ក្រុមហ៊ុន TEPCO ដែលធ្វើអាជីវកម្មលើមជ្ឈមណ្ឌលនុយក្លេអ៊ែរហ្វូគូស៊ីម៉ាបានទទួលស្គាល់កាលពីថ្ងៃទី២៧ មីនា ថា ព័ត៌មានដែលផ្តល់ឱ្យពីការកើនខ្ពស់នៃវិទ្យុសកម្មក្នុងទឹកនៅទីតាំងរេអាក់ទ័រមួយក្នុងចំណោមរេអាក់ទ័រនៃមជ្ឈមណ្ឌលនោះ គឺជាការភាន់ច្រឡំមួយ។ ក្រុមហ៊ុននេះបានសុំទោសបន្ទាប់ពីការប្រកាសមុននេះថា អត្រាវិទ្យុសកម្មមានដល់១០លានដងខ្ពស់ជាងពេលធម្មតាត្រូវបានវាស់ឃើញដែលញ៉ាំងឱ្យមានការជម្លៀសនិយោជិតទាំងឡាយចេញ។ អ្នកនាំពាក្យរបស់ក្រុមហ៊ុន TEPCO លោកតាកាស៊ី គូរីតា ថ្លែងថា តួលេខដំបូងដែលផ្តល់ឱ្យនោះពុំត្រឹមត្រូវឡើយ។ យើងមានការខកចិត្តយ៉ាងខ្លាំង។ ការធ្វើតេស្តថ្មីទីបំផុតអាចកំណត់អត្រាវិទ្យុសកម្មថា មានខ្ពស់ត្រឹម ១០០.០០០ដងលើសពេលធម្មតាប៉ុណ្ណោះ។
យោងតាមលោកតាកាស៊ី គូរីតា ថា នៅរេអាក់ទ័រទី២វិទ្យុសកម្មក្នុងខ្យល់មានដល់១.០០០MILLISIEVERTS ក្នុងមួយម៉ោងគឺមាន៤ដងខ្ពស់ជាងកំរិតកំណត់២៥០MILLISIEVERTS។
បណ្តាអ្នកទទួលខុសត្រូវខាងសន្តិសុខនុយក្លេអ៊ែរសង្ឃឹមថា អាចបូមទឹកដែលមានវិទ្យុសកម្មចេញ ហើយយកទៅស្តុកទុកក្នុងអាងស្តុកធំៗដែលរីងអស់មួយផ្នែកក្នុងបណ្តារេអាក់ទ័រសំដៅថែរក្សាទឹកនោះក្រោយមានលាយវិទ្យុសកម្មខ្ពស់៕
ចែករំលែកព័តមាននេះ