ក្រុងប៉ោយប៉ែត ៖ រថយន្តធុនធំដឹកធុងហ្គាសចូលមកពីប្រទេសសៀមតាមច្រករបៀងមួយចំនួននៅតាមខ្សែបន្ទាត់ព្រំដែនកម្ពុជា-សៀមក្នុងខេត្តបន្ទាយមានជ័យ គេឃើញមានក្រុមហ៊ុនដឹកជញ្ជូនធុងហ្គាសមួយចំនួនធ្វើសកម្មភាពយ៉ាងគគ្រឹកគគ្រេងទាំងថ្ងៃទាំងយប់ ហើយនិងមានរថយន្តដឹកធុងហ្គាសរបស់ក្រុមហ៊ុនខ្លះដឹកឆ្លងកាត់តាមបណ្តាភូមិ និងបំផ្លាញផ្លូវលំមួយចំនួននៅក្នុងក្រុងប៉ោយប៉ែត ។
ជាក់ស្តែង គេឃើញមានរថយន្តដឹកធុងហ្គាសរបស់ក្រុមហ៊ុន S.K និងក្រុមហ៊ុនស្លឹកចាកដឹកធុងហ្គាសនាំចូលមកពីប្រទេសសៀមតាមច្រករបៀងក្នុងឃុំអូរបីជាន់ដោយឆ្លងកាត់តាមបណ្តាភូមិចូលមកក្នុងក្រុងប៉ោយប៉ែត ហើយបានបំផ្លាញផ្លូវលំមួយចំនួនផងដែរ ។ តាមប្រភពព័ត៌មានមួយបានបញ្ជាក់ថា មានក្រុមហ៊ុនដឹកធុងហ្គាសឈ្មោះស្លឹកចាក បានដឹកធុងហ្គាស ដោយរថយន្តប្រភេទយីឌុបដែលក្នុងមួយរថយន្តមានធុងហ្គាសប្រមាណជាង២០០ធុង ហើយដឹកពីឃុំអូរបីជាន់ ចូលមកក្នុងក្រុងប៉ោយប៉ែត ឆ្លងកាត់ផ្លូវលំជាច្រើនខ្សែទើបមកដល់កន្លែងស្តុករបស់ខ្លួន ។
ទន្ទឹមនោះ ពលរដ្ឋនៅតាមបណ្តាភូមិបានប្រាប់ឱ្យដឹងថា រថយន្តធុនធំដឹកធុងហ្គាសរបស់ក្រុមហ៊ុនបានបើកគគ្រឹកគគ្រេងទាំងថ្ងៃទាំងយប់ និងបើកបរក្នុងល្បឿនលឿនហុយដីទ្រលោមធ្វើឱ្យប៉ះពាល់ដល់ផ្លូវដង្ហើមអ្នកភូមិដែលរស់នៅតាមដងផ្លូវនោះ ។ ម្យ៉ាងទៀត រថយន្តធុនធំដឹកធុងហ្គាសរបស់ក្រុមហ៊ុនទាំងអស់នោះ មិនបានគិតពីផលពិបាកក្នុងការរស់នៅ និងធ្វើដំណើររបស់ប្រជាពលរដ្ឋទេ ដោយរថយន្តទាំងនោះបានដឹកធ្ងន់ធ្វើឱ្យខូចផ្លូវអស់មួយចំនួនផងដែរ ហើយផ្លូវជាច្រើនខ្សែនៅក្នុងក្រុងប៉ោយប៉ែតក៏បានខូចខាតដោយសារតែរថយន្តធុនធំដឹកធ្ងន់ហួសការកំណត់នេះ ។ មិនត្រឹមប៉ុណ្ណោះសោតដីនៅក្រុងប៉ោយប៉ែតនេះ ស្អិតជាប់ជើង ពេលមានភ្លៀងធ្លាក់ម្តងៗរអិលធ្វើឱ្យពលរដ្ឋជួបការពិបាកក្នុងការធ្វើដំណើរខ្លាំងណាស់ ។
ពលរដ្ឋបានស្នើទៅអាជ្ញាធរមានសមត្ថកិច្ច គួរចាត់វិធានការចំពោះរថយន្តដឹកធ្ងន់លើសចំណុះដែលបើកឆ្លងកាត់តាមផ្លូវលំទាំងនោះផងពីព្រោះរដូវវស្សាជិតមកដល់ហើយ ដែលជាបញ្ហា ធ្វើឱ្យពួកគាត់មានការព្រួយបារម្ភ ៕
ចែករំលែកព័តមាននេះ