រាជធានីភ្នំពេញ ៖ អ្នកប្រដាល់ជើងថ្មីវ័យក្មេង ម៉ឺន មេឃា មកពីក្លិបក្រសួងសេដ្ឋកិច្ចនិងហិរញ្ញវត្ថុ បានផ្ដួលកីឡាករថៃឈ្មោះ ភីត ណង ឱ្យបោះបង់ការប្រកួតនៅមុនស្នូរជួងបញ្ចប់ទឹកទី៥ក្នុងការប្រកួតដណ្ដើមប្រាក់លានកាលពីថ្ងៃទី២៥ ឧសភា នៅលើសង្វៀនស៊ីអិនស៊ី។
តាមពិត ម៉ឺន មេឃា ត្រូវជួបប្រកួតជាមួយកីឡាករថៃ ផានុវ៉ាត ស័ក្ដឆ័យយុង ឯណោះវិញទេ ប៉ុន្តែដោយសារតែគេមានបញ្ហាសុខភាពមិនអាចមកប្រកួតបាន ទើបប្រគល់ភារកិច្ចនេះឱ្យកីឡាករថៃ ភីត ណង ប្រកួតជំនួសវិញ ។ កីឡាករទាំងពីរធ្លាប់ជួបគ្នាចំនួន២លើករួចមកហើយ តែជ័យជម្នះធ្លាក់ក្នុងដៃកីឡាករកម្ពុជា ទាំង២លើក ។ លើកនេះ ភីត ណង សង្ឃឹម ថានឹងអាចសងសឹកវិញបាន តែទីបំផុតនៅតែមិនអាចទៅរួចដដែលដោយមកសន្លប់ក្រោមកណ្ដាប់ដៃមឿន មេឃា ក្នុងទឹកទី៥ទាល់តែបាន ។
មួយគូទៀត នី សុភី មកពីក្លិបសាលវ័ន្តកីឡា បានយកឈ្នះកីឡាករថៃ ណាម ខៈប៊ុន ដោយពិន្ទុក្លាយជាម្ចាស់ប្រាក់លាននៅក្នុងសប្ដាហ៍នេះដែរ ។ គូនេះក៏មានការផ្លាស់ប្ដូរដែរ ដោយអ្នកដែលត្រូវជួបកីឡាករថៃគឺ រឿង សារ័ត្ន ប៉ុន្តែដោយសារតែគេមានបញ្ហាសុខភាពទើបគណៈកម្មការរៀបចំការប្រកួតផ្លាស់ប្ដូរភ្លាមៗ
ដោយឱ្យ នី សុភី ឡើងប្រកួតជំនួសវិញ។
ចំណែកគូប្រកួតមិត្តភាពវិញកីឡាករ ពុទ្ធ សែនសូយ មកពីក្លិបពុទ្ធសេរីវង្សពោធិសែនជ័យ បានយកឈ្នះកីឡាករបារាំងLoan Garot នៅត្រឹមទឹកទី២ និងកីឡាករ សេក ចៅជួត មកពីក្លិបអង្គរមានជ័យខេត្តសៀមរាប បានយកឈ្នះ កីឡាករ លីន វិរៈ មកពីក្លិបបូរីរាជសីហ៍មានរិទ្ធដោយពិន្ទុ ៕ (កែសម្រួលដោយ ៖ បុប្ផា)
ចែករំលែកព័តមាននេះ