មនុស្សគ្រប់រូបតែងមានវិបត្តិផ្លូវចិត្ត គ្រាន់តែថាអ្នកខ្លះស្រាលអាចដោះស្រាយបាន និងខ្លះទៀតមានបញ្ហាធ្ងន់ធ្ងរមិនអាចដោះស្រាយចេញ តែងជួបនូវការលំបាកសម្រាប់ជីវិតរស់នៅ ហើយពេលខ្លះក៏អាចឈានទៅដល់វិកលចរិតក៏មាន ។
ជួបជាមួយលោកវេជ្ជបណ្ឌិតយឹម សុបុត្រា ឯកទេសវិកលវិទ្យានៃគ្លីនិកសាន់រ៉ាយបានប្រាប់កោះសន្តិភាពឱ្យដឹងថា ជំងឺវិកលចរិតគឺជាក្រុមជំងឺផ្លូវចិត្តធ្ងន់ធ្ងរ បុគ្គលដែលមានជំងឺវិកលចរិតមិនអាចធ្វើការបែងចែករវាងការពិត និងភាពស្រមើស្រមៃរបស់ពួកគេបានឡើយ ។ ចាប់ផ្តើមពីមួយនាទីឡើងទៅបើពួកគេមានជំនឿខុសប្លែកពីធម្មតា ឬមើលឃើញនូវអ្វីដែលអ្នកផងទាំងពួងមើលមិនឃើញនោះ ពួកគេមានជំងឺវិកលចរិតពិតហើយ ។
ជំងឺវិកលចរិតនឹងអាចប៉ះពាល់ទៅលើមនុស្សគ្រប់វ័យ គ្រប់ប្រភេទ ។ ជំងឺនេះបុរសអាចកើតមានច្រើនជាងស្ត្រីក្នុងចន្លោះអាយុចាប់ពី១៧ទៅ២៨ឆ្នាំ ។ ក្រុមគ្រួសារពិបាកសម្គាល់នូវអាការៈជំងឺវិកលចរិត ប្រសិនបើមិនបានយកចិត្តទុកដាក់ចំពោះរោគសញ្ញាមានដូចជា ៖
១-បញ្ចេញអាកប្បកិរិយាចម្លែក ឬកាច
២-បង្កឱ្យមានគ្រោះថ្នាក់ដល់ខ្លួនឯង ឬអ្នកដទៃ
៣-និយាយច្រើន និយាយតែឯង ដើរឬរត់ចេញក្រៅផ្ទះដោយគ្មានមូលហេតុ
៤-ការថយចុះសកម្មភាពប្រចាំថ្ងៃ ឬបាត់បង់ទាំងស្រុង
៥-សង្ស័យច្រើនទៅលើមនុស្សដែលរស់នៅជុំវិញខ្លួនថា ពួកគេបុ៉នប៉ងធ្វើអាក្រក់ទៅលើខ្លួន
៦-មានជំនឿខុសប្លែកពីធម្មតា អួតអាងខ្លួនឯង
៧-ឮសំឡេង ឬមើលឃើញនូវអ្វីដែលអ្នកផងទាំងពួងនៅជុំវិញខ្លួនមើលមិនឃើញ
លោកអ្នកត្រូវចងចាំថា រោគសញ្ញាខាងលើនេះស្តែងចេញជារោគសញ្ញាវិកលចរិត ។
ចំពោះមូលហេតុដែលបណ្តាលឱ្យកើតមានជំងឺផ្លូវចិត្តធ្ងន់ធ្ងរមាន ៖
-បញ្ហាគ្រួសារ និងសង្គម
-អតុល្យភាពសារធាតុគីមីក្នុងប្រព័ន្ធប្រសាទ
-ស្ថានភាពជំងឺផ្លូវកាយមួយចំនួន
-ការសេពគ្រឿងស្រវឹង និងគ្រឿងញៀន
-ផលប៉ះពាល់ចំពោះសារធាតុមួយចំនួន…។
ការព្យាបាលជំងឺផ្លូវចិត្តធ្ងន់ធ្ងរមាន ៖
-ការឱ្យសម្រាកព្យាបាលគឺជាការចាំបាច់បំផុត
-ការព្យាបាលដោយឱសថប្រឆាំងនឹងជំងឺវិកលចរិត
-ព្យាបាលតាមបែបចិត្តសាស្ត្រ
-គ្រប់គ្រងស្ត្រេស
-គាំទ្រផ្លូវចិត្ត ផ្តល់ប្រឹក្សា
-ការស្តារសតិបញ្ញា ស្មារតី និងកាយសម្បទា
-កិច្ចសហការយ៉ាងជិតស្និទ្ធពីក្រុមគ្រួសារ និងសហគមន៍
-អន្តរាគមន៍ទប់ស្កាត់មិនឱ្យមានការលាប់ឡើងវិញ ។
ចំពោះវិធានការការពារអ្នកដែលមានបញ្ហាផ្លូវចិត្តធ្ងន់ធ្ងរមាន ៖
-ប្រើប្រាស់បំណិនជីវិតក្នុងការដោះស្រាយ សម្របទៅនឹងស្ថានភាពជីវិតរស់នៅប្រចាំថ្ងៃ
-បញ្ឈប់ការសេពគ្រឿងស្រវឹង ឬគ្រឿងញៀន
-អនុវត្តតាមវេជ្ជបញ្ជាដោយពិសាថ្នាំឱ្យបានទៀងទាត់
-ផ្តល់ព័ត៌មានដល់គ្រូពេទ្យជាបន្ទាន់ក្នុងករណីថ្នាំមានផលវិបាក
-អ្នកជំងឺនិងក្រុមគ្រួសារត្រូវសហការជាមួយគ្រូពេទ្យដើម្បីរៀនសូត្រអំពីបញ្ហាជំងឺផ្លូវចិត្ត
យកល្អមុននឹងស្វែងរកការព្យាបាល គួរសម្គាល់មើលនូវអាការៈដូចដែលបានរៀបរាប់មកខាងលើ ។ ការស្វែងរកកិច្ចប្រឹក្សា និងការព្យាបាលពីអ្នកជំនាញតាំងពីដំបូងវាមានសារសំខាន់បំផុត ៕
ចែករំលែកព័តមាននេះ