ខេត្តសៀមរាប ៖ អាជ្ញាធរជាតិអប្សរាតែងតែយកចិត្តទុកដាក់ថែរក្សាព្រៃឈើដែលមានស្រាប់ និងដាំដើមឈើបន្ថែមតាមតំបន់ជុំវិញប្រាសាទដែលជាតំបន់ព្រៃការពារ ដោយមូលហេតុតំបន់ខ្លះត្រូវបានទន្ទ្រានពីប្រជាជន, ភ្លើងឆេះព្រៃ និងក្រោយពីកាត់ក្រីដើមឈើងាប់ដែលអាចបង្កហានីភ័យផ្សេងៗដល់មនុស្ស សត្វ ប្រាសាទ និងបរិស្ថាន។
លោក ស៊ិន ពិសី មន្ត្រីបច្ចេកទេសនៃនាយកដ្ឋានគ្រប់គ្រងព្រៃឈើ បរិស្ថាន និងទេសភាពវប្បធម៌ បានឱ្យដឹងថា ព្រៃឈើក្នុងឧទ្យានអង្គរ បែងចែងចែកជាបីសំខាន់ៗគឺ តំបន់ឧទ្យានបន្ទាយស្រី តំបន់ឧទ្យានកណ្តាល និងតំបន់ឧទ្យានរលួស លើផ្ទៃដី៤០១ម៉ែត្រក្រឡា និងចែកជា១៤បុស្តិ៍ ដែលមានបុគ្គលិកចំនួន៨៤នាក់ ចុះយាមល្បាតជាប្រចាំ ថែទាំ ព្រមទាំងព្យាលបាលដើមឈើ ពេលមានជំងឺ លើកលែងតែតំបន់ប្រាសាទបេងមាលា ស្ថិតនៅក្រៅតំបន់ឧទ្យានអង្គរ។
លោកបន្តទៀតថា ក្រុមភ្នាក់ងារគ្រប់គ្រងព្រៃឈើតែងមានកម្មវិធីដាំកូនឈើជារៀងរាល់ឆ្នាំ ហើយមួយលើកៗជាច្រើនរយដើម ដោយមានការចូលរួមពីថ្នាក់ដឹកនាំអាជ្ញាធរជាតិអប្សរា ស្ថាប័នរដ្ឋ ស្ថាប័នអន្តរជាតិ វិស័យឯកជន សហគមន៍ ព្រះសង្ឃ និងសិស្សសាលាជាដើម បំពេញនូវទីតាំងដែលគ្មានព្រៃឈើ សរុបប្រមាណ៣ម៉ឺនដើមក្នុងមួយឆ្នាំៗនៅឧទ្យានអង្គរ។
លើសពីនេះ អាជ្ញាធរជាតិអប្សរាក៏បានចែកកូនឈើដល់ស្ថាប័នផ្សេងៗ ព្រះសង្ឃ និងប្រជាជនក្នុងតំបន់អង្គរទៅដាំក្នុងវត្ត ភូមិ ឃុំ មូលដ្ឋានរបស់ខ្លួនដើម្បីបង្កើនចំនួនព្រៃឈើ បង្កើនគម្របបៃតងដល់បរិស្ថានឱ្យមាន បរិយាកាសស្រស់ថ្លា ពិសេស គឺទាក់ទាញភ្ញៀវទេសចរ។
លោក ពិសី បញ្ជាក់ថា ព្រៃឈើមានសារៈសំខាន់ទាំងបរិស្ថាន និងសោភ័ណភាពសម្រាប់មនុស្សជាតិ។ លោកក៏បានអំពាវនាវដល់អាជ្ញាធរមូលដ្ឋានជួយអប់រំដល់ប្រជាជនកុំឱ្យកាប់ទន្ទ្រានដីព្រៃធ្វើជាកម្មសិទ្ធិ ចូលរួមដាំដើមឈើឱ្យបានច្រើនជាងបំផ្លាញ និងពេលដុតចម្ការត្រូវគ្រប់គ្រងភ្លើងឱ្យបានត្រឹមត្រូវចៀសវាងមានគ្រោះថ្នាក់ និងមានហានីភ័យដល់ព្រៃឈើក្នុងតំបន់ឧទ្យានអង្គរ៕ (កែសម្រួលដោយ ៖ ធីតា)
ចែករំលែកព័តមាននេះ