ខេត្តត្បូងឃ្មុំ ៖ ស្រី្តជាប្រពន្ធត្រូវរន្ទះបាញ់ស្លាប់ ចំណែកកូនតូចៗ២នាក់ទៀតបានរងរបួស ពេលស្ត្រីរងគ្រោះ និងកូនៗឈរចាំប្តីបង់សំណាញ់យកត្រីនៅបឹង ហើយស្របពេលមេឃកំពុងតែភ្លៀងលាយឡំដោយខ្យល់កន្ត្រាក់ និងមានរន្ទះបាញ់ផងនោះ ។
ហេតុការណ៍ដ៏រន្ធត់ខាងលើបានកើតឡើងនៅចំណុចបឹងត្រពាំងជោ ក្នុងភូមិឈើទាលទី២ ឃុំពាមជីលាំង ស្រុកត្បូងឃ្មុំ កាលពីវេលាម៉ោង៣និង៣០នាទីរសៀលថ្ងៃទី២៣ ឧសភា ២០១៩។
លោកឆយ វុទ្ធី នាយប៉ុស្តិ៍រដ្ឋបាលពាមជីលាំង ប្រាប់ឲ្យដឹងថា ស្ត្រីជាប្រពន្ធដែលស្លាប់ឈ្មោះ ម៉ាន ស៊ាស អាយុ២៥ឆ្នាំ ជាជនជាតិខ្មែរអ៊ិស្លាម រីឯកូនតូចៗទាំង២នាក់ដែលរងរបួសស្រាល ក្នុងនោះម្នាក់ឈ្មោះ ម៉ាន អាំម៉ី ភេទស្រី អាយុ៩ឆ្នាំ ជាជនជាតិខ្មែរអ៊ិស្លាម បានរងរបួសត្រង់ខ្នង និងម្នាក់ទៀតឈ្មោះម៉ាន ស្រីមី ភេទស្រី អាយុ១ខួប ជាជនជាតិខ្មែរអ៊ិស្លាម បានរងរបួសមានស្នាមក្រហមត្រង់ម្រាមដៃ ។ ចំណែកបុរសជាប្តីឈ្មោះ សាន់ ម៉ាន អាយុ២៩ឆ្នាំ ជាជនជាតិខ្មែរអ៊ិស្លាម ។ អ្នកទាំង៤រស់នៅភូមិ-ឃុំកើតហេតុខាងលើ ។
លោកនាយប៉ុស្តិ៍រដ្ឋបាលេពាមជីលាំងបានប្រាប់បន្តថា មុនពេលកើតហេតុ ប្តីប្រពន្ធនិងកូនបានជិះម៉ូតូចេញពីផ្ទះឆ្ពោះមកបឹង ដែលមានចំងាយប្រមាណជាង១គីឡូម៉ែត្រ ដោយបុរសជាប្តីបានចុះមកបង់សំណាញ់ចាប់ត្រីសម្រាប់យកមកធ្វើម្ហូបទទួលទាន លុះពេលបង់ត្រីបានខ្លះ ស្របពេលនោះមេឃក៏ងងឹត និងមានភ្លៀងធ្លាក់មកលាយឡំដោយខ្យល់កន្ត្រាក់ផង ហើយក៏មានផ្លេកបន្ទោរព្រាកៗខ្វត់ខ្វែងនៅលើអាកាស ស្រាប់តែមានរន្ទះបាញ់លាន់ក្ឌាំងត្រូវចំស្ត្រីជាប្រពន្ធដែលកំពុងឈរចាំប្តីនៅលើគោក បណ្តាលឱ្យស្លាប់មួយរំពេច ចំណែកកូនតូចៗទាំងនាក់បានរងរបួសស្រាល ។
ក្រោយកើតហេតុ លោកនាយប៉ុស្តិ៍បានរាយការណ៍មកលោកវរសេនីយ៏ឯក សួស ស៊ាងលី អធិការនគរបាលស្រុកត្បូងឃ្មុំ និងបានចាត់ឲ្យកម្លាំងនគរបាលព្រហ្មទណ្ឌចុះមកពិនិត្យសពស្ត្រីរងគ្រោះ រកឃើញថា មានស្នាមជាំខ្មៅពេញខ្លួន និងរបកស្បែកលើដើមទ្រូងមួយកន្លែង ព្រមទាំងឆេះសក់។
បន្ទាប់ពីពិនិត្យរួច សមត្ថកិច្ចជំនាញបានឱ្យដឹងថា ស្ត្រីរងគ្រោះពិតជាស្លាប់ដោយសាររន្ទះបាញ់ប្រាកដមែន និងបានប្រគល់សពស្ត្រីរងគ្រោះឱ្យទៅក្រុមគ្រួសារ និងសាច់ញាតិដើម្បីរៀបចំធ្វើបុណ្យតាមប្រពៃណីរបស់ខ្មែរអ៊ិស្លាម៕ (កែសម្រួលដោយ ៖ ធីតា)
ចែករំលែកព័តមាននេះ