រាជធានីភ្នំពេញ ៖ នៅសណ្ឋាគារសាន់វេ កាលពីពឹ្រកថ្ងៃទី២៩ មីនា មានសិក្ខាសាលាថ្នាក់ជាតិផ្សព្វផ្សាយសុវត្ថិភាពចរាចរណ៍ផ្លូវគោកក្រោមអធិបតីភាពលោកត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោក ដោយមានការចូលរួមពីផ្នែកពាក់ព័ន្ធជាច្រើនទៀត ។
លោកលឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគម្រោងហេដ្ឋារចនាសម្ព័ន្ធខេត្ត-ជនបទ បានឱ្យដឹងថា ដើម្បីចូលរួមចំណែកក្នុងការកាត់បន្ថយនូវគ្រោះថ្នាក់ចរាចរណ៍នៅកម្ពុជា ក្រសួងសាធារណការ និងដឹកជញ្ជូន ព្រមទាំងគម្រោងហេដ្ឋារចនាសម្ព័ន្ធខេត្ត-ជនបទ ក្រោមកម្ចីថវិកាពីធនាគារពិភពលោក សហការជាមួយគណៈកម្មាធិការជាតិសុវត្ថិភាពចរាចរណ៍ផ្លូវគោក ធ្វើការរៀបចំនូវសិក្ខាសាលាផ្សព្វផ្សាយបញ្ហាសុវត្ថិភាពចរាចរណ៍ផ្លូវគោកនេះឡើង ។ តាមរយៈអង្គសិក្ខាសាលានេះ បានចូលរួមចំណែកក្នុងការអប់រំសិក្ខាកាមបានយល់ច្បាស់អំពីកត្តាដែលនាំឱ្យមានគ្រោះថ្នាក់ចរាចរណ៍កើតឡើង និងចង់ឱ្យសិក្ខាកាមចូលរួមទាំងអស់គ្នាជួយផ្សព្វផ្សាយដល់អ្នកធ្វើដំណើរ និងក្នុងសកម្មភាពការពារតាមរយៈការអប់រំសុវត្ថិភាពដូចជា ត្រូវពាក់មួកសុវត្ថិភាព ពាក់ខ្សែក្រវាត់សុវត្ថិភាព អ្នកបើកបរមិនត្រូវពិសាជាតិស្រវឹង គោរពស្លាកសញ្ញាចរាចរណ៍ និងត្រូវគោរពច្បាប់ចរាចរណ៍ ។
ថ្លែងក្នុងឱកាសបើកអង្គសិក្ខាសាលា លោករដ្ឋមន្ត្រីត្រាំ អ៊ីវតឹក បានឱ្យដឹងថា ការស្លាប់ដោយគ្រោះថ្នាក់ចរាចរណ៍មានការកើនឡើងជាលំដាប់ជារៀងរាល់ថ្ងៃគួរឱ្យព្រួយបារម្ភ ។ ជាក់ស្តែងតាមរបាយការណ៍បណ្តោះអាសន្នរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកនៅឆ្នាំ២០១០ បានឱ្យដឹងថា គ្រោះថ្នាក់ចរាចរណ៍មានចំនួនប្រហែល៨.០០០ករណី ជនរងគ្រោះសរុបចំនួនប្រមាណ១៨.១៩៦នាក់ ដែលក្នុងនោះមានជនរងគ្រោះដល់ស្លាប់មានចំនួន១.៨៣៧នាក់ រងរបួសធ្ងន់ចំនួន៦.៨៧៤នាក់ និងរបួសស្រាល៨.៩៤៧នាក់ និងមិនទាន់ដឹងច្បាស់ថាមានរបួសឬមិនមានរបួស៥៣៨នាក់ ។ គ្រោះថ្នាក់ចរាចរណ៍នេះបានបន្សល់ទុកនូវកូនកំព្រា ស្ត្រីមេម៉ាយ ពិការភាព និងសោកនាដកម្មគ្រប់បែបយ៉ាងមកលើប្រជាជន ធ្វើឱ្យគោលនយោបាយកាត់បន្ថយភាពក្រីក្ររបស់រាជរដ្ឋាភិបាលមានការលំបាក ។ ម្យ៉ាងទៀត គ្រោះថ្នាក់ចរាចរណ៍ក៏បានទម្លាក់បន្ទុកស្ថានភាពហិរញ្ញវត្ថុដល់សមាជិកគ្រួសារនៃជនរងគ្រោះដែលនៅរស់ទៀតផង ។ ក្នុងឆ្នាំ២០០៩ កន្លងទៅនេះ គ្រោះថ្នាក់ចរាចរណ៍បានធ្វើឱ្យប្រទេសកម្ពុជាយើងខាតបង់ថវិកាអស់២៤៨លានដុល្លារ សហរដ្ឋអាមេរិក ដែលថវិកានេះបើសិនជាគ្មានគ្រោះថ្នាក់ចរាចរណ៍ទេនោះ អាចយកទៅសាងសង់ហេដ្ឋារចនាសម្ព័ន្ធជាប្រយោជន៍ដល់សង្គមជាច្រើនដូចជា សាលារៀន មន្ទីរពេទ្យ ផ្លូវ ស្ពាន និងជួយទប់ស្កាត់ការចំណាយនៅក្នុងបន្ទុកគ្រួសារ ។ល។
លោករដ្ឋមន្ត្រីបន្តថា ដើម្បីឆ្លើយតបនឹងបញ្ហាខាងលើ គណៈកម្មាធិការជាតិសុវត្ថិភាពចរាចរណ៍ផ្លូវគោក បានសហការជាមួយក្រសួងស្ថាប័ន និងអង្គការជាតិនិងអន្តរជាតិនានា រៀបចំជាយុទ្ធនាការផ្សព្វផ្សាយអំពីសុវត្ថិភាពចរាចរណ៍ ដូចជាកុំបើកបរក្រោយពេលពិសាជាតិស្រវឹង កុំបើកបរហួសល្បឿនកំណត់ កុំដឹកលើសទម្ងន់ ត្រូវពាក់ខ្សែក្រវាត់សុវត្ថិភាព និងមួកសុវត្ថិភាពក្នុងពេលបើកបរ និងពេលរួមដំណើរ ព្រមទាំងជំរុញការរឹតបន្តឹងការអនុវត្តន៍ច្បាប់ចរាចរណ៍ ។ ឆ្លៀតក្នុងឱកាសនេះ លោករដ្ឋមន្ត្រីបានជម្រាបជូនផងដែរ តាមរយៈកិច្ចប្រជុំអន្តរជាតិ ថ្នាក់រដ្ឋមន្ត្រីក្រសួងដឹកជញ្ជូនស្តីពីបញ្ហាសុវត្ថិភាពចរាចរណ៍ផ្លូវគោកនៅទីក្រុងម៉ូស្គូ កាលពីខែវិច្ឆិកា ឆ្នាំ២០០៩ កន្លងទៅ អង្គការសហប្រជាជាតិ បានប្រកាសយកឆ្នាំ២០១១-២០២០ ជាទសវត្សសុវត្ថិភាពចរាចរណ៍ផ្លូវគោក (Decade of Action for Road Safety 2011-2020 ) ដែលមានទិសដៅកាត់បន្ថយចំនួនអ្នកស្លាប់លើផ្លូវថ្នល់ឱ្យបាន៥០%នាឆ្នាំ២០២០ ។ ទសវត្សសុវត្ថិភាពចរាចរណ៍ផ្លូវគោកនេះ នឹងចាប់ផ្តើមប្រារព្ធទិវាប្រកាសផ្តើមទសវត្សសុវត្ថិភាពចរាចរណ៍នៅថ្ងៃទី១១ ខែឧសភា ឆ្នាំ២០១១ នៅគ្រប់ប្រទេសទាំងអស់នៅលើសាកលលោក ។ គណៈកម្មាធិការជាតិសុវត្ថិភាពចរាចរណ៍ផ្លូវគោក នឹងត្រៀមខ្លួនដើម្បីចូលរួមយ៉ាងសកម្មនៅក្នុងទសវត្សនេះ នៅខែឧសភា ឆ្នាំ២០១១ ខាងមុខនេះ ។
តាមរយៈសកម្មភាពខាងលើ គណៈកម្មា ធិការជាតិសុវត្ថិភាពចរាចរណ៍ផ្លូវគោក បានធ្វើការងារយ៉ាងជិតស្និទ្ធជាមួយក្រសួងសាធារណការនិងដឹកជញ្ជូន ក្រសួងមហាផ្ទៃ ក្រសួងសុខាភិបាល ក្រសួងអប់រំ យុវជន និងកីឡា កាកបាទក្រហមកម្ពុជា ព្រមទាំងក្រសួងស្ថាប័នពាក់ព័ន្ធមួយចំនួនទៀតដែលជាសមាជិករបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ។ បន្ថែមលើនេះ យើងក៏បានការសហការជាមួយអង្គការអន្តរជាតិនានា ដែលរួមមានអង្គការដៃគូសុវត្ថិភាពចរាចរណ៍ផ្លូវគោក (GRSP) អង្គការសុខភាពពិភពលោក (WHO) សាកលវិទ្យាល័យចនហូបឃីន (JHU) អង្គការជនពិការអន្តរជាតិបែលហ្ស៊ិក(HIB) ធនាគារអភិវឌ្ឍន៍អាស៊ី ធនាគារពិភពលោក មូលនិធិការពាររងរបួសនៅអាស៊ី (AIPF) ព្រមទាំងក្រុមហ៊ុនឯកជនមួយចំនួនដែលចាប់អារម្មណ៍នឹងការចូលរួមចំណែកក្នុងបញ្ហាកាត់បន្ថយគ្រោះថ្នាក់ចរាចរណ៍ ដើម្បីរួមគ្នាធ្វើការងារកាត់បន្ថយបញ្ហាគ្រោះថ្នាក់ចរាចរណ៍នៅក្នុងប្រទេសកម្ពុជាយើង ។ នេះគឺជាកាយវិការមួយបង្ហាញឱ្យឃើញនូវការយកចិត្តទុកដាក់ក្នុងការជួយដល់ការបង្ការ ទប់ស្កាត់ កាត់បន្ថយអត្រាស្លាប់ដោយគ្រោះថ្នាក់ចរាចរណ៍នៅកម្ពុជាយើង ស្របទៅតាមគោលនយោបាយដឹកនាំរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
ចែករំលែកព័តមាននេះ