អ្នកជំនាញជាច្រើនបានយល់ស្របថាវាពិតជាពិបាកណាស់ក្នុងការទស្សទាយថាស្មាតហ្វូនក្នុងឆ្នាំ ២០២៩ នឹងមានរូបរាងយ៉ាងដូចម្តេចព្រោះទីផ្សារគឺជាអ្នកសម្រេចលើអនាគតរបស់ការបង្កើតថ្មីផ្សេងៗដូចជាស្មាតហ្វូនដែលអាចបត់បែនបានជាដើម ។ យ៉ាងណាក្តី ការព្យាករណ៍ពីអ្នកដែលធ្វើការក្នុងវិស័យបច្ចេកវិទ្យា គ្រិះស្ថានអប់រំ និងអ្នកតាមដានផ្សេងៗមានភាពស្របគ្នាត្រង់ការប្រើប្រាស់ Artificial Intelligence (AI) ។
លោក Nei Mawston ដែលជានាយកប្រតិបត្តិម្នាក់មកពីក្រុមហ៊ុនផ្តល់សេវាកម្មប្រឹក្សាយោបល់ Strategy Analytics បាននិយាយថា «ស្មាតហ្វូនដែលមាននៅ១០ឆ្នាំខាងមុខអាចប្រៀបបានជាជំនួយការផ្ទាល់ខ្លួនដែលនៅក្នុងហោប៉ៅរបស់អ្នក ប៉ុន្តែវាក៏អាចជាវេជ្ជបណ្ឌិតក្នុងហោប៉ៅរបស់អ្នក ធនាគារក្នុងហោប៉ៅអ្នក និងអ្នកបម្រើក្នុងហោប៉ៅអ្នកដែរ»។
វាអាចបង្កឲ្យមានភាពងាយស្រួលដល់អ្នកប្រើប្រាស់ តែអ្នកប្រើប្រាស់ក៏ត្រូវបោះបង់ភាពឯកជនមួយចំនួនដែរ។ ដោយហេតុដូចនេះលោក R. David Edelman ដែលជាអតីតជំនួយការពិសេសរបស់លោកប្រធានាធិបតី Barack Obama របស់សហរដ្ឋអាមេរិក និងសព្វថ្ងៃធ្វើការក្នុងវិទ្យាស្ថានបច្ចេកវិទ្យា Massachusetts បានឲ្យដឹងថា ស្មាតហ្វូនដែលមានបច្ចេកវិទ្យា AI អាចអនុញ្ញាតឲ្យរដ្ឋាភិបាលគ្រប់គ្រងច្រើន។
ប្រទេសចិនកំពុងតែតាមដានអាកប្បកិរិយារបស់ពលរដ្ឋខ្លួនរួចទៅហើយដែលរួមមានសកម្មភាពលើអ៊ីនធើណែតផងដែរដើម្បីផ្តល់ជាពិន្ទុសង្គមដើម្បីសន្សំពិន្ទុដើម្បីទទួលបានអត្ថប្រយោជន៍អ្វីមួយ។ មានសេចក្តីរាយការណ៍ថា ពេលដែលពលរដ្ឋបាត់បង់ពិន្ទុដែលមកពីពួកគេបានប្រព្រឹត្តសកម្មភាពមិនល្អណាមួយនោះពួកគេអាចនឹងត្រូវបានហាមឃាត់មិនឲ្យទិញសំបុត្រយន្តហោះ ឬសំបុត្ររថភ្លើងជាដើម។
មួយក្រុមទៀតបាននិយាយថា ស្មាតហ្វូនដែលមាន Sensor ល្អជាងមុន មេម៉ូរីធំជាងមុន និងសមត្ថភាព Processor ខ្ពស់ជាងមុនអាចប្រើប្រាស់ទិន្នន័យបានពីអ្នកប្រើប្រាស់ដើម្បីធ្វើការសម្រេចចិត្តមួយចំនួន។ មានន័យថាស្មាតហ្វូនប្រៀបដូចជាឆ្លុះបញ្ចាំងពីអ្នកប្រើប្រាស់ សម្រេចចិត្តដោយយោងតាមអ្វីដែលអ្នកប្រើប្រាស់ចូលចិត្តឬចង់បាននិងត្រូវការជាដើម ៕
ចែករំលែកព័តមាននេះ