ការនាំចេញគ្រឿងសមុទ្រទៅកាន់ប្រទេសជាសមាជិក CPTPP កើន ១៥%
ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃទី ២៧ ខែឧសភាកន្លងមកថា ការនាំចេញគ្រឿងសមុទ្រវៀតណាមទៅកាន់ប្រទេសជាសមាជិកទាំង…
ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃទី ២៧ ខែឧសភាកន្លងមកថា ការនាំចេញគ្រឿងសមុទ្រវៀតណាមទៅកាន់ប្រទេសជាសមាជិកទាំង ១០ នៃកិច្ចព្រមព្រៀងពាណិជ្ជកម្ម CPTPP បានកើនឡើងយ៉ាងខ្លាំងតាំងពីពេលកិច្ចព្រមព្រៀងចាប់មានប្រសិទ្ធិភាពកាលពីដើមឆ្នាំនេះ។
យោងទៅតាមអាជ្ញាធរកែច្នៃកសិផល និងអភិវឌ្ឍន៍ទីផ្សារក្រោមក្រសួងកសិកម្មនិងអភិវឌ្ឍន៍ជនបទបានឲ្យដឹងថា ការនាំចេញគ្រឿងសមុទ្របានកើនឡើងជិត ១៥% មកស្មើ ៥០២លានដុល្លារកាលពី៤ខែដំបូងនា ឆ្នាំនេះ។
ការនាំចេញគ្រឿងសមុទ្រសរុបស្មើ ២.៥ប៊ីលានដុល្លារ ឬកើនឡើងបាន ២.៤%។ ប៉ុន្តែការនាំចេញទៅកាន់ទីផ្សារជាច្រើនទៀតមានការធ្លាក់ចុះ។ ផ្ទុយមកវិញ ការនាំចេញទៅកាន់សមាជិក CPTPP ដូចជាម៉ិកស៊ិកបានកើនឡើង៣៥.៦% ម៉ាឡេស៊ីកើនឡើង២២% និងកាណាដាកើនឡើងជិត ១៤%ផងដែរ។
ប្រទេសជប៉ុនដែលជាសមាជិកមួយដែរនៃកិច្ចព្រមព្រៀងខាងលើរក្សាតំណែងជាប្រទេសនាំចូលគ្រឿងសមុទ្រវៀតណាមច្រើនជាងគេ។ យោងទៅតាមក្រុមហ៊ុនគ្រឿងសមុទ្របានឲ្យដឹងដែរថា ការបន្ទាប ឬលុបបំបាត់ពន្ធជាច្រើនសម្រាប់គ្រឿងសមុទ្រក្រោម CPTPP បានជួយជំរុញដល់ការនាំចេញរបស់ពួកគេទៅកាន់ប្រទេសជាសមាជិកកិច្ចព្រមព្រៀង។
សមាគមអ្នកនាំចេញនិងផលិតគ្រឿងសមុទ្រវៀតណាមបានឲ្យដឹងថា កិច្ចព្រមព្រៀង CPTPP នឹងផ្តល់អត្ថប្រយោជន៍ដល់អ្នកនាំចេញបង្គាទៅកាន់ទីផ្សារកាណាដាឲ្យមានប្រៀបជាងដៃគូប្រកួតប្រជែងដូចជាឥណ្ឌា ថៃ និងឥណ្ឌូនេស៊ី ដែលមិនមែនជាប្រទេសជាសមាជិកកិច្ចព្រមព្រៀងខាងលើ។
ដើម្បីទាញអត្ថប្រយោជន៍ពីឱកាសដែលបង្កើតឡើងដោយកិច្ចព្រមព្រៀងពាណិជ្ជកម្មខាងលើ ក្រុមហ៊ុនគ្រឿងសមុទ្រជាច្រើនបានពង្រីករោងចក្រ ទិញម៉ាស៊ីន និងឧបករណ៍ទំនើបៗ ព្រមទាំងបង្កើតកសិដ្ឋានចិញ្ចឹមថ្មីៗដើម្បីជួបនឹងស្តង់ដារទីផ្សារផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ