រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា កម្មករម្នាក់ឡើងទៅដំបូលពហុកីឡដ្ឋានជាតិអូឡាំពិកដើម្បីបាញ់ថ្នាំកម្ចាត់សត្វប្រចៀវ បណ្តាលឱ្យធ្លាក់ស្លាប់ភ្លាមនៅនឹងកន្លែងកើតហេតុ បង្កការភ្ញាក់ផ្អើលកាលពីវេលាម៉ោងប្រមាណ៩និង៣០នាទីព្រឹកថ្ងៃទី២៤ ខែឧសភា ឆ្នាំ២០១៩ ស្ថិតក្នុងពហុកីឡដ្ឋានជាតិអូឡាំពិក សង្កាត់វាលវង់ ខណ្ឌ៧មករា រាជធានីភ្នំពេញ ។
ជនរងគ្រោះដែលស្លាប់ឈ្មោះ សន ស៊ីម ភេទប្រុស អាយុ២៣ឆ្នាំ មុខរបរជាកម្មករបាញ់ថ្នាំកម្ចាត់សត្វប្រចៀវ ។
តាមសាក្សីជាកម្មករដូចគ្នាបានរៀបរាប់ប្រាប់សមត្តកិច្ចឲ្យដឹងថា នៅវេលាម៉ោងកើតហេតុខាងលើ កម្មករ៣នាក់ រួមទាំងជនជនរងគ្រោះបានឡើងទៅបាញ់ថ្នាំកម្ចាត់សត្វប្រចៀវនៅលើដំបូលពហុកីឡដ្ឋានជាតិអូឡាំពិក ពេលនោះប្រហែលជាជនរងគ្រោះជាន់ផុងក្តាររន្ទា បណ្តាលឲ្យធ្លាក់ស្លាប់នៅនឹងកន្លែងកើតហេតុតែម្តង ។
ក្រោយពេលកើតហេតុ សពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ