សិង្ហបុរី៖ ភ្នាក់ងារសារព័ត៌មាន The Strait Times បានរាយការណ៍មកកាលពីថ្ងៃទី២២ ឧសភា កន្លងមកថា វិស័យអចលនទ្រព្យសម្រាប់ប្រកបអាជីវកម្មរបស់ប្រទេសសិង្ហបុរីបានដើរទាន់ទីផ្សារធំៗដទៃក្នុងតំបន់ហើយកាលពីទ្រីមាសទី១កន្លងមកនេះ ។
Real Capital Analutics (RCA) បានប្រាប់ដល់សារព័ត៌មានខាងលើកាលពីថ្ងៃទី២១ ថាការវិនិយោគលើអចលនទ្រព្យសម្រាប់ប្រកបអាជីវកម្មក្នុងប្រទេសសិង្ហបុរីបានកើនឡើង ៧២% មកស្មើ ១.៩ប៊ីលានដុល្លារកាលពីត្រីមាសទី១នាឆ្នាំ២០១៩ ។
អ្នកស្រី Petra Blazkova ដែលជាប្រធានផ្នែកវិភាគសម្រាប់តំបន់អាស៊ីប៉ាស៊ីហ្វិកនៅ RCA បាននិយាយថា នៅត្រីមាសចុងក្រោយនាឆ្នាំ ២០១៨ ការវិនិយោគភាគច្រើនគឺមានក្នុងវិស័យឧស្សាហកម្ម ប៉ុន្តែត្រីមាសទី១នាឆ្នាំនេះមើលឃើញមានការដោះដូរចម្រុះច្រើនទាំងហាងលក់ទំនិញ និងការិយាល័យ ព្រមទាំងមានក្នុងវិស័យឧស្សាហកម្មផងដែរ។
យ៉ាងណាក្តី ទីផ្សារអចលនទ្រព្យសម្រាប់ការប្រកបអាជីវកម្មក្នុងតំបន់មានភាពអន់ថយកាលពីដើមឆ្នាំនេះព្រោះតែកង្វល់ទាក់ទិននឹងទស្សនៈវិស័យសេដ្ឋកិច្ច។ ការវិនិយោគសរុបបានធ្លាក់ចុះ ៣៦% មកស្មើ ៣០.៥ប៊ីលានដុល្លារក្នុងត្រីមាសទី ១។
RCA បានបន្តថា ទាំងនេះរួមមានកង្វល់ដទៃទៀតដូចជាការអន់ថយសេដ្ឋកិច្ចប្រទែសចិន សង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន និងការធ្លាក់ចុះនៃតម្រូវការផលិតផលប្រើប្រាស់ប្រចាំថ្ងៃទូទាំងពិភពលោកជាដើម។
ប្រទេសចិននិងជប៉ុនទទួលរងការប៉ះពាល់ខ្លាំងជាងគេដោយមើលឃើញចំនួនវិនិយោគធ្លាក់ចុះដល់ទៅពីរខ្ទង់បើធៀបនឹងឆ្នាំមុន។
RCA បានកត់សម្គាល់ថា ការិយាល័យគឺជាអចលនទ្រព្យដែលត្រូវបានដោះដូរច្រើនជាងគេ ប៉ុន្តែការវិនិយោគលើហាងទំនិញបានកើនឡើង ៨%ផងដែរមកស្មើ ៩.៤ប៊ីលានដុល្លារបើធៀបនឹងឆ្នាំមុន ។ យ៉ាងណាក្តីការិយាល័យនៅតែទទួលបានចំណាប់អារម្មណ៍ច្រើនជាងគេពីវិនិយោគិនព្រោះទីផ្សារនេះបានប្រសើរឡើងច្រើនជាងគេក្នុងចំណោមទីផ្សារអចលនទ្រព្យទាំងអស់ ៕
កែសម្រួលដោយ ៖ សំណាង
ចែករំលែកព័តមាននេះ