រាជធានីភ្នំពេញ ៖ មន្ត្រីជាន់ខ្ពស់របស់ចិនបានបញ្ជាក់ជាថ្មីថា កម្ពុជានៅតែជាមិត្តដែកថែបរបស់ខ្លួន ទោះបីមានបញ្ហាអ្វីក៏ដោយ ។ ការបញ្ជាក់នេះធ្វើឡើងក្នុងជំនួបពិភាក្សារវាងលោក វ៉ាង យ៉ាជុន អនុរដ្ឋមន្ត្រីក្រសួងទំនាក់ទំនងអន្តរជាតិចិនជាមួយសម្តេចតេជោ ហ៊ុន សែន នាយករដ្ឋមន្ត្រី នាព្រឹកថ្ងៃទី២៤ ខែឧសភា ឆ្នាំ២០១៩ នៅវិមានសន្តិភាព ។
លោក វ៉ាង យ៉ាជុន បានលើកឡើងថា ដំណើរទស្សនកិច្ចមកកាន់កម្ពុជានាពេលនេះ គឺដើម្បីជំរុញនឹងបន្តការធ្វើការរាល់កិច្ចការទាំងឡាយដែលថ្នាក់ដឹកនាំកំពូលនៃប្រទេសទាំងពីរដែលមានសម្ដេចតេជោនាយករដ្ឋមន្ត្រី និងលោកប្រធានាធិបតីចិនស៊ីជីនពីង បានចុះហត្ថលេខានាពេលកន្លងមក ។ លោកបានបញ្ជាក់ថា «កម្ពុជា និងចិន គឺជាមិត្តដែកថែប ហើយទំនាក់ទំនងរវាងកម្ពុជា និងចិន នៅពេលនេះស្ថិតនៅលំដាប់ល្អបំផុត» ។ លោកបានបន្តថា ចំពោះឯកសារទាំងឡាយដែលបានចុះហត្ថលេខាជាមួយគ្នា នៅពេលកន្លងមក នៅក្នុងកិច្ចប្រជុំខ្សែក្រវាត់ និងផ្លូវនៅប្រទេសចិននានា គឺនឹងជំរុញទំនាក់ទំនងរវាងប្រទេសទាំងពីរអោយកាន់តែរឹងមាំថែមទៀត ជាពិសេស គឺនាំមកនូវផលប្រយោជន៍រួមសម្រាប់ប្រជាជន និងប្រទេសទាំងពីរ ដែលនឹងជួយជំរុញដល់ការអភិវឌ្ឍ និងពង្រីកនូវកិច្ចសហប្រតិបត្តិការអោយកាន់តែរឹងមាំថែមទៀត ។
លោក វ៉ាង យ៉ាជុន បានជម្រាបជូនសម្តេចតេជោថា នៅពេលដែលលោកបានចុះពីយន្តហោះមកដល់រាជធានីភ្នំពេញ គឺលោកបានសង្កេតឃើញរាជធានីភ្នំពេញមានភាពរស់រវើកស្រស់ស្អាត និងមានសក្តានុពលជាច្រើនផងដែរ ។ ក្នុងពេលស្នាក់នៅកម្ពុជាលោកនឹងទៅធ្វើទស្សនកិច្ចនៅខេត្តព្រះសីហនុ ដើម្បីសិក្សាអំពីហេដ្ឋារចនាសម្ព័ន្ធសម្រាប់ការវិនិយោគលើវិស័យឧស្សាហកម្មផ្សេងៗ ដែលកំពុងរីកដុះដាលយ៉ាងខ្លាំង នៅក្រុងព្រះសីហនុ ។ ជាមួយគ្នានោះដែរលោកយ៉ាជុន បញ្ជាក់ថា «ចិននៅតែបន្តជំរុញការវិនិយោគមកកាន់ព្រះរាជាណាចក្រកម្ពុជា និងជំរុញការបើកទីផ្សារសម្រាប់កម្ពុជា និងជួយដល់កម្ពុជាលើគ្រប់វិស័យ» ។
ជាការឆ្លើយតបសម្ដេចតេជោនាយករដ្ឋមន្ត្រីបានថ្លែងអំណរគុណចំពោះការផ្តាំផ្ញើសាកសួរសុខទុក្ខពីថ្នាក់ដឹកនាំកំពូលរបស់ចិន និងបានយល់ច្បាស់ទាំងស្រុង ចំពោះការលើកឡើងរបស់លោក វ៉ាង យ៉ាជុន ពាក់ព័ន្ធទៅនឹងទំនាក់ទំនងផង ជាមួយនឹងសក្តានុពលក្នុងការពង្រីកកិច្ចសហប្រតិបត្តិការផង ជាពិសេសឈរលើឯកសារដែលបានចុះហត្ថលេខារួចហើយនោះ ដែលជាឯកសារប្រវត្តិសាស្ត្រពាក់ព័ន្ធទៅនឹងសហគមន៍មួយជោគវាសនាមួយ ដែលបានចុះហត្ថលេខានៅពេលកន្លងមក ។
សម្ដេចតេជោបានថ្លែងអំណរគុណចំពោះប្រទេសចិនជាមិត្តក្នុងការជួយជំរុញការវិនិយោគចិនអោយបានកាន់តែច្រើនមកកាន់កម្ពុជា ស្របពេលនឹងការជួយជ្រោមជ្រែងបើកចំហរទីផ្សារកសិផល និងផលិតផលផ្សេងៗជាច្រើនទៀតរបស់កម្ពុជាទៅកាន់ទីផ្សាររបស់ប្រទេសចិននោះ ៕ កែសម្រួលដោយ ៖ សុឃាក់
ចែករំលែកព័តមាននេះ