សម្តេចតេជោ ហ៊ុន សែន នឹងចាកចេញទៅកាន់ប្រទេសជប៉ុន នៅថ្ងៃទី២៩ ខែឧសភាខាងមុខនេះ។ វាគឺជាទស្សនកិច្ចការងារ ហើយក្លាយជាឱកាសមួយសម្រាប់សម្តេច ដើម្បីទាក់ទាញការវិនិយោគប្រទេសជប៉ុន ខណៈដែលកម្ពុជាកំពុងប្រឈមមុខនឹងការបាត់បង់ EBA ដែលជាប្រព័ន្ធអនុគ្រោះពន្ធសម្រាប់ការនាំចេញរបស់កម្ពុជា ទៅកាន់សហភាពអឺរ៉ុប។
វាជាការចាំបាច់ដែលត្រូវរំលេចចេញអំពីទំនាក់ទំនងរវាងកម្ពុជា និងជប៉ុន។ សំខាន់ដូចគ្នានេះ តើសម្តេច អាចនឹងទាក់ទាញវិនិយោគិនជប៉ុនបានកម្រិតណា ដើម្បីចូលរួមចំណែកកាន់តែខ្លាំងនៅក្នុងសេដ្ឋកិច្ចកម្ពុជា?
ក្រោយការបោះឆ្នោតដែលរៀបចំដោយអ៊ុនតាក់កាលពីឆ្នាំ១៩៩៣ ប្រទេសជប៉ុនបានក្លាយ ជាប្រទេសដ៏លេខមុខបំផុតនៅ ក្នុងការជួយការអភិវឌ្ឍន៍សេដ្ឋកិច្ចកម្ពុជា។
ស្ពានមិត្តភាពកម្ពុជា-ជប៉ុនឬស្ពានជ្រោយចង្វារបានក្លាយជាស្ពានដ៏មានសារសំខាន់បំផុត សម្រាប់ការភ្ជាប់ត្រើយខាងកើតឆៀងខាងជើងប្រទេសកម្ពុជា ហើយវាក៏បានបង្កើតមុខរបរជាច្រើន ជាពិសេសភោជនីដ្ឋាននៅតាមបណ្តោយផ្លូវជាតិលេខ៦A។ ប្រជាជនកម្ពុជា ក៏មានការចងចាំដ៏ល្អ នៅក្នុងបេះដូងរបស់ពួកគេចំពោះទឹកចិត្តរបស់ជប៉ុនចាប់តាំងពីពេលនោះមក។
សំខាន់ខ្លាំងនោះ ជប៉ុនបានលេចធ្លោជាប្រទេសដែលផ្តល់ជំនួញឥតសំណងច្រើនជាងគេបំផុតសម្រាប់ប្រទេសកម្ពុជា នៅគ្រាដែលកម្ពុជាត្រូវការជំនួយបរទេសបំផុតសម្រាប់ការអភិវឌ្ឍន៍សេដ្ឋកិច្ចដ៏ទន់ខ្សោយរបស់ខ្លួន។
នៅក្នុងរយៈពេលប្រាំឆ្នាំចុងក្រោយគិតពីឆ្នាំ២០១២ ដល់២០១៦ ជប៉ុនបានផ្តល់ជំនួយឥតសំណងដល់កម្ពុជាប្រមាណជិត ១៨០០ លានដុល្លារសហរដ្ឋអាមេរិក ហើយឥណទានមានតម្លៃជាទឹកប្រាក់ជិត ១១០០លានដុលារ។ នេះបើតាមតួលេខចេញពីស្ថានទូតជប៉ុនប្រចាំនៅកម្ពុជា។ ចំណែកឯការវិនិយោគ និងពាណិជ្ជកម្ម រវាងប្រទេសកម្ពុជាក៏បានកើនឡើងជាលំដាប់ផងដែរ។
ការវិនិយោគទុនជប៉ុននៅកម្ពុជានៅក្នុងរយៈពេលប្រាំឆ្នាំចុងក្រោយមានការកើនឡើងគួរឱ្យកត់សម្គាល់ ដោយមានតម្លៃជាទឹកប្រាក់៨៥២លានដុល្លារនៅឆ្នាំ២០១៨ កើនឡើងខ្លាំងពី ត្រឹមតែ៤៨លាន ដុល្លារនៅឆ្នាំ២០១៤។ ចំណែកឯការធ្វើពាណិជ្ជកម្មរវាងប្រទេសទាំងពីរវិញក៏មានការកើនឡើងដែរ។
យោងតាមរបាយការណ៍របស់អង្គការ Jetro របស់ជប៉ុន បានឱ្យដឹងថា កាលពីឆ្នាំ២០១៨ ជប៉ុនបាននាំចេញមកកាន់ប្រទេសកម្ពុជា តម្លៃជាទឹកប្រាក់ជាង៤២០លានដុល្លារ ខណៈដែលជប៉ុននាំចូលទំនិញពីកម្ពុជាមានតម្លៃជាទឹកប្រាក់ចំនួន១,៦ ពាន់លានដុល្លារ។ បើប្រៀបធៀបនឹងឆ្នាំ២០១៧ ការនាំចេញរបស់ប្រទេសកម្ពុជាទៅកាន់ប្រទេសជប៉ុន បានកើនឡើងជាង២៧ភាគរយ ខណៈដែលការនាំចូលពីប្រទេសជប៉ុនបានកើនឡើង ជិត១៨ភាគរយ។
ដោយផ្អែកទៅលើជំហរនយោបាយ សហប្រតិបត្តិការសេដ្ឋកិច្ចទាំងការវិនិយោគ និងពាណិជ្ជកម្ម ជប៉ុនត្រូវបានចាត់ទុកជាមិត្តដ៏ល្អមួយសម្រាប់ប្រទេសកម្ពុជា ហើយ អារម្មណ៍របស់ ប្រជាជនកម្ពុជា ភាគច្រើនបំផុតគឺយល់ថា ជប៉ុនជាមិត្តដ៏ល្អ។
សូម្បីតែនៅពេលដែលសហភាពអ៉ុប និងសហរដ្ឋអាមេរិកហាក់ដូចជាប្រកាន់ជំហរដកថយពីកម្ពុជាដោយសារតែចោទប្រកាន់អំពីដំណើរថយក្រោយនៃលទ្ធិប្រជាធិបតេយ្យនៅកម្ពុជា ប្រទេសជប៉ុន ប្រកាន់យកជំហរមួយដែលទន់ភ្លន់ជាងហើយនៅតែបន្តជួយដល់ប្រទេសកម្ពុជា។
យោងតាមមន្ត្រីជាន់ខ្ពស់ស្ថានទូតជាប៉ុនប្រចាំនៅប្រទេសកម្ពុជានោះ ជប៉ុនចាត់ទុកប្រទេសកម្ពុជា ជាប្រទេសប្រកបដោយសក្តានិពលមួយសម្រាប់ការវិនិយោគប្រទេសជប៉ុនប៉ុន្តែប្រទេសកម្ពុជា មានកិច្ចការមួយចំនួនដែលត្រូវធ្វើដើម្បីទាក់ទាញការវិនិយោគកាន់តែច្រើនមកពីប្រទេសជប៉ុន។
មន្ត្រីកុលស៊ុលជប៉ុនលោក ហ៊ីរ៉ូណូរី ស៊ុយហ្ស៊ុយគី ( Hironori Suzuki) និយាយថា កម្ពុជាគឺជាគោលដៅប្រកបដោយក្តីសង្ឃឹមមួយសម្រាប់ការវិនិយោគរប់សក្រុមហ៊ុនជប៉ុននៅតំបន់អាស៊ាន។
លោកនិយាយបន្ថែមទៀតថា ប៉ុន្តែមានបញ្ហាប្រឈមមួយចំនួនសម្រាប់កម្ពុជា ដើម្បីទាក់ទាញការវិនិយោគជប៉ុនដោយក្នុងនោះរួមមានការកាត់បន្ថយតម្លៃអគ្គិសនី ការសម្រួលដល់នីតិវិធីពន្ធ ការលើកកម្ពស់ ហេត្ថារចនាសម្ព័ន្ធ និងធនធានមនុស្ស។
ប៉ុន្តែការកាត់បន្ថយបញ្ហាអំពើពុករលួយក៏ត្រូវបានគេចាត់ទុកថា មានសារសំខាន់សម្រាប់ការទាក់ទាញការវិនិយោគមកពីគ្រប់ទិសទីនៅក្នុងពិភពលោក ជាពិសេសប្រទេសជប៉ុនដែលមានច្បាប់តឹងតែងមិនអាចឱ្យប្រជាពលរដ្ឋរបស់ខ្លួនចូលរួមនៅក្នុងសកម្មភាពពុករលួយណាមួយមិនថាក្នុងប្រទេស ឬក្រៅប្រទេស។
ខណៈដែលកម្ពុជាកំពុងតែប្រឈមមុខនឹងការរបូតបាត់ EBA នោះ នយោបាយ និងបរិស្ថានប្រកបដោយទាក់ទាញបំផុតសម្រាប់ការវិនិយោគត្រូវតែមានភាពទាក់ទាញបំផុត ដើម្បីឱ្យការវិនិយោគបរទេសនៅកម្ពុជាអាចនឹងប៉ះប៉ូវបានពីការខាតបង់ដែលបណ្តាលមកពីខាតបង់ការរួចពន្ធដែលបានពី EBA។
នៅពេលដែសម្តេចស្ថិតនៅក្នុងប្រទេសជប៉ុននៅសប្តាហ៍ខាងមុខ ពីថ្ងៃទី២៩ដល់៣១ ឧសភា សម្តេចនឹងរំលេចចេញឱកាសទាំងឡាយសម្រាប់វិនិយោគិនជប៉ុនមកបណ្តាក់ទុន នៅក្នុងប្រទេសកម្ពុជា។ ការស្នាក់នៅប្រទេសជប៉ុននោះ នឹងក្លាយជាឱកាសមួយសម្រាប់សម្តេចដើម្បីដោះស្រាយរាល់ការកង្វល់គ្រប់យ៉ាងដែលមាននៅក្នុងចិត្ត ធុរជន និងវិនិយោគិនជប៉ុន។
ជប៉ុនត្រូវបានគេចាត់ទុកថា មានការសម្រេចចិត្តល្អិតល្អន់ខ្លាំង ហើយទាមទារភាពច្បាស់លាស់។ រដ្ឋមន្ត្រីកម្ពុជាមួយរូបធ្លាប់និយាយប្រាប់កោះសន្តិភាពថា ជប៉ុនមានការសម្រេចចិត្តយឺតសម្រាប់ការចូលមកវិនិយោគនៅកម្ពុជា។ ប៉ុន្តែទោះបីជាយ៉ាងណាក៏ដោយចុះ ការសម្រេចចិត្តរបស់ជប៉ុនច្រើនមាន ភាពយូរអង្វែងហើយបើសិនជាពួកគេសម្រេចចិត្តមកបណ្តាក់ទុននៅប្រទេសណាហើយនោះ ពួកគេនឹងស្ថិតនៅយូរអង្វែងដែលនេះជាប្រយោជន៍ធំសម្រាប់កម្ពុជា។
បើសិនជាកម្ពុជាអាចទាក់ទាញជប៉ុនកាន់តែច្រើនមកបណ្តាក់ទុននៅកម្ពុជាមែននោះ វាប្រៀបដូចជាដែកឆក់មួយសម្រាប់ការវិនិយោគបរទេសផ្សេងទៀតមកកម្ពុជា ពីព្រោះគេគិតថា ការទាក់ទាញជប៉ុន គឺជាកិច្ចការដ៏លំបាក ហើយទាមទារនូវភាពច្បាស់លាស់។
នៅពេលដែលកម្ពុជាអាចមានប្រទេសធំបី គឺ ចិន ជប៉ុន និងកូរ៉េខាងត្បូង ជាដៃគូសេដ្ឋកិច្ចដ៏សំខាន់នោះ ការប្រឈមរបស់កម្ពុជាក្រោយការបាត់បង់ EBA នឹងត្រូវកាត់បន្ថយ។
រដ្ឋាភិបាលកម្ពុជាហាក់បានសម្រេចចិត្តរួចហើយដើម្បីដើរចេញពីចំណងដែលមាននៅក្នុងEBA ដូច្នេះវាចាំបាច់ណាស់ដែលកម្ពុជាត្រូវបង្កើតភាពទាក់ទាញរបស់ខ្លួនសម្រាប់ការវិនិយោគិនបរទេសមកពីគ្រប់ទិសទី ពិសេសមកពីប្រទេសចិន ជប៉ុន និង កូរ៉េខាងត្បូង។
ដូច្នេះ បេសកកម្មរបស់សម្តេចតេជោមានសារសំខាន់ខ្លាំងណាស់ សម្រាប់ការទាក់ទាញការវិនិយោគជប៉ុន ដែលគេគិតថា ជាការវិនិយោគច្បាស់លាស់ និងប្រកបដោយនិរន្តភាពយូរអង្វែង៕ (កែសម្រួលដោយ ៖ បុប្ផា)
ចែករំលែកព័តមាននេះ