ខេត្តសៀមរាប ៖ មន្ដ្រីអាជា្ញធរអប្សរាបានថ្លែងថាប្រាសាទភ្នំបាខែងដែលជាទីកន្លែងខ្ពស់ជាងគេនៃរមណីយដ្ឋានវប្បធម៌ប្រវត្ដិសាស្ដ្រអង្គរបេតិកភណ្ឌពិភពលោកបានក្លាយទៅជាតំបន់ដ៏មានប្រជាប្រិយភាពបំផុតសំរាប់ទាក់ទាញភ្ញៀវទេសចរជាតិ-អន្ដរជាតិទស្សនាព្រះអាទិត្យអស្ដង្គត ។
យោងតាមរបាយការណ៍ស្ដីពីចំនួនភ្ញៀវទេសចរនៅប្រាសាទភ្នំបាខែងដែលភ្នាក់ងារផ្នែកស្ថិតិ និងផែនការទេសចរណ៍របស់នាយកដ្ឋានអភិវឌ្ឈន៍ទេសចរណ៍អង្គរ នៃអគ្គនាយកដ្ឋានអាជា្ញធរអប្សរា ដែលបានស្រង់ចាប់ពីថ្ងៃទី១៩ រហូតដល់ថ្ងៃទី២៥ មករា ឆ្នាំ២០១១ បង្ហាញឱ្យឃើញថា ជាមធ្យមក្នុងមួយថ្ងៃមានភ្ញៀវទេសចរចំនួន២.៤៣៩នាក់ទៅទស្សនាប្រាសាទបាខែង ជាពិសេសនៅពេលល្ងាច ដើម្បីមើលព្រះអាទិត្យអស្ដង្គត ។ នៅក្នុងចំណោមភ្ញៀវទេសចរទាំងនោះមានភ្ញៀវខ្មែរចំនួន១៧០នាក់ ភ្ញៀវជប៉ុនចំនួន២៨៥នាក់ ចិនចំនួន៧៦៣នាក់ កូរ៉េចំនួន ៤៥៤នាក់ ភ្ញៀវអាស៊ីផ្សេងៗចំនួន២៩៥នាក់ និងភ្ញៀវបស្ចិមប្រទេសចំនួន៤៧២នាក់ ។
នាពេលល្ងាចព្រះអាទិត្យមានរាងជារង្វង់មូលដូចកង់រទេះគោបញ្ចេញពណ៌ក្រហមឆ្អៅដែលរៀបលិចចូលទៅក្នុងផ្នែកម្ខាងនៃភពផែនដី ។ ភ្ញៀវទេសចរបានតំរង់ខ្សែភ្នែករាប់ពាន់គូ និងម៉ាស៊ីនថតរូបសំដៅទៅរកព្រះអាទិត្យដោយលាយឡំនឹងសំឡេងហ៊ោកញ្ជ្រៀវហាក់ដូចជាកំពុងស្ថិតក្នុងពិធីបួងសួងសច្ចាផ្សងសុំអ្វីមួយពីព្រះ ហើយបន្ដិចក្រោយមកភាពងងឹតបានគ្របមកលើភពផែនដី ។
តាមរយៈមគ្គុទ្ទេសទេសចរណ៍ភ្ញៀវទេសចរជនជាតិកូរ៉េម្នាក់ក្នុងចំណោមភ្ញៀវទេសចរដ៏ច្រើនកុះករចូលទស្សនាប្រាសាទភ្នំបាខែង កាលពីល្ងាចថ្ងៃទី១៥ ខែមីនា បានបង្ហាញពីអារម្មណ៍ របស់ខ្លួនថា ភ្នំបាខែងពិតជាមានភាពទាក់ទាញយ៉ាងពិសេសសំរាប់រូបគាត់ដោយសារតែវាមានខ្យល់បរិសុទ្ធត្រជាក់ល្អ និងអាចទស្សនាព្រះអាទិត្យអស្តង្គតចោលពន្លឺរស្មីច្រាលឆ្អៅ រំលេចពីលើផ្ទៃទឹកបារាយណ៍ស្ទើរតែមិនអាចបំភ្លេចបាននូវទេសភាពដ៏កម្រនេះ ។
ស្រដៀងគ្នាដែរភ្ញៀវទេសចរម្នាក់ទៀតមកពីបស្ចិមប្រទេសដែលក្នុងដៃរបស់គាត់មានកាន់ម៉ាស៊ីនថតរូបមួយគ្រឿងបានបង្ហាញពីអារម្មណ៍ភរបស់ខ្លួនថា អស្ចារ្យណាស់សំរាប់ប្រទេសកម្ពុជាដែលមានប្រាសាទថ្មបុរាណដ៏សំបូរបែប ហើយទីនេះជាកន្លែងដ៏ពិសិដ្ឋសំរាប់ក្រុមអ្នកនិយមទស្សនាព្រះអាទិត្យហៀបអស្ដង្គត ។ ទីនេះក៏ជាកន្លែងមួយមានកំពស់ខ្ពស់ជាងគេដែលអាចនាំខ្សែភ្នែកភ្ញៀវទេសចរទាំងអស់ទស្សនាតំបន់ឆ្ងាយជិតបានសព្វទិសទី ។
បើយើងឈរនៅលើកំពូលភ្នំបាខែងនៅពេលល្ងាច នៅទិសខាងលិចអាចមើលបារាយណ៍ទឹកថ្លានិងព្រះអាទិត្យអស្ដង្គត ។ នៅទិសខាងកើតអាចមើលឃើញកំពូលច្រូងច្រាងខ្ពស់ធំស្កឹមស្កៃនៃប្រាសាទអង្គរវត្ដ ។ នៅទិសខាងត្បូងអាចមើលឃើញក្រុងសៀមរាបទាំងមូល រួមទាំងបឹងទន្លេសាប ។ ចំណែកទិសខាងជើងអាចមើលទៅឆ្ងាយបែកផ្សែងផុតចុងព្រឹក្សាបង្ហួសទៅភ្នំគូលែន ភ្នំបូក ព្រមទាំងជួរភ្នំដងរែក ។
ភ្នំបាខែងនេះស្ថិតនៅតាមផ្លូវវង់ធំទៅកាន់នគរធំដែលអមដោយព្រៃព្រឹក្សាធំមានម្លប់ត្រជាក់ត្រឈៃនៅចំងាយ៤០០ម៉ែត្រពីមុខគោបុរៈនៃនគរធំក្នុងឧទ្យានវប្បធម៌ប្រវត្ដិសាស្ដ្រអង្គរដ៏ល្បាញល្បីរបស់ព្រះរាជាណាចក្រកម្ពុជាដែលត្រូវបានចាត់បញ្ចូលក្នុងបញ្ជីបេតិកភណ្ឌពិភពលោកនៅឆ្នាំ១៩៩២ មានផ្ទៃដីតំបន់ទ្រនាប់ ទំហំ៤០១គីឡូម៉ែត្រការ៉េ គ្របដណ្ដប់ទៅលើផ្នែកមួយចំនួននៃស្រុក-ក្រុងចំនួនប្រាំ និងឃុំចំនួន២១ ភូមិប្រមាណ១១២របស់ខេត្ដសៀមរាប ស្ថិតនៅក្រោមការគ្រប់គ្រងការពារ និងអភិរក្សដោយអាជា្ញធរជាតិអប្សរា ។
ឧទ្យានវប្បធម៌ប្រវត្ដិសាស្ដ្រអង្គរត្រូវបានជ្រើសជាកន្លែងដ៏ពេញនិយមជាងគេបំផុតនៅក្នុងពិភពលោក។ នេះបើផ្អែកតាមលទ្ធផលស្ទង់មតិរបស់អង្គការ «ទ្រីបអាតវៃស័រ» សហការជាមួយអង្គការយូណេស្កូដែលបានស្ទង់មតិតាមប្រព័ន្ធអ៊ីនធើរណេតទៅលើភ្ញៀវទេសចរចំនួន២៤៥.០០០នាក់ ជុំវិញចំណាប់អារម្មណ៍លើឧទ្យានចំនួន ៧៨៩ នៃបេតិកភណ្ឌពិភពលោកទាំង៩៩១ ។ តាមសិលាចារឹកនិយាយថា ប្រាសាទបាខែងនេះព្រះបាទយសោវរ្ម័នទី១កសាងក្នុងសតវត្សទី១៥នៃពុទ្ធសករាជ «១៤៣៣»ទុកជាគោល ឬទង់ជយ័នៃនគរធំក្នុងសម័យនោះ ដើម្បីឧទ្ទិសថ្វាយដល់ព្រះឥសូរ ទើបគេហៅភ្នំបាខែងនេះថា «យសោធរេស្វរៈ» ៕
ចែករំលែកព័តមាននេះ