រាជធានីភ្នំពេញ ៖ ក្រសួងកសិកម្មរុក្ខប្រមាញ់ និងនេសាទលោក វេង សាខុន បានស្នើចិនពិចារណាធ្វើការវិនិយោគលើការចិញ្ចឹមសត្វ ចំណីសត្វ ដាំឈើឧស្សាហកម្ម និងដំណាំកសិ…
រាជធានីភ្នំពេញ ៖ ក្រសួងកសិកម្មរុក្ខប្រមាញ់ និងនេសាទលោក វេង សាខុន បានស្នើចិនពិចារណាធ្វើការវិនិយោគលើការចិញ្ចឹមសត្វ ចំណីសត្វ ដាំឈើឧស្សាហកម្ម និងដំណាំកសិ ឧស្សាហកម្មសំខាន់ៗនៅកម្ពុជា ។ ការស្នើនេះធ្វើឡើងក្នុងជំនួបជាមួយលោក Gan Jusheng អគ្គលេខាធិការនៃសមាគម និងសហការីដែលអញ្ជើញមកពីពហុជំនាញផ្សេងៗគ្នា នាព្រឹកថ្ងៃទី២៧ ខែឧសភា ឆ្នាំ២០១៩ នៅទីស្តីការក្រសួង ។
លោករដ្ឋមន្ត្រីជាថ្មីបានថ្លែងអំណរគុណយ៉ាងជ្រាលជ្រៅជូនចំពោះគណៈប្រតិភូដែលបានអ ញ្ជើញមកធ្វើទស្សនកិច្ចនៅកម្ពុជា ដើម្បីស្វែងយល់បន្ថែមពីស្ថានភាព និងឱកាសនៃការវិនិយោគ ជាពិសេសក្នុងវិស័យកសិកម្មលើដំណាំដែលជាវត្ថុធាតុដើមសម្រាប់ការកែច្នៃ និងផលិតជាឱសថនៅកម្ពុជា ។ ដើម្បីឲ្យផែនការវិនិយោគទទួលបានជោគជ័យលោករដ្ឋមន្ត្រីបានជូនយោបល់ដល់គណៈប្រតិភូថា គួរសហការ ឬស្វែងរកដៃគូសហការជាមួយក្រុមហ៊ុនក្នុងស្រុក ដើម្បីស្វែងរកដី និងធ្វើការដាំដុះ ។ លោកក៏បានស្នើអ្នកវិនិយោគចិនវិនិយោគលើការចិញ្ចឹមសត្វ ចំណីសត្វ ដាំឈើឧស្សាហកម្ម និងដំណាំកសិឧស្សាហកម្មសំខាន់ៗមួយចំនួនទៀតដូចជា ពោត ដំឡូងមី មៀនដែលកំពុងមានសក្តានុពលក្នុងការនាំចេញ ផ្តោតទៅលើការដាំដុះ កែច្នៃ វេចខ្ចប់ និងនាំចេញឆ្លើយតបតាមស្តង់ដារគុណភាពអនាម័យ និងអនាម័យដែលទីផ្សារចិនតម្រូវ ។
រួមជាមួយការលើកកម្ពស់ ការផលិត និងប្រើប្រាស់ថាមពលពន្លឺព្រះអាទិត្យក្នុងវិស័យកសិកម្ម ដើម្បីជាប្រយោជន៍ដល់ប្រជាកសិករកម្ពុជាក្នុងកាត់បន្ថយថ្លៃដើម ។ លោក Gan Jusheng បានលើកឡើងថា ប្រតិភូអញ្ជើញមកជាមួយលោកនាថ្ងៃនេះ គឺមកពីសមាគម និងក្រុមហ៊ុនសំខាន់ៗទាក់ទងនឹងការធ្វើជំនួយផ្នែកឱសថ ការការពារសុខភាព កសិកម្ម ពាណិជ្ជកម្ម ការកែច្នៃ និងវប្បធម៌គោលបំណង ដើម្បីពង្រឹងចំណងមិត្តភាព សិក្សាស្វែងយល់អំពីសក្តានុពល លទ្ធភាព និងឱកាសនៃការវិនិយោគធ្វើជំនួញនៅប្រទេសកម្ពុជា ។
ចំពោះវិស័យកសិកម្ម សមិទ្ធផល ដែលសមាគមសម្រេចបានកន្លងមក គឺបានជួយជំរុញការវិនិយោគដាំដុះផ្លែដូងនៅខេត្តក្រចេះបានជាង០១ពាន់ហិកតា ។ ដើម្បីឲ្យវិស័យនេះកាន់តែមានការអភិវឌ្ឍ លោកសង្ឃឹមថា ក្រសួងកសិកម្ម រុក្ខាប្រមាញ់ និងនេសាទនឹងផ្តល់ការគាំទ្រកិច្ចសហការ និងលើកទឹកចិត្តចំពោះសមាគម និងវិនិយោគិនចិនដែលបានកំពុង និងរៀបចំផែនការវិនិយោគនៅកម្ពុជា ។ ជាមួយគ្នានោះដែរលោករដ្ឋមន្ត្រីក្រសួងកសិកម្មក៏បានលើកឡើងថា រយៈគោលនយោបាយខ្សែក្រវាត់មួយផ្លូវមួយ របស់រដ្ឋាភិបាលចិនបានជួយឧបត្ថម្ភគាំទ្រដល់ការកសាងហេដ្ឋារចនា សម្ព័ន្ធគមនាគមន៍ ការធ្វើពាណិជ្ជកម្ម រវាងប្រទេសទាំងពីរ ដែលក្នុងនោះចំពោះវិស័យកសិកម្ម រដ្ឋាភិបាលចិនបានសម្រេចបង្កើនកូតានាំចូលអង្ករកម្ពុជាដល់៤០ម៉ឺនតោន ហើយថ្មីៗបានអនុញ្ញាតឲ្យកម្ពុជានាំចេញចេកអំបូងលឿងដោយត្រង់ទៅកាន់ទីផ្សារចិន ។
ក្រៅពីនេះ ភាគីទាំងពីរបាន និងកំពុងសិក្សាពីនីតិវិធីច្បាប់ និងបច្ចេកទេស ដើម្បីធ្វើការនាំចេញផ្លែស្វាយ ម្រេច មៀន និងទឹកមាត់ត្រចៀកកាំ ហើយសង្ឃឹមថា នឹងអាចចាប់ផ្តើមធ្វើការនាំចេញនាពេលឆាប់ៗខាងមុខនេះ ។ លោករដ្ឋមន្ត្រីសង្ឃឹម និងជឿជាក់ថា តាមរយៈគម្រោងខ្សែក្រវាត់មួយ ផ្លូវមួយ កម្ពុជានឹងទទួលបានអត្ថប្រយោជន៍ជាច្រើនថែមទៀត ក្នុងការកសាង និងអភិវឌ្ឍប្រទេស ហើយរំពឹងថា ភាគីចិននឹងបន្តពិនិត្យ និងអនុញ្ញាតឲ្យកសិផលកម្ពុជានាំ ចេញទៅកាន់ទីផ្សារចិនបន្ថែមទៀតនាពេលអនាគត ៕ កែសម្រួលដោយ៖ សុឃាក់
ចែករំលែកព័តមាននេះ