ខេត្តព្រះសីហនុ ៖ គ្រោះថ្នាក់ចរាចរណ៍រវាងរថយន្តធុនធំមួយគ្រឿងបុកជាមួយរថយន្តមួយគ្រឿងទៀតម៉ាកឡិចស៊ីស RX300 ក្នុងទិសដៅបញ្ច្រាសគ្នា បណ្តាលឱ្យអ្នកបើកបររថយន្តធុនធំស្លាប់នៅនឹងកន្លែងកើតហេតុ។
ហេតុការណ៍ខាងលើនេះបានកើតឡើងលើផ្លូវជាតិលេខ៤ ចន្លោះគីឡូម្រ៉ែតលេខ ១៦១-១៦២ ស្ថិតនៅភូមិតានៃ ឃុំតានៃ ស្រុកព្រៃនប់ កាលពីវេលាម៉ោង៤និង៥០នាទីទៀបភ្លឺ ថ្ងៃទី២៧ ឧសភា ២០១៩។
លោកវរសេនីយ៍ទោ ហួ យ៉ៃ អធិការនគរបាលស្រុក បានអោយដឹងថា ភាគីខាងរថយន្តមួយគ្រឿងម៉ាកឡិចស៊ីស RX300 ពណ៌ស ពាក់ផ្លាកលេខ ភ្នំពេញ ២AZ-០៧៩៥ បើកបរដោយ ឈ្មោះ វង់ នាងសិន ភេទប្រុស អាយុ៥២ឆ្នាំ ជាជនជាតិចិន មានទីលំនៅក្នុងក្រុងព្រះសីហនុ ខេត្តព្រះសីហនុ និងអ្នករួមដំណើរម្នាក់ឈ្មោះ ប៊ុន ម៉ាប់ ភេទប្រុស អាយុ៣៣ឆ្នាំ មានទីលំនៅ រាជនីភ្នំពេញ ។
ចំណែកភាគីខាងរថយន្តធុនធំមួយគ្រឿងម៉ាក FREIGHTER ពណ៌ត្រួយចេកលាយស ពាក់ផ្លាកលេខ ភ្នំពេញ ៣C-៧៣៥៤ បើកបរដោយឈ្មោះ ឈុន បូរ៉ា ភេទប្រុស អាយុ៣៣ឆ្នាំ មានទីលំនៅភូមិតែប៉ែ ឃុំស្រែចារ ស្រុកស្នួល ខេត្តក្រចេះ បានស្លាប់នៅនឹងកន្លែងកើតហេតុ និងអ្នករួមដំណើរម្នាក់ឈ្មោះ យិន នីតា ភេទស្រី អាយុ២០ឆ្នាំ មានទីលំនៅភូមិ ពូទុង ឃុំចុងផ្លាស់ ស្រុកកែវសីមា ខេត្តមណ្ឌលគីរី ។
លោកអធិការនគរបាលស្រុក បានអោយដឹងបន្តថា មុនពេលកើតហេតុ រថយន្តមួយគ្រឿងជិះគ្នា២នាក់ ម៉ាកឡិចស៊ីស RX300 ធ្វើដំណើរក្នុងទិសដៅពីខេត្តព្រះសីហនុឆ្ពោះទៅរាជធានីភ្នំពេញ លុះមកដល់ចំណុចខាងលើ បានរេចង្កូតមកខាងឆ្វេងដៃ ស្របពេលនោះស្រាប់តែមានរថយន្តធុនធំមួយគ្រឿងទៀតជិះគ្នា២នាក់ ម៉ាក FREIGHTER ធ្វើដំណើរក្នុងទិសដៅផ្ទុយគ្នាក៏បានបុកគ្នាតែម្តង បណ្ដាលឲ្យអ្នកបើកបររថយន្តធុនធំម៉ាក FREIGHTER ស្លាប់នៅកន្លែងកើតហេតុ ។
ក្រោយកើតហេតុ សពជនរងគ្រោះកំពុងរង់ចាំគ្រួសារមកទទួលយកទៅធ្វើបុណ្យតាមប្រពៃណី រីឯរថយន្តទាំងពីរគ្រឿងត្រូវបានសមត្ថកិច្ចស្ទូចយករក្សាទុកជាបណ្តោះអាសន្ននៅអធិការដ្ឋាននគរបាលស្រុកព្រៃនប់ដើម្បីចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ