រាជធានីភ្នំពេញ ៖ ប្រទេសចិនមកកម្ពុជាមិនគ្រាន់តែជួយអភិវឌ្ឍប្រទេសកម្ពុជាប៉ុណ្ណោះទេ ប៉ុន្តែក៏បានជួយពង្រឹងភាពជាម្ចាស់ និងឯករាជ្យភាពរបស់ប្រទេសកម្ពុជាទៀតផង ។ នេះបើតាមការលើកឡើងរបស់ប្រធានស្តីទីព្រឹទ្ធសភា លោកទេព ងន ។ ក្នុងជំនួបពិភាក្សាទ្វេភាគីជាមួយលោក វ៉ាង យ៉ាងជុន អនុរដ្ឋមន្ត្រីក្រសួង ទំនាក់ទំនង អន្តរជាតិនៃគណកម្មាធិការមជ្ឈិម បក្សកុម្មុយនីស្តចិន កាលពីរសៀលថ្ងៃទី២៣ ខែឧសភា នៅវិមានព្រឹទ្ធសភា ។
លោកទេព ងន បានគូសបញ្ជាក់ថា ក្នុងក្របខណ្ឌកិច្ចសហប្រតិបត្តិការទ្វេភាគីរវាងព្រឹទ្ធសភាកម្ពុជា និងក្រុមប្រឹក្សានយោបាយប្រជាជនចិនក៏ត្រូវបានពង្រីកជាលំដាប់ ។ ថ្នាក់ដឹកនាំស្ថាប័ន និងគណៈកម្មការជំនាញសភានៃប្រទេសទាំងពីរបានផ្លាស់ប្តូរទស្សនកិច្ចគ្នាទៅវិញទៅមកជាបន្តបន្ទាប់ ។ ជំនួយឧបត្ថម្ភរបស់សភាប្រឹក្សានយោបាយប្រជាជនចិន និងរដ្ឋាភិបាលចិន ចំពោះព្រឹទ្ធសភាកម្ពុជាបានរួមចំណែកយ៉ាងជាក់ស្តែងដល់ការពង្រឹងស្ថាប័ន និងលើកកម្ពស់សមត្ថភាពការងាររបស់មន្ត្រីនៃអគ្គលេខាធិការដ្ឋានព្រឹទ្ធសភាកម្ពុជា ។ ប្រធានស្តីទីព្រឹទ្ធសភាបានវាយតម្លៃខ្ពស់ចំពោះតួនាទីអន្តរជាតិរបស់ប្រទេសចិនដែលបាននាំមកនូវសន្តិភាព ស្ថិរភាព សន្តិសុខ និងការអភិវឌ្ឍសេដ្ឋកិច្ចក្នុងតំបន់ និងពិភពលោក ។
ប្រទេសកម្ពុជាគាំទ្រយ៉ាងពេញទំហឹងចំពោះគំនិតផ្ដួចផ្ដើមរបស់លោក ស៊ី ជិនភីង ដែលបានប ង្កើតឡើងនូវគោលនយោបាយខ្សែក្រវ៉ាត់មួយផ្លូវមួយ និងធនាគារវិនិយោគហេដ្ឋារចនាសម្ព័ន្ធ អាស៊ី (AIIB) ព្រមទាំងកិច្ចសហប្រតិបត្តិការចិនអាស៊ាន អាស៊ានបូក៣ តំបន់ពាណិជ្ជកម្ម សេរីចិន អាស៊ាន និងកិច្ចសហប្រតិបត្តិការមេគង្គឡានឆាង ។ ប្រទសកម្ពុជានឹងទទួលបាននូវផលប្រយោជន៍យ៉ាងច្រើនពីកិច្ចសហប្រតិបត្តិការទាំងអស់ខាងលើនេះ ។ ជាមួយគ្នានោះដែរលោកប្រធានស្តីទីព្រឹទ្ធសភាក៏បានបញ្ជាក់អំពីការប្ដេជ្ញាចិត្តយ៉ាងមុតមាំបន្តសហការយ៉ាងជិតស្និទ្ធជាមួយប្រទេសចិន ដើម្បីជំរុញការផ្លាស់ប្ដូរប្រាស្រ័យទាក់ទងរវាងសភារដ្ឋាភិបាលក៏ដូចជា ប្រជាជន និងប្រជាជន និងបន្តលើកកម្ពស់ចំណងមិត្តភាពជាបងប្អូន និងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ ដើម្បីផលប្រយោជន៍របស់ប្រជាជននៃប្រទេសទាំងពីរ និងដើម្បីសន្តិភាពវិបុលភាពរួមនៅក្នុង និងក្រៅតំបន់ ។
ប្រទេសកម្ពុជា និងប្រទេសចិន គឺជាអ្នកជិតខាងល្អ មិត្តល្អ និងជាដៃគូល្អ ។ ក្នុងជំនួបនោះដែរលោកវ៉ាង យ៉ាងជុន បានវាយតម្លៃខ្ពស់ចំពោះការរីកចម្រើនរបស់ប្រទេសកម្ពុជា ជាពិសេសរាជធានីភ្នំពេញមានការអភិវឌ្ឍយ៉ាងឆាប់រហ័ស ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខធ្វើឱ្យវិស័យសេដ្ឋកិច្ចនៃប្រទេសកម្ពុជាមានការសន្ទុះរីកចម្រើនជាលំដាប់ ។
លោកក៏បានជម្រាបជូនថា នាខែមិថុនាខាងមុខនេះក្រសួងទំនាក់ទំនងអន្តរជាតិ និងគណៈកម្មាធិការបក្សទីក្រុងចុងស៊ីន និងរៀបចំសិក្ខាសាលាស្តីពីការតភ្ជាប់រវាងផ្លូវគោក និងផ្លូវសមុទ្រ នៅប្រទេសចិនក្នុងក្របខណ្ឌខ្សែក្រវាត់មួយ និងផ្លូវមួយ ។ លោកបានគូសបញ្ជាក់ថា« ប្រទេសចិន សូមស្នើសុំពង្រឹងនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ តាមរយៈការផ្លាស់ប្តូរដំណើរទស្សនកិច្ចរបស់ថ្នាក់ដឹកនាំប្រទេសទាំងពីរ ដើម្បីបង្កើនទំនុកចិត្តគ្នាទៅវិញទៅមក» ៕(កែសម្រួលដោយ ៖ សុឃាក់)
ចែករំលែកព័តមាននេះ