រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលខណ្ឌមានជ័យសហការជាមួយនគរបាលខេត្តកំពង់ស្ពឺ និងនគរបាលស្រុកត្រាំកក់ នៃខេត្តតាកែវធ្វើការតាមចាប់ឃាត់ខ្លួនបាន បន្ទាប់ពីជនសង្ស័យរូបនេះបានលួចរថយន្តមួយគ្រឿងម៉ាកព្រូសពីការ៉ាស់លាងឡាន និងផ្ញើរថយន្តមួយកន្លែងយីហោ «មាតា » ស្ថិតក្នុងភូមិត្នោតជ្រុំ សង្កាត់បឹងទំពន់ទី២ ខណ្ឌមានជ័យ កាលពីវេលាម៉ោង០២ និង៥០នាទីរំលងទាបភ្លឺ ថ្ងៃទី២៣ ខែឧសភា ឆ្នាំ២០១៩ ។
ជនសង្ស័យមានឈ្មោះ ហុក រ៉ាវី ភេទប្រុស អាយុ២៨ឆ្នាំ មានស្រុកកំណើតនៅភូមិអំពិល ឃុំពន្លៃ ស្រុកអង្គរបូរី ខេត្តតាកែវ ។ ជនសង្ស័យរូបនេះទើបតែចូលធ្វើការជាអ្នកលាងរថយន្តនៅការ៉ាស់ខាងលើបាន២ថ្ងៃប៉ុណ្ណោះ ដោយម្ចាស់ការ៉ាស់សម្រេចអោយរូបគេសម្រាកនៅក្នុងការ៉ាស់ ។
តាមប្រភពព័ត៌មានអោយដឹងថា នៅវេលាយប់ថ្ងៃកើតហេតុម្ចាស់រថយន្តព្រូសខាងលើបានយករថយន្តទៅផ្ញើនៅការ៉ាស់ខាងលើ ដែលរថយន្តមានពណ៌ស្ករ ពាក់ស្លាកលេខភ្នំពេញ 2AY-7042 ដោយយកទៅផ្ញើនោះ គឺជនសង្ស័យខាងលើជាអ្នកទទួល និងបានយកសោរថយន្តពីម្ចាស់រថយន្តខាងលើផងដែរ ។ ប្រភពបន្តថា នៅយប់ថ្ងៃខែដដែលដោយសារអ្នកគ្រប់គ្រងការ៉ាស់ជាប់រវល់ក៏បានផ្ញើសោទ្វារការ៉ាស់ទៅជនសង្ស័យខាងលើរហូតវេលាទាបភ្លឺ ដោយឃើញឱកាសល្អ ណាមួយជនសង្ស័យមានទាំងសោរថយន្ត និងសោទ្វារការ៉ាស់ក៏ធ្វើអោយរូបគេសម្រេចធ្វើសកម្មភាពលួចរថយន្តព្រូសខាងលើ ហើយជិះរត់គេចតែម្តងទៅ ។
រហូតមកទល់ហ្នឹងវេលាព្រឹកថ្ងៃខែដដែល ម្ចាស់រថយន្ត និងម្ចាស់ការ៉ាស់បានទៅសុំកិច្ចអន្តរាគមន៍ពីសមត្ថកិច្ចមូលដ្ឋាន ខណៈរថយន្តព្រូសដែលត្រូវជនសង្ស័យលួចទៅនោះ គឺមានជាប់ប្រព័ន្ធ GPS ដូច្នេះហើយកម្លាំងនគរបាលខណ្ឌមានជ័យបានសហការជាមួយម្ចាស់រថយន្ត ឈានទៅស្វែករកចាប់ខ្លួនជនសង្ស័យរហូតដល់ខេត្តកំពង់ស្ពឺ តាមបណ្តោយផ្លូវលេខ៤១ ។ ពេលនោះនគរបាលខណ្ឌមានជ័យបានសហការជាមួយនគរបាលខេត្តកំពង់ស្ពឺបានស្ទាក់ព័ទ្ធចាប់ជនសង្ស័យរូបនោះ តាមរយៈប្រព័ន្ធ GPS រហូតស្វែករកឃើញ ប៉ុន្តែជនសង្ស័យបានព្យាយាមបើករត់គេចពីសមត្ថកិច្ច រហូតដល់ក្នុងភូមិសាស្ត្រស្រុកត្រាំកក់ ខេត្តតាកែវ ជនសង្ស័យបានបើករថយន្តបុកគ្នាជាមួយនឹងរថយន្តមួយគ្រឿងទៀត ទើបកម្លាំងសមត្ថកិច្ចធ្វើការចាប់ឃាត់បានទាំងមនុស្ស និងរថយន្តតែម្តងទៅ ។
ក្រោយការឃាត់បានហើយនោះសមត្ថកិច្ចនៃអធិការដ្ឋាននគរបាលស្រុកត្រាំកក់បានធ្វើសំណុំឯកសារប្រគល់ជនសង្ស័យ និងរថយន្តជូនទៅនគរបាលខណ្ឌមានជ័យ ដែលជាម្ចាស់ករណី ក្នុងការបន្តនីតិវិធីច្បាប់ ។ បច្ចុប្បន្នជនសង្ស័យត្រូវបានសាកសួរនាំនៅប៉ុស្តិ៍រដ្ឋបាលនគរបាលបឹងទំពន់ទី២ និងត្រៀមកសាងសំណុំរឿងបញ្ចូនទៅតុលាការ ចាត់ការទៅតាមនីតិវិធីច្បាប់នៅពេលក្រោយ ។ ចំណែករថយន្តព្រូសដែលជនសង្ស័យលួច សមត្ថកិច្ចតម្រូវអោយម្ចាស់រថយន្តយកឯកសារមកផ្ទៀតផ្ទាត់ និងប្រគល់ជូនយកទៅប្រើប្រាស់វិញ ៕ (កែសម្រួលដោយ៖ សុឃាក់)
ចែករំលែកព័តមាននេះ