដើមគគីរទាំង២ដើម មានឈ្មោះ ឆាយ ឡៃ ភេទប្រុស អាយុ៥០ឆ្នាំ រស់នៅចំណុចខាងលើ ហើយគាត់ជាអ្នករកស៊ីកាត់ឈើលក់ ហើយនៅក្នុងបរិវេណផ្ទះគាត់ សំបូរទៅដោយឈើផងដែរ ។ លោកបន្តទៀតថា ក្រោយពេលហៅសួរនាំរួច ខាងក្រសួងធ្វើការពិន័យជាទឹកប្រាក់ចំនួន៣១លានរៀល ។ រីឯដើមឈើគគីរទាំង២ដើមដ៏ធំខាងលើ លោកនឹងឱ្យមន្ត្រីដឹកយកទៅរក្សាទុកសិន ដើម្បីចាត់ការតាមក្រោយ ។ (សម្រួលដោយ៖ ស្រីណា)
ចែករំលែកព័តមាននេះ