រាជធានីភ្នំពេញ ៖ បុរសមានសតិមិនល្អម្នាក់ បានត្រូវក្រុមគ្រួសារនាំយកទៅដាក់នៅមណ្ឌលសំចសង្គមកិច្ចរាជធានីភ្នំពេញ ឬហៅថា មណ្ឌលព្រៃស្ពឺ កាលពីជិត១ឆ្នាំមុន ដើម្បីឲ្យខាងមណ្ឌលនេះជួយថែរក្សា ប៉ុន្តែពេលនេះ ស្រាប់តែបុរសខាងលើ បានស្លាប់បាត់បង់ជីវិត ។ ចំណែកខាងមណ្ឌលមិនបានផ្ដល់ដំណឹងពីការស្លាប់នេះទៅឲ្យក្រុមគ្រួសារសពដឹងឡើយ តែបែរជាដឹកសពយកទៅកាន់ឈាបនដ្ឋានវត្តប្ញស្សីសាញ់ រួចហើយបូជាយ៉ាងតក់ក្រហល់ ដោយមិនបានឆ្លងកាត់ការធ្វើកោសល្យវិច័យពីសំណាក់នគរបាលបច្ចេកទេស ឬគ្រូពេទ្យផ្នែកពិនិត្យសព និងរង់ចាំក្រុមគ្រួសារសពទៅដល់សិនឡើយ ។
ដោយសារតែបែបនេះទើបធ្វើឲ្យក្រុមគ្រួសារសពកើតទុក្ខមិនសុខចិត្ត ហើយរាយការណ៍ជូននគរបាលសុំឲ្យជួយធ្វើការស្រាវជ្រាវរកមូលហេតុ ដោយពួកគាត់ចាត់ទុកថាការស្លាប់នេះហាក់មានអាថ៌កំបាំង និងសង្ស័យមានរឿងមិនប្រក្រតី ។ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោងប្រមាណ៥ និង១០នាទីល្ងាចថ្ងៃទី២១ ខែឧសភា នៅមណ្ឌលព្រៃស្ពឺ ស្ថិតក្នុងភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ ។
បុរសដែលស្លាប់ឈ្មោះ នួន រដ្ឋា អាយុ២៧ឆ្នាំ មានទីលំនៅក្នុងភូមិឫស្សី សង្កាត់ស្ទឹងមានជ័យខណ្ឌមានជ័យ ។ បើតាមក្រុមគ្រួសារឲ្យដឹងថា កាលពីអំឡុងខែកក្កដា ឆ្នាំ២០១៨កន្លងទៅ ពួកគាត់បាននាំយកបុរសនេះទៅដាក់នៅមណ្ឌលព្រៃស្ពឺ ។ ការសម្រេចចិត្តយកទៅដាក់នៅមណ្ឌលនេះ ពុំមែនមកពីជនរងគ្រោះញៀនថ្នាំឡើយ គឺព្រោះតែរូបគេមានសតិមិនល្អប៉ុណ្ណោះ លុះមកដល់ល្ងាចថ្ងៃទី២១ ខែឧសភា ស្រាប់តែពួកគាត់ទទួលដំណឹងថាជនរងគ្រោះស្លាប់បាត់ទៅហើយ ។
ប្រភពដដែលបន្តថា ពួកគាត់មិនបានដឹងថាជនរងគ្រោះស្លាប់ដោយរបៀបណាទេ ព្រោះនៅ ខណៈនោះខាងមណ្ឌលមិនបានប្រាប់ពួកគាត់ដឹងឡើយ ។ ក្រោយពីទទួលបានដំណឹងពីមរណភាពនេះភ្លាម ពួកគាត់មានការតក់ស្លុតខ្លាំងណាស់និងបាននាំគ្នាទៅកាន់មណ្ឌល ។ ប៉ុន្តែនៅពេលទៅដល់ទើបដឹងថា សពត្រូវបានគេនាំយកទៅតម្កល់ទុកនៅឈាបនដ្ឋានវត្តឫស្សីសាញ់ អត់មាននៅក្នុងមណ្ឌលទេ ហើយពួកគាត់ក៏នាំគ្នាទៅកាន់វត្តនោះ ។ នៅពេលទៅដល់ក៏រឹតតែតក់ស្លុតថែមទៀត គឺសពត្រូវបានខាងមណ្ឌលឲ្យតាអាចារ្យបូជាបាត់ទៅហើយ ទើបពួកគាត់ សម្រេចចិត្តរាយការណ៍ជូននគរបាលខណ្ឌពោធិ៍សែនជ័យសុំឲ្យជួយធ្វើការស្រាវជ្រាវរកមូលហេតុនៃការស្លាប់នេះ ឲ្យបានច្បាស់លាស់ ។
រឿងដែលសង្វេគនោះដែរ គឺការបូជាសពដោយគ្មានការធ្វើបុណ្យឡើយ ។ ប៉ុន្តែទោះបីជាសពត្រូវបានបូជាហើយក្ដី ក៏ក្រុមគ្រួសារបានរៀបចំធ្វើបុណ្យសពនៅវត្តឫស្សីសាញ់ ស្ថិតក្នុងសង្កាត់ព្រៃស ខណ្ឌដង្កោដែរ ។ ម្យ៉ាងទៀតពេលនេះពួកគាត់មិនទាន់អាចផ្ដល់បទសម្ភាសន៍ដល់អ្នកសារព័ត៌មានបានច្រើនទេ រង់ចាំធ្វើបុណ្យសពរួចរាល់សិន ។សាក្សីម្នាក់បានបំភ្លឺជូននគរបាលថា កាលពីវេលាម៉ោងប្រហែល៨និង៤០នាទីព្រឹកថ្ងៃទី២១ខែឧសភា បុរសរងគ្រោះមានអាការមិនស្រួលខ្លួន ហើយគាត់បាននាំទៅឲ្យគ្រូពេទ្យប្រចាំមណ្ឌលព្យាបាល ។
ប៉ុន្តែខណៈនោះជំងឺកាន់តែធ្ងន់មិនបានធូរស្បើយឡើយ ទើបគ្រូពេទ្យនៅទីនោះឲ្យគាត់បញ្ជូនបន្តទៅកាន់មន្ទីរពេទ្យបង្អែកពោធិ៍ចិនតុង ហើយគាត់ក៏ដឹកជនរងគ្រោះទៅកាន់មន្ទីរពេទ្យបង្អែកនោះ ។ លុះពេលទៅដល់គ្រូពេទ្យប្រាប់ថា ជនរងគ្រោះស្លាប់បាត់ហើយទើបគាត់រាយការណ៍ប្រាប់ប្រធានមណ្ឌល ហើយប្រធានមណ្ឌលប្រាប់ឲ្យគាត់ដឹកសពទៅតម្កល់នៅឈាបនដ្ឋានវត្តឫស្សីសាញ់ ។ នៅវេលាម៉ោង១១និង៥០នាទីថ្ងៃត្រង់ គាត់បានចេញទៅហូបបាយ លុះហូបរួចត្រឡប់មកវត្តវិញស្រាប់តែឃើញសពត្រូវបានគេបូជាបាត់ទៅហើយ ។
ទាក់ទិនទៅនឹងករណីនេះ នគរបាលខណ្ឌ ពោធិ៍សែនជ័យបានសម្ដែងការអាក់អន់ស្រពន់ចិត្តយ៉ាងខ្លាំងចំពោះប្រធានមណ្ឌល ដែលមិនបានសហការជាមួយនគរបាលក្នុងករណីមានមនុស្សស្លាប់បែបនជ ។ នៅពេលទទួលដំណឹងពីក្រុមគ្រួសារសព កម្លាំងនគរបាលប៉ុស្តិ៍ចោមចៅ ២ចំនួន២ទៅ៣នាក់ បានទៅកាន់មណ្ឌលខាងលើដើម្បីសួរនាំព័ត៌មាន ប៉ុន្តែប្រធានមណ្ឌលមិនត្រឹម តែមិនសហការអនុញ្ញាតឲ្យចូលទៅក្នុងមណ្ឌលប៉ុណ្ណោះទេ ថែមទាំងចោទប្រកាន់ទាំងមិនសមហេតុផលថានគរបាលទៅអុកឡុកព័ទ្ធកន្លែងគាត់ទៀត ទាំងនគរបាលមិនបានចូលក្នុងផង គឺបានត្រឹមតែឈរនៅខាងមុខមណ្ឌលប៉ុណ្ណោះ ។
ដោយសារតែខាងមណ្ឌលមិននិយាយរក ទើបកម្លាំងនគរបាលដកថយទៅកាន់វត្តឫស្សីសាញ់ ជួបបំភ្លឺពីក្រុមគ្រួសារសពវិញ និងមិនបានធ្វើអ្វីដូចដែលប្រធានមណ្ឌលចោទប្រកាន់ទេ ។ រឿងរ៉ាវនេះមិនទាន់ចប់ត្រឹមនេះទេ ព្រោះគ្រួសារសពទុកពេលធ្វើបុណ្យសិន ឯការស្វែងរកការបំភ្លឺពីប្រធានមណ្ឌលជុំវិញករណីនេះមិនបានទទួលជោគជ័យឡើយ ៕ (សម្រួលដោយ៖ ស្រីណា)
ចែករំលែកព័តមាននេះ