រាជធានីភ្នំពេញ ៖ ភាគីពាក់ព័ន្ធបានឯកភាពគ្នា ដើម្បីចាត់វិធានការជាបន្ទាន់ ក្នុងការរៀបចំហេដ្ឋារចនាសម្ព័ន្ធ និងដោះស្រាយបញ្ហាទឹកកខ្វក់នៅក្រុងព្រះសីហនុដោយធ្វើទំនើបកម្មស្ថានីយប្រព្រឹត្តកម្មទឹកកខ្វក់ដែលមានស្រាប់ឲ្យមានសមត្ថភាពក្នុង១ថ្ងៃ បានដល់៣០០០០ម៉ែត្រគីប ។ នេះបើតាមលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងក្នុងកិច្ចប្រជុំអន្តរក្រសួងស្តីពីបញ្ហាប្រឈមទឹកកខ្វក់នៅព្រះសីហនុ កាលពីពេលកន្លងមកនេះ ។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា តាមគោលនយោបាយអភិវឌ្ឍរបស់រាជរដ្ឋាភិបាលព្រះសីហនុមានសន្ទុះអភិវឌ្ឍន៍លឿនដោយមាន កំណើនសកម្មភាពសេដ្ឋកិច្ចគួរឲ្យកត់សម្គាល ជាពិសេសកំណើនក្នុងវិស័យឧស្សាហកម្ម និង ទេសចរណ៍ ។ ទន្ទឹមនេះកាកសំណល់រឹង-រាវ ក៏មានសន្ទុះកើនឡើងផងដែរ ។ ប្រភពបន្តថាដោយហេដ្ឋារចនាសម្ព័ន្ធដែលមានស្រាប់មិនអាចទ្រទ្រង់បានគួបផ្សំនឹងមានកំណើនទឹកកខ្វក់យ៉ាងគំហុក ហើយផ្ទៃរងទឹកភ្លៀងរួមតូចផងនោះ ទឹកកខ្វក់មួយភាគបានហូរតាមអូរធម្មជាតិ ចាក់ទៅសមុទ្រដែលបណ្ដាលឲ្យប៉ះពាល់ដល់បរិស្ថាន និងតំបន់ឆ្នេរសមុទ្រ ។
នៅក្នុងកិច្ចប្រជុំអន្តរក្រសួងស្តីពីបញ្ហាប្រឈម និងដំណោះស្រាយបញ្ហាទឹកកខ្វក់ នៅក្រុងព្រះសីហនុនាពេលថ្មីៗនោះដែរលោកអូនព័ន្ធមុនីរ័ត្ន បានឲ្យដឹងថា ដើម្បីថែរក្សាឆ្នេរសមុទ្រព្រះសីហនុឲ្យនៅល្អស្អាតដូចដើមត្រូវដាក់ចេញនូវកញ្ចប់វិធានការណ៍គ្រប់ជ្រុងជ្រាយ ដែលអាចធានាបាននូវការអភិវឌ្ឍព្រះសីហនុប្រកបដោយចីរភាពក៏ដូចជា ធានានូវការបែងចែកធនធានថវិកាជាតិប្រកបដោយប្រសិទ្ធភាព ។
លោកថា «អង្គប្រជុំបានឯកភាពជាគោលការណ៍ឲ្យចាត់វិធានការបន្ទាន់ រៀបចំហេដ្ឋារចនាសម្ព័ន្ធ ដោះស្រាយបញ្ហាទឹកកខ្វក់នៅក្រុងព្រះសីហនុដោយធ្វើទំនើបកម្មស្ថានីយប្រព្រឹត្តកម្មទឹក កខ្វក់ដែលមានស្រាប់ឲ្យមានសមត្ថភាពច្រោះទឹកកខ្វក់បានដល់៣០០០០ម៉ែត្រគីបក្នុង១ថ្ងៃ ។ សាងសង់ស្ថានីយបូមទឹកកខ្វក់បន្ថែមទៀតរៀបចំប្រព័ន្ធលូ និងបំពាក់ឧបករណ៍ និងសម្ភារ ។ ជាងនេះទៅទៀត រដ្ឋមន្ត្រីក្រសួងសេដ្ឋកិច្ចបានបន្ថែមថា ក្នុងការរៀបចំនេះ ដើម្បីយ៉ាងណា ត្រៀមខ្លួនធ្វើជាម្ចាស់ផ្ទះក្នុងការរៀបចំកិច្ចប្រជុំកំពូលអាស៊ានឆ្នាំ២០២២ខាងមុខនេះ នៅក្រុងព្រះសីហនុ ។
សូមរំលឹកថា នៅក្នុងកិច្ចប្រជុំអន្តរក្រសួងស្តីពីបញ្ហាប្រឈមទឹកកខ្វក់នៅក្រុងព្រះសីហនុ ដឹកនាំដោយលោក អូន ព័ន្ធមុនីរ័ត្ន ក្រោមវត្តមានលោក ជា សុផារ៉ា ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង លោកស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន លោកសាយ សំអាល់ រដ្ឋមន្ដ្រីក្រសួងបរិស្ថាន លោកថោង ខុន រដ្ឋមន្ដ្រីក្រសួងទេសចរណ៍ លោកសុខ ចិន្ដាសោភា រដ្ឋមន្ដ្រីប្រតិភូអមនាយករដ្ឋមន្ដ្រី និងលោកយន្ដ មីន អភិបាលខេត្តព្រះសីហនុ ។
កិច្ចប្រជុំនេះ បន្ទាប់ពីមានការិះគន់ពីបណ្តាញសង្គមហ្វេសប៊ុកថា នៅខេត្តព្រះសីហនុនៅតែបន្តមានការបង្ហូរទឹកកខ្វក់ចូលក្នុងសមុទ្រពីម្ចាស់សណ្ឋាគារ និងផ្ទះសំណាក់ទោះបីមានការព្រមានពីអាជ្ញាធរយ៉ាងណាក្តី ៕ (កែសម្រួលដោយ ៖ សុឃាក់)
ចែករំលែកព័តមាននេះ