ខេត្តកំពង់ចាម ៖ ក្រុមម្ចាស់ផ្ទះខេត្តកំពង់ចាម បានយកឈ្នះក្រុមភ្ញៀវខេត្តព្រៃវែង ១-០ ក្នុងជំនួបជើងទី១ព្រឹត្តិការណ៍បាល់ទាត់ដណ្ដើមពានរង្វាន់យុវជនអាយុក្រោម១៥ឆ្នាំដែលរៀបចំធ្វើដោយក្លិបបាល់ទាត់វិសាខា កាលពីថ្ងៃទី២៥ ឧសភា ។
គួររំលឹកផងដែរថា នេះជាការប្រកួតលើកទី៤នៃព្រឹត្តិការណ៍បាល់ទាត់ដណ្ដើមពានរង្វាន់យុវជនអាយុក្រោម១៥ឆ្នាំ ក្នុងចំណោមការប្រកួតទាំង៥លើក ដែលគណៈកម្មការរៀបចំការការប្រកួតបានកំណត់ទុកនៅក្នុងដំណាក់កាលទី១ ។
ការប្រកួតនេះ គេបានបែងចែកជា២ដំណាក់កាល ដំណាក់កាលទី១គឺប្រកួតលក្ខណៈជម្រុះតាមខេត្តដើម្បីស្វែងរកក្រុមដែលមានពិន្ទុច្រើនជាងគេចំនួន៦ក្រុម ឡើងទៅប្រកួតនៅក្នុងដំណាក់កាលទី២ ដែលជាវគ្គផ្ដាច់ព្រ័ត្រនៅរាជធានីភ្នំពេញ ។ សម្រាប់ការប្រកួតនេះទៀត គឺខេត្តនីមួយៗត្រូវទទួលធ្វើជាម្ចាស់ផ្ទះម្ដងម្នាក់ ដោយអនុវត្តទៅតាមច្បាប់ប្រកួតរបស់សហព័ន្ធកីឡាបាល់ទាត់អន្តរជាតិ(FIFA)។
ដូច្នេះតាមរយៈលទ្ធផលនេះ ទោះបីជាការប្រកួតលើកទី៤នេះ ក្រុមមន្ទីរអប់រំយុវជននិងកីឡាខេត្តកំពង់ចាម មានឱកាសរកបានគ្រាប់បាល់នាំមុខមន្ទីរអប់រំយុវជននិងកីឡាខេត្តព្រៃវែង១-០ក្ដី ក៏នៅមិនទាន់កំណត់ថាចាញ់ឈ្នះបានដែរព្រោះត្រូវរង់ចាំអ៊ុតមើលការប្រកួតជើងទី២នៅលើទឹកដីខេត្តព្រៃវែងម្ដងទៀតសិន ដែលនឹងត្រូវធ្វើឡើងនៅថ្ងៃទី២៧ ឧសភា នេះ។
ទោះបីយ៉ាងណា សម្រាប់ព្រឹត្តិការណ៍នេះ ចាប់តាំងពីដំណើរការប្រកួតលើកទី១រហូតមកនោះគេសង្កេតឃើញមានការចាប់អារម្មណ៍យ៉ាងខ្លាំងពីសំណាក់យុវជននៅតាមបណ្ដាខេត្តនីមួយៗដែលគាំទ្រវិស័យកីឡាបាល់ទាត់ ។
តាមរយៈព្រឹត្តិការណ៍នេះនឹងបំផុសដល់យុវជនដែលចូលចិត្តកីឡាបាល់ទាត់ ឱ្យពួកគេមានឱកាសបញ្ចេញសមត្ថភាព និងទេពកោសល្យដើម្បីក្លាយខ្លួនជាកីឡាករបាល់ទាត់អាជីពទៅថ្ងៃក្រោយ ៕
ចែករំលែកព័តមាននេះ