ខេត្តបាត់ដំបង ៖ ស្ត្រីម្នាក់ពេលកំពុងដើរទិញបន្លែក្នុងផ្សារ ស្រាប់តែប៉ះចំគ្រែដែកដែលឆ្លងចរន្តអគ្គីសនី ក៏បណ្ដាលឲ្យឆក់ដួលសន្លប់ ហើយក្រោយមកស្ត្រីរងគ្រោះបានស្លាប់ពេលបញ្ជូនទៅសង្គ្រោះដល់មណ្ឌលសុខភាពឃុំ ។
ហេតុការណ៍ខាងលើនេះបានបង្កការភ្ញាក់ផ្អើលក្នុងផ្សារកំប្រ៉ង់ ស្ថិតក្នុងភូមិកំប្រ៉ង់ ឃុំតាក្រី ស្រុកកំរៀង កាលពីម៉ោង៦និង៣០នាទីព្រឹកថ្ងៃទី២៨ ខែឧសភា ។
តាមប្រភពពីសមត្ថកិច្ចបានឲ្យដឹងថា ស្ត្រីជនរងគ្រោះដែលស្លាប់ឈ្មោះប៉ុន វ៉ាត អាយុ៤០ឆ្នាំ មុខរបរលក់ដូរ រស់នៅភូមិកំពង់ចម្លងលើឃុំតាក្រី ស្រុកកំរៀង។ ស្ត្រីរងគ្រោះបានជួបគ្រោះថ្នាក់ត្រូវឆក់ស្លាប់នៅពេលគាត់កំពុងដើរទិញបន្លែនៅក្នុងផ្សារ ហើយប៉ះចំគ្រែដែកមានឆ្លងចរន្តអគ្គីសនីដែលដាក់លក់ទំនិញនៅក្នុងផ្សារនោះ។
សមត្ថកិច្ចបានបញ្ជាក់ថា ពេលត្រូវចរន្តអគ្គីសនីឆក់ បណ្តាលឱ្យស្ត្រីរងគ្រោះដូលសន្លប់ តែភ្លាមៗនោះត្រូវបានក្រុមគ្រួសារនិងអ្នកភូមិជួយដឹកទៅសង្គ្រោះដល់មណ្ឌលសុខភាពមូលដ្ឋានដែរ តែស្ត្រីរងគ្រោះបានស្លាប់បាត់ទៅហើយ។
បើតាមប្រភពពីសាក្សីបាននិយាយប្រាប់សមត្ថកិច្ចឱ្យដឹងថា មូលហេតុដែលគ្រែដែកនោះមានឆ្លងចរន្តអគ្គីសនី គឺដោយសារម្ចាស់គ្រែយកកង្ហារដែលមានខ្សែដាច់រលាត់ដាក់នៅលើគ្រែ ហើយខ្សែភ្លើងដែលមានដាច់រលាត់នោះបានប៉ះជាប់នឹងគ្រែដែក ទើបឆ្លងចរន្តឆក់ស្ត្រីរងគ្រោះកំពុងដើររកទិញបន្លែក្នុងផ្សារ ហើយក៏ប៉ះគ្រែដែកនោះ បណ្តាលឱ្យឆក់ស្លាប់តែម្ដង។
ពាក់ព័ន្ធនឹងករណីខាងលើនេះ សមត្ថកិច្ចបាននិយាយថា មន្ត្រីមូលដ្ឋានបានចុះទៅកាន់កន្លែងកើតហេតុដើម្បីពិនិត្យភ្លាមៗផងដែរ ក្រោយពីទទូលបានដំណឹងខាងលើនេះ ហើយសមត្ថកិច្ចបានបញ្ជាក់ថា គ្រែដែកនោះពិតជាឆ្លងចរន្តអគ្គីសនីពីខ្សែកង្ហាដែលដាច់រលាត់មែន ដោយសារម្ចាស់មានការធ្វេសប្រហែស។
ក្រោយពីពិនិត្យរួច ពេលនេះមន្ត្រីជំនាញកំពុងធ្វើការសាកសួរព័ត៌មាន និងបានធ្វើកំណត់ហេតុប្រគល់សពស្ត្រីជនរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណីហើយ៕
ចែករំលែកព័តមាននេះ