រាជធានីភ្នំពេញ ៖ ក្រោយខកខានការហោះហើរត្រង់ទាំងស្រុងពីឥណ្ឌូនេស៊ីមកកម្ពុជាជិត ៥០ឆ្នាំ ពេលនេះកម្ពុជា-ឥណ្ឌូនេស៊ី បានឯកភាពគ្នារៀបចំឱ្យមានការហោះហើរត្រង់ជាមួយគ្នាឡើងវិញ នាចុងខែមិថុនា ឆ្នាំ២០១៩ ខាងមុខនេះ តាមរយៈក្រុមហ៊ុនអាកាសចរណ៍មួយ…
រាជធានីភ្នំពេញ ៖ ក្រោយខកខានការហោះហើរត្រង់ទាំងស្រុងពីឥណ្ឌូនេស៊ីមកកម្ពុជាជិត ៥០ឆ្នាំ ពេលនេះកម្ពុជា-ឥណ្ឌូនេស៊ី បានឯកភាពគ្នារៀបចំឱ្យមានការហោះហើរត្រង់ជាមួយគ្នាឡើងវិញ នាចុងខែមិថុនា ឆ្នាំ២០១៩ ខាងមុខនេះ តាមរយៈក្រុមហ៊ុនអាកាសចរណ៍មួយ ជាមួយនឹងការរំពឹងទុកថានឹងមានកំណើនទេសចរមកកម្ពុជាបន្ថែមទៀត ។ព្រមជាមួយគ្នានោះផងដែរ ថ្នាក់ដឹកនាំជាន់ខ្ពស់របស់ប្រទេសឡាវ ក៏បានអះអាងថាឡាវ នឹងបើកការហោះហើរមកកម្ពុជាឡើងវិញនាខែតុលាខាងមុខ គោលដៅសំខាន់មានភ្នំពេញ-សៀមរាប-ព្រះសីហនុ ។
ដំណឹងល្អនៃការតភ្ជាប់ការហោះហើរត្រង់ពីឥណ្ឌូស៊ី និងពីប្រទេសឡាវមកកាន់កម្ពុជាត្រូវបានប្រកាសឲ្យដឹងនៅក្នុងកម្មវិធីពីរដាច់ដោយឡែកពីគ្នាកាលពីថ្ងៃទី ២៤ និងថ្ងៃទី ២៥ ខែឧសភា កន្លងទៅនេះ ។
លោក Heriyanto អនុប្រធានប្រតិបត្តិនៃក្រុមហ៊ុនអាកាសចរណ៍មួយរបស់ឥណ្ឌូនេស៊ី បានថ្លែងឲ្យដឹងនៅក្នុងសន្និសីទសារព័ត៌មាននៅទីស្តីការក្រសួងទេសចរណ៍ នាថ្ងៃទី២៥ ខែឧសភា ឆ្នាំ២០១៩ ថា ក្រុមហ៊ុនអាកាសចរណ៍របស់ឥណ្ឌូនេស៊ី នឹងបើកការហោះហើរត្រង់ពីរដ្ឋធានីហ្សាកាតាមករាជធានីភ្នំពេញ នាចុងខែមិថុនា ឆ្នាំ២០១៩ ខាងមុខនេះ។ លោកបានបន្តថា នៅពេលជើងហោះហើរត្រង់ហ្សាកាតា-ភ្នំពេញដំណើរការទៅរលូនល្អហើយ ក្រុមហ៊ុនលោកមុខជាពង្រីកការហោះហើរត្រង់ ទៅកាន់គោលដៅទេសចរណ៍សំខាន់ៗរបស់កម្ពុជាផ្សេងទៀត ដូចជាហោះហើរត្រង់ពីរដ្ឋធានីហ្សាកាតាមកខេត្ត សៀមរាប-អង្គរ និងខេត្តព្រះសីហនុជាដើម ឬពីកោះបាលីដែលតំបន់ទេសចរណ៍ដ៏សំខាន់របស់ឥណ្ឌូនេស៊ី មកកាន់កម្ពុជាបន្ថែមផងដែរ។
លោកបណ្ឌិត ថោង ខុន រដ្ឋមន្ត្រីក្រសួង ទេសចរណ៍កម្ពុជាបានមានប្រសាសន៍ថា «ការតភ្ជាប់ជើងហោះហើរត្រង់នេះពិត ជាមានសារៈសំខាន់ណាស់ក្នុងការជំរុញកំណើន សេដ្ឋកិច្ចនិងទេសចរណ៍រវាងប្រទេសជាតិយើងទាំងពីរ ជាពិសេសពង្រឹងពង្រីកទំនាក់ទំនងរវាងប្រជាជាតិ និងប្រជាជនយើងទាំងពីរឱ្យកាន់តែរឹងមាំថែមទៀត » ។ លោករដ្ឋមន្ត្រីបានបន្ថែមថា ការតភ្ជាប់ជើងហោះហើរត្រង់នេះ គឺជាចូលរួមចំណែកលើកម្ពស់ចំណងមិត្តភាព សាមគ្គីភាព និងកិច្ចសហប្រតិបត្តិ ការរវាងប្រទេសយើងទាំងពីរ ក៏ដូចជាការចូលរួមអបអរសាទរខួបលើកទី៦០ នៃទំនាក់ទំនងការទូតកម្ពុជា-ឥណ្តូនេស៊ី។
លោក ថោង ខុន ក៏បានរំលឹកថា ការបើកឲ្យមានការហោះហើរត្រង់មកកម្ពុជានេះ បានធ្វើឡើងក្រោយពីមានការផ្អាកអស់រយៈពេលជិត ៥០ឆ្នាំ កន្លងមក ដែលក្នុងអំឡុងទស្សវត្សទី៧០ ធ្លាប់មានការហោះហើរត្រង់ពី ភ្នំពេញ-ហ្សាកាតា-ភ្នំពេញ តាមរយៈក្រុមហ៊ុន Royal Air Cambodge។ លោកបានបន្តថា កម្ពុជានិងឥណ្តូណេស៊ី មានប្រវត្តិទំនាក់ទំនងល្អជាមួយគ្នាតាំងពីយូរយារណាស់មកហើយ។ រដ្ឋមន្ត្រីក្រសួងទេសចរណ៍កម្ពុជា ក៏បានឱ្យដឹងដែរថា ការហោះហើរត្រង់នេះនឹងជួយជំរុញលំហូរទេសចរទៅវិញទៅមករវាងប្រទេសទាំងពីរកាន់តែច្រើន។ ទេសចរកម្ពុជាអាចទៅដល់រដ្ឋធានីហ្សាកាតា ទៅលេងកោះបាលី តំបន់បេតិកភណ្ឌប្រាសាទប៊ូរ៉ូប៊ូឌូ និងតំបន់ទេសចរណ៍ដទៃទៀត ហើយទេសចរឥណ្ឌូនេស៊ី ក៏អាចមកលេងកម្សាន្តតាមគោលដៅទេសចរណ៍នានា នៅកម្ពុជាកាន់តែងាយស្រួល និងឆាប់រហ័សផងដែរ។
រដ្ឋមន្ត្រីបានអំពាវនាវដល់ក្រុមហ៊ុនឯកជន និងទីភ្នាក់ងារទេសចរណ៍នៃប្រទេសទាំងពីរ ចូលរួមយ៉ាងសកម្មក្នុងការឃោសនាផ្សព្វផ្សាយការហោះហើរត្រង់ពីឥណ្ឌូនេស៊ីមកកម្ពុជានេះ ដើម្បីជំរុញលំហូរទេសចរទៅវិញទៅមករវាងប្រទេសទាំងពីរ។ជាងនេះទៅទៀត លោក ថោង ខុន ក៏បានប្រកាសអំពាវនាវដល់វិនិយោគិនជាតិ និងអន្តរជាតិ ជាពិសេសវិនិយោគិនឥណ្ឌូនេស៊ី ប្រតិបត្តិករទេសចរណ៍ និងភាគីពាក់ព័ន្ធទាំងអស់ សូមមកវិនិយោគក្នុងវិស័យទេសចរណ៍នៅកម្ពុជាឱ្យបានកាន់ច្រើនថែមទៀត ព្រោះកម្ពុជាមានច្បាប់វិនិយោគដែលសាកសមបំផុតសម្រាប់វិនិយោគិនបរទេស ជាពិសេសច្បាប់ស្តីពីការបង្កើតតំបន់ទេសចរណ៍ពិសេស (Prestige Tourism Zone)។
លោក Suirman Hasseng ឯកអគ្គរដ្ឋទូតឥណ្ឌូនេស៊ីប្រចាំនៅកម្ពុជាបានឱ្យដឹងថាក្នុងរយៈពេល៤៩ឆ្នាំ ចាប់ពីទសវត្សទី៧០មកនេះ ជាលើកទីមួយហើយដែលមានការហោះហើរត្រង់ភ្ជាប់ពីឥណ្ឌូនេស៊ីមកកម្ពុជា ដែលនេះជាព្រឹត្តិការណ៍ប្រវត្តិសាស្ត្រសម្រាប់កម្ពុជា។ ដោយឡែក ឯកអគ្គរដ្ឋទូតឡាវប្រចាំកម្ពុជា លោកអាមផៃ គីនដាវង្ស (Amphay Kindavong) ជាឱកាសជំនួបពិភាក្សាជាមួយលោកថោង ខុន រដ្ឋមន្ត្រី នារសៀលថ្ងៃទី២៤ ខែឧសភា ឆ្នាំ២០១៩ បានអះអាងថា នាអំឡុងខែតុលាឆ្នាំ២០១៩ ខាងមុខនេះ ក្រុមហ៊ុនអាកាសចរណ៍មួយរបស់ឡាននឹងចាប់ផ្ដើមបើកការហោះហើរត្រង់មកកាន់កម្ពុជាឡើងវិញក្នុងនោះឡាវនឹងបើកការហោះហើរត្រង់ដំបូងពីរដ្ឋធានីវៀងចន្ទន៍មករាជធានីភ្នំពេញ ហើយនឹងបើកការហោះហើរមកកាន់ខេត្តសៀមរាប និងខេត្តព្រះសីហនុ ជាបន្តបន្ទាប់ទៀត។
ក្រោយបញ្ចប់ជំនួបពិភាក្សាខាងលើឯកឧត្តម តុប សុភ័ក អនុរដ្ឋលេខាធិការ និងជាអ្នកនាំ ពាក្យក្រសួងទេសចរណ៍ បានថ្លែងប្រាប់ក្រុមអ្នកសារព័ត៌មានថា លោក អាមផៃ គីនដាវង្ស បានជម្រាបជូនលោករដ្ឋមន្ត្រី ថោង ខុន ពេលដែលព្រលានយន្តហោះនៅតំបន់វិស្សមកាលទេសចរណ៍តារាសាគរ ខេត្តកោះកុង ត្រូវបានសាងសង់រួចរាល់នៅក្រោយឆ្នាំ២០២០ឡាវនឹងបន្តបើកការហោះហើរត្រង់ទៅកាន់កន្លែងនេះបន្ថែមទៀត ដើម្បីនាំភ្ញៀវទេសចរទៅទស្សនាកម្សាន្តនៅតារាសាគរ និងតំបន់នានានៅខេត្ត កោះកុង។
ត្រង់ចំណុចនេះបង្ហាញថា ភ្ញៀវទេសចរឡាវ និងភ្ញៀវទេសចរប្រទេសទី៣ (ប្រហែលភាគច្រើនភ្ញៀវជនជាតិចិន) ហាក់ដូចជាចាប់ អារម្មណ៍ខ្លាំង ចំពោះតំបន់វិស្សមកាលទេស ចរណ៍តារាសាគរ និងតំបន់ទេសចរណ៍តាមមាត់សមុទ្ររបស់កម្ពុជា។
បើតាមអ្នកនាំពាក្យក្រសួងទេសចរណ៍ កាលពីឆ្នាំ២០១៨ កន្លងទៅ កម្ពុជាទទួលបានភ្ញៀវទេសចរឡាវប្រមាណជាង ៤២ម៉ឺននាក់។ ដោយឡែក ក្នុងរយៈពេល៤ខែ ឆ្នាំ២០១៩នេះ កម្ពុជាទទួលបានទេសចរឡាវប្រមាណជាង ១២ម៉ឺននាក់ ឈរលើចំណាត់ថ្នាក់លេខ៣ ក្នុងចំណោមទេសចរអន្តរជាតិ ១០ប្រទេស ដែលមកទស្សនាកម្ពុជា (Top 10)។ ប្រទេសឡាវ ត្រូវបានគេស្គាល់ថាជាប្រទេសសម្បូរទៅដោយតំបន់អេកូទេសចរណ៍ និងតំបន់បេតិកភណ្ឌ ប៉ុន្តែប្រទេសឡាវមិនមានសមុទ្រនោះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ