យោងតាមក្រុមស្រាវជ្រាវរបស់ប្រទេសស្វ៊ីសឱ្យដឹងថា ការធ្វើលំហាត់ប្រាណច្រើនពេក រហូតដល់ជាង១៤ម៉ោងក្នុងមួយសប្តាហ៍អាចផ្តល់ផលអាក្រក់ដល់សុខភាពច្រើនជាងផលល្អពោលគឺស្មើនឹងអ្នកដែលមិនបានហាត់ប្រាណ ។ ខណៈដែលការលេងកីឡាកាន់តែច្រើន ជាទូទៅគឺមានផលវិជ្ជមានទៅលើសុខុមាលភាព ផ្លូវចិត្តនិងផ្លូវកាយ អ្នកស្រាវជ្រាវបានរកឃើញថា អត្ថប្រយោជន៍ទាំងនេះបានចាប់ផ្តើមថយចុះមកវិញបន្ទាប់ពីចំណុចចាប់ផ្តើមជាក់លាក់មួយ ។
ការពិនិត្យតាមដានមនុស្សអាយុពី១៦ដល់២០ឆ្នាំជាង១.២០០នាក់រយៈពេល១ឆ្នាំបង្ហាញថា ៥ភាគរយក្នុងចំណោមអ្នកដែលហាត់ប្រាណលើសពី១៤ម៉ោងក្នុងមួយសប្តាហ៍ងាយនឹងធ្វើឱ្យគ្រោះថ្នាក់ដល់សុខភាព ខណៈក្រុមដែលហាត់ប្រាណយ៉ាងច្រើនបំផុត១៤ម៉ោងឬតិចជាងនេះក្នុងមួយសប្តាហ៍ផ្តល់ផលល្អដល់សុខភាពមានដូចជា កាត់បន្ថយកម្រិតតានតឹងក្នុងចិត្ត និងបង្កើនថាមពលខួរក្បាល ។ល។ មានការពន្យល់ថា ហាត់ប្រាណច្រើនជ្រុលអាចបណ្តាលឱ្យសាច់ដុំ ឬផ្នែកខ្លះនៃរាងកាយរងនូវការរលាកនិងរបួសហើយបន្ទាប់មកធ្វើឱ្យសុខភាពផ្លូវចិត្តធ្លាក់ចុះផងដែរ ។
ក្រុមស្រាវជ្រាវបាននិយាយថា បើទោះជាលទ្ធផលមិនបង្ហាញជាចាំបាច់ថា ការធ្វើលំហាត់ប្រាណលើសបណ្តាលឱ្យសុខុមាលភាព ចុះទាបក្តី ប៉ុន្តែវាបានបង្ហាញថា កម្រិតខ្ពស់នៃ ការធ្វើលំហាត់ប្រាណអាចបណ្តាលឱ្យមានការរលាក បង្កអន្តរាយដល់សុខភាពផ្លូវ កាយនិងផ្លូវចិត្ត ។ ពួកគេបានបន្តថា៖ « យើងបានរកឃើញថា ការអនុវត្តកីឡាជាក់ស្តែងបានបញ្ឈប់កត្តាការពារនិងបានក្លាយជាកត្តាហានិភ័យដ៏ផុយស្រួយមួយសម្រាប់អ្នកដែលមានសុខភាពមិនសូវល្អហើយខំហាត់ប្រាណច្រើនជាង២ម៉ោងក្នុងមួយថ្ងៃ ។ លទ្ធផលលើកនេះក៏បានគូសបញ្ជាក់ពីសារៈសំខាន់សម្រាប់គ្រូពេទ្យផងដែរក្នុងការថែទាំ ក៏ដូចជាឱ្យដំបូន្មានដល់អ្នកជំងឺ»៕
ចែករំលែកព័តមាននេះ