រាជធានីភ្នំពេញ ៖ បុរសម្នាក់ជាជនជាតិបរទេសកំពុងតែដើរចុចទូរស័ព្ទដៃ ស្រាប់តែមានជនសង្ស័យចំនួន២នាក់ជិះម៉ូតូមួយគ្រឿងម៉ាកហុងដាឃ្លីក ធ្វើសកម្មភាពឆក់ទូរស័ព្ទដៃបានសម្រេច ហើយរត់គេចខ្លួនបាត់ស្រមោល ត្រូវបានប្រជាពលរដ្ឋបើករថយន្តតូយ៉ូតាព្រូសដេញបុកបណ្តាលអោយរងរបួសធ្ងន់ម្នាក់ និងទ្រោមខ្លួនម្នាក់ ដែលហេតុការណ៍នេះបានកើតឡើងកាលពីវេលាម៉ោង២រំលងអធាត្រឈានចូលថ្ងៃទី២៣ ខែឧសភា ឆ្នាំ២០១៩ តាមបណ្តោយផ្លូវ109 កែងផ្លូវ81 នៅចំណុចមុខវិទ្យាល័យវត្តកោះ ស្ថិតនៅក្នុងសង្កាត់បឹងរាំង ខណ្ឌដូនពេញ ។
ជនសង្ស័យទី១ មានឈ្មោះជី ម៉ាប់ ភេទប្រុស អាយុ25ឆ្នាំ ស្នាក់នៅផ្ទះជួលភូមិកណ្តាល មានស្រុកកំណើតនៅភូមិព្រៃកប្បាស ឃុំត្រពាំងស្វាយ ស្រុកព្រៃកប្បាស ខេត្តតាកែវ និងទី២ មានឈ្មោះលី សម្បត្តិ ភេទប្រុស អាយុ២៩ឆ្នាំ ស្នាក់នៅសង្កាត់បឹងទំពុន ខណ្ឌមានជ័យ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញជនរងគ្រោះម្នាក់ជាជនជាតិបរទេសមិនស្គាល់អត្តសញ្ញាណនោះទេ កំពុងតែឈរចុចទូរស័ព្ទដៃនៅលើផ្លូវ63 ស្រាប់តែលេចមុខជនសង្ស័យចំនួន២នាក់ជិះម៉ូតូមួយគ្រឿងម៉ាកហុងដាឃ្លីក ពណ៌ខ្មៅ ពាក់ស្លាកលេខភ្នំពេញ 1Z- 0122 បើកបរតាមបណ្តោយផ្លូវ63 ក្នុងទិសដៅពីត្បូងទៅជើងមកដល់បានធ្វើសកម្មភាពឆក់ទូរស័ព្ទដៃពីជនជាតិបរទេសបានសម្រេច ហើយរត់គេចខ្លួនបាត់ស្រមោល ភ្លាមៗនោះដែលក៏មានបុរសម្នាក់ទៀត មិនស្គាល់អត្តសញ្ញាណនោះទេ បើករថយន្តតូយ៉ូតាព្រូសជួយដេញតាមជនសង្ស័យមកដល់ចំណុចមុខវិទ្យាល័យវត្តកោះ ស្ថិតនៅក្នុងសង្កាត់បឹងរាំង ខណ្ឌដូនពេញ ក្របួចជាប់ទាំង២នាក់ ប្រគល់អោយសមត្ថកិច្ច។
ដោយឡែកសង្ស័យត្រូវបានប្រជាពលរដ្ឋព្រួតវាយមួយដៃមួយជើងទ្រោមខ្លួន ហើយករណីឆក់ខាងលើនេះនៅផ្លូវ63 ស្ថិតនៅប៉ុស្តិ៍បឹងកេងកង1 ខណ្ឌចំការមន សមត្ថកិច្ចខណ្ឌដូនពេញ បានប្រគល់ឲ្យខណ្ឌចំការមនយកទៅសួរនាំ ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍បឹងកេងកង1 ដើម្បីអោយសមត្ថកិច្ចកសាងសំណុំរឿងបញ្ចូនទៅកាន់តុលាការចាត់ការទៅតាមនីតិវិធី ៕ (កែសម្រួលដោយ ៖ សុឃាក់)
ចែករំលែកព័តមាននេះ