រាជធានីភ្នំពេញ ៖ ទីភ្នាក់ងារសហ ប្រតិបត្តិការអន្តរជាតិនៃប្រទេសជប៉ុន ហៅកាត់ថា (JICA) បានប្រកាសឲ្យដឹងថា ខ្លួនបានផ្ទេរភាគហ៊ុនដែលនៅសេសសល់ទាំងអស់នៃកំពង់ផែស្វយ័តក្រុងព្រះសីហនុទៅកាន់ក្រុមហ៊ុន Kamigumi Co. , Ltd. (Kamigumi) ដែលជាក្រុមហ៊ុនដឹកជញ្ជូនតាមកំពង់ផែនាំមុខរបស់ជប៉ុន នាំឲ្យភាគហ៊ុនដែល JICA ទិញពីមុនទាំងអស់ត្រូវបានផ្ទេរទៅឲ្យក្រុមហ៊ុនជប៉ុនចំនួនពីរ។ នេះបើយោងតាមសេចក្តីប្រកាសព័ត៌មានចុះថ្ងៃទី ២៤ ខែឧសភា ឆ្នាំ ២០១៩ របស់ JICA។
ក៏ប៉ុន្តែ JICA បើទោះបីជាបានផ្ទេរភាគហ៊ុនទៅឲ្យក្រុមហ៊ុនជប៉ុនដឹកជញ្ជូនជប៉ុនដ៏ធំមួយនេះក៏ដោយ តែ «JICA និងក្រុមហ៊ុនជប៉ុនទាំងអស់នឹងនៅតែបន្តចែករំលែកបទពិសោធន៍គ្រប់គ្រងកំពង់ផែ និងកិច្ចសហប្រតិបត្តិការផ្សេងៗសម្រាប់ ការអភិវឌ្ឍកំពង់ផែស្វយ័តក្រុងព្រះសីហនុនាពេលអនាគត»។
សូមបញ្ជាក់ថា JICA បានទិញភាគហ៊ុនរបស់កំពង់ផែស្វយ័តក្រុងព្រះសីហនុ ដាក់លក់ជាសាធារណកាលពីខែមិថុនា ឆ្នាំ ២០១៧ ។ កំពង់ផែស្វយ័តក្រុងព្រះសីហនុមានជិត ៩៩ ភាគរយនៃភាគហ៊ុនដែលបានជួញដូរនៅផ្សារមូលបត្រកម្ពុជា ។ កាលពីខែ ធ្នូ ឆ្នាំ 2018 JICA បានផ្ទេរភាគហ៊ុនខ្លះនៃភាគហ៊ុនរបស់ខ្លួន ទៅសាជីវកម្មកំពង់ផែអន្តរជាតិ Kobe-Osaka ដែលជាក្រុមហ៊ុនសម្រាប់កំពង់ផែ Hanshin ប្រទេសជប៉ុន។ ជាថ្មីម្តងទៀត JICA បានផ្ទេរភាគហ៊ុនដែលនៅសេសសល់របស់ខ្លួនទាំងអស់ ទៅឲ្យក្រុមហ៊ុន Kamigumi ដែលជាបច្ចេកវិទ្យា គោលនយោបាយដឹកជញ្ជូនទំនិញដ៏ធំមួយរបស់ជប៉ុន។ ក្រោយការប្រកាសឲ្យសាធាណជនបានដឹងជាផ្លូវការនៃការផ្ទេរភាគហ៊ុនដែលនៅសេសសល់ទាំងអស់របស់ខ្លួនទៅឲ្យក្រុម ហ៊ុន Kamigumi Co. , Ltd ហើយនោះ លោក OGAWA Shigenori, អគ្គនាយកនាយកដ្ឋានតំបន់អាស៊ីអាគ្នេយ៍ និងប៉ាស៊ីហ្វិករបស់ទីភ្នាក់ងារ JICA ប្រចាំទីក្រុងតូក្សូ បានជួបពិភាគ្សាការងារជាមួយនឹង លោក លូ គឹមឈន់ ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ និងថ្នាក់ដឹកនាំផ្សេងទៀតពិភាគ្សាស្តីពី អនុស្សរណៈនៃកិច្ចសហប្រតិបត្តិការលើភាពជាដៃគូយុទ្ធសាស្ត្រ (MoC) រវាងទីភ្នាក់ងារ JICA និងកំពង់ផែក្រុងស្វយ័តព្រះសីហនុ កាលពីរសៀលថ្ងៃទី ២៤ ឧសភា ផងដែរ ។
«តាមរយៈអនុស្សរណៈនេះ JICA នឹងបន្តគាំទ្រកំពង់ផែស្វយ័តក្រុងព្រះសីហនុ ដើម្បីអភិវឌ្ឍ និងពង្រឹងនូវរចនាសម្ព័ន្ធរូបវ័ន្តកំពង់ផែ តាមរយៈកម្មវិធីសហប្រតិបត្តិការបច្ចេកទេស (TCP) គម្រោងជំនួយឥតសំណង (GA) គម្រោង(ODA Loans)»។ នេះបើយោងតាមការប្រកាសព័ត៌មានរបស់កំពង់ផែស្វយ័តក្រុងព្រះសីហនុ ។ ប្រភពដដែលបានឲ្យដឹងផងដែរថាភាគីទាំងពីរ បានបញ្ជាក់នូវគោលជំហររួមហើយគ្រោងនឹងចុះហត្ថលេខាក្រោយពីទទួលបានការអនុញ្ញាតជាផ្លូវការ ក្រោយជំនួបកំពូលនាយករដ្ឋមន្ត្រីទាំងពីរនៅប្រទេសជប៉ុននាដំណាច់ខែឧសភា ឆ្នាំ២០១៩ នេះ ។
បើយោងតាមសេចក្តីប្រកាសព័ត៌មានរបស់ JICA ចុះថ្ងៃទី ២៤ ខែឧសភា បានបញ្ជាក់ថាឯកសារដែលនឹងត្រូវចុះហត្ថលេខាខាងមុខ គឺ៖ ១)- JICA នឹងបន្តគាំទ្រដល់កំពង់ផែស្វយ័តក្រុងព្រះសីហនុក្នុងការអភិវឌ្ឍកំពង់ផែ និងការពង្រឹងសមត្ថភាពតំបន់សេដ្ឋកិច្ចពិសេសកំពង់ផែក្រុងព្រះសីហនុ តាមរយៈការផ្តល់ហិរញ្ញប្បទានឥតសំណង កិច្ចសហប្រតិបត្តិការបច្ចេកទេស និងកម្ចីហិរញ្ញប្បទាន។ ២)- កំពង់ផែក្រុងព្រះសីហនុនឹងបន្តពង្រឹងប្រតិបត្តិការ និងការគ្រប់គ្រងកំពង់ផែនិងតំបន់សេដ្ឋកិច្ចពិសេស ។ ទ៣)- JICA និងកំពង់ផែក្រុងព្រះសីហនុនឹងបន្តផ្លាស់ប្តូរទស្សនៈវិស័យ និងព័ត៌មាននានាទាក់ទងទៅនឹងការអភិវឌ្ឍកំពង់ផែនិងការរីកចម្រើនផ្នែកភស្តុភាកម្ម សម្រាប់ការអភិវឌ្ឍសេដ្ឋកិច្ចសង្គមនៃប្រទេសកម្ពុជា ។
សូមបញ្ជាក់ថា កំពង់ផែស្វយ័តក្រុង ព្រះសីហនុ គឺជាកំពង់ផែសមុទ្រទឹកជ្រៅអន្តរជាតិតែមួយគត់របស់កម្ពុជាស្ថិតនៅខេត្តព្រះសីហនុ ដែលជាច្រករបៀងសេដ្ឋកិច្ចភាគខាងត្បូងរវាងរាជធានីភ្នំពេញនិងខេត្តព្រះសីហនុ ។ ដើម្បីជម្រុញកម្លាំងនៃការអភិវឌ្ឍ JICAបានផ្តល់ហិរញ្ញប្បទានអភិវឌ្ឍផ្លូវការសម្រាប់គម្រោងស្តារឡើងវិញបន្ទាន់កំពង់ផែស្វយ័តក្រុងព្រះសីហនុនៅឆ្នាំ១៩៩៩ និងគម្រោងពង្រីកបន្ទាន់កំពង់ផែស្វយ័តក្រុងព្រះសីហនុនៅឆ្នាំ ២០០៤ ក្នុងគោលដៅលើកកម្ពស់ដំណើរការទំនិញឆ្លងកាត់កំពង់ផែនេះ ។ បរិមាណដឹកជញ្ជូនធុងប្រចាំឆ្នាំនៅកំពង់ផែនេះបានកើនឡើងដល់ជាង 540.000 TEU [1] ក្នុងឆ្នាំ 2018 ចាប់ពី 290.000 TEU នៅក្នុងឆ្នាំ 2013 ។
សូមបញ្ជាក់ថា ក្រុមហ៊ុន Kamigumi ត្រូវបានបង្កើតឡើងនៅឆ្នាំ ១៨៦៧ នៅតំបន់កូបេនៃប្រទេសជប៉ុន។ ក្រុមហ៊ុននេះផ្តល់សេវាកម្មដឹកជញ្ចូនចំរុះជាអន្តរជាតិ។ ក្រុមហ៊ុនផ្តល់សេវាដឹកជញ្ជូនតាមកំពង់ផែ និងមានឃ្លាំងស្តុកនិងចែកចាយ និងដឹកជញ្ជូនតាមរថយន្ត ដឹកទំនិញផ្លូវអាកាស និងផ្លូវដែកព្រមទាំងសេវាកម្មដឹកជញ្ចូនតាមសមុទ្រផងដែរ ។ ងាកទៅប្រតិបត្តិការរបស់កំពង់ផែស្វយ័តក្រុងព្រះសីហនុវិញគឺនៅរក្សាបានកំណើនខ្ពស់នៃចំណូលរបស់ខ្លួន។
ជាក់ស្តែង ក្នុងត្រីមាសទី ១ ឆ្នាំ ២០១៩ កំពង់ផែស្វយ័តក្រុងព្រះសីហនុ មានចំណូលសរុបចំនួន ៦៩.៦១១.៨២៨.០០០ រៀល កើនជាងក្នុងត្រីមាសទី ១ ឆ្នាំ ២០១៨ ប្រមាណជាង ១៧.៤៥% និងចំណេញសុទ្ធក្នុងការិយបរិច្ឆេទចំនួនជាង ៨.៦៤៦ លាន រៀល កើនឡើងចំនួនជាង ១៨.២២៧ លាន រៀល ស្មើនឹង ១៩០,២៤% ។ នាថ្ងៃទី ៣១ ខែមីនា ឆ្នាំ ២០១៩ នេះដែរ ទ្រព្យសកម្មសរុបរបស់ កំពង់ផែស្វយ័តក្រុងព្រះសីហនុ មានចំនួន ជាង ១.៣២២.៨៧១ លានរៀល ថយចុះចំនួនជាង ៥.៣១៨.លាន រៀល ស្មើនឹង ០,៤០% និងមូលធនសរុប មានចំនួន ៦៦៥.៨៣៥ លានរៀល កើនឡើងចំនួន ៨.៦៤៦ លានរៀល ស្មើនឹង ១,៣២% ៕ កែសម្រួលដោយ ៖ សុឃាក់
ចែករំលែកព័តមាននេះ